Kolaver ciave le Avraamoske
25
1 O Avraam mai lileas peske ăk romni
kai buciolas Ketura.
2 Oi kerdea leske le Zimranos,
le Iokșanos,
le Medanos,
le Madianos,
le Ișbakos hai le Șuahos.
3 O Iokșano kerdea le Sebas hai le Dedanos.
Ăl ciave le Dedanoske sas ăl așurimi,
ăl letușimi hai ăl leumimi.
4 Ăl ciave le Madianoske sas o Efa,
o Efer,
o Enoh,
o Abida hai o Elda.
Sea kadala sas ăl ciave le Keturake.
5 O Avraam dinea sea so les sas les
ko Isak.
6 Kolaver ciaven kai sas avre romneanța
o Avraam dinea len daruri,
hai kabor ov sas giuvindo,
dureardea len pașa peo ciavo Isak,
katar înklel o kham,
ando Them Kedem.
O mulimos le Avraamosko
7 Ăl ghesa le Avraamoske kai ov traiisailos
sas ăk șăl hai ieftadeșa hai pangi bărș.
8 O Avraam dinea peo duho
hai mulos pala ăk șukar phurimos,
phurano andăl bărșa hai ciailo ghesendar,
hai sas ciutino ando rîndo pe phurengo.
9 O Isak hai o Ismael,
leske ciave,
prahosarde les ande peștera Makpela
kai si iekh angla avreste le Mamresa,
ando islazo le Efronosko
o ciavo le Țoharesko,
o hetito.
10 Kadava si o islazo kai kindea les o Avraam
katar ăl ciave le Hetoske.
Othe sas prahome o Avraam
hai leski romni e Sara.
11 Pala soste mulos o Avraam,
o Del binekuvintisardea leske ciaves
le Isakos.
Ov beșelas pașai haing Lahai-Roi.