🏠 <     Alfabeto le literasa „c”     Alfabeto le literasa „k”
  <     Ʒeneza     25     >  
Kolaver ćhave le Avraamosqe
25
1 O Avraam maj lilǎs pesqe äk rromni
kaj bućholas Ketura.
2 Oj kerdǎ lesqe le Zimranos,
le Jokśanos,
le Medanos,
le Madianos,
le Iśbakos haj le Śuahos.
3 O Jokśano kerdǎ le Sebas haj le Dedanos.
Äl ćhave le Dedanosqe sas äl aśurimi,
äl letuśimi haj äl leumimi.
4 Äl ćhave le Madianosqe sas o Efa,
o Efer,
o Enoh,
o Abida haj o Elda.
Sǎ kadala sas äl ćhave le Keturaqe.
5 O Avraam dinǎ sǎ so les sas les
k-o Isak.
6 Kolaver ćhaven kaj sas avre rromnǎnça
o Avraam dinǎ len daruri,
haj kabor ov sas ʒuvindo,
durǎrdǎ len paśa pǒ ćhavo Isak,
kaθar ïnklel o kham,
anθ-o Them Kedem.
O mulimos le Avraamosqo
7 Äl gesa le Avraamosqe kaj ov traisajlos
sas äk śäl haj jeftadeśa haj panʒ bärś.
8 O Avraam dinǎ pǒ duxo
haj mulos pala äk śukar phurimos,
phurano anθ-äl bärśa haj ćajlo gesenθar,
haj sas ćhutino anθ-o rïndo pe phurenqo.
9 O Isak haj o Ismael,
lesqe ćhave,
praxosarde les ande peśtera Makpela
kaj si jekh angla avresθe le Mamreça,
anθ-o islazo le Efronosqo
o ćhavo le Coharesqo,
o hetito.
10 Kadava si o islazo kaj kindǎ les o Avraam
kaθar äl ćhave le Hetosqe.
Othe sas praxome o Avraam
haj lesqi rromni e Sara.
11 Pala sosθe mulos o Avraam,
o Del binekuvintisardǎ lesqe ćhaves
le Isakos.
Ov beśelas paśaj xaing Laxaj-Roj.