O Avram pakeal ando Rai
15
1 Pala kadala bukea
o Rai sikadilos le Avramoske andă iekh dikhimos,
hai phendeas:
— Na dara,
Avrame!
Me sem kai păziv tut
a hai me sem kiro but baro opral pokinimos.
2 O Avram phendeas:
Raia Devla,
so des man?
Kă me si te merav
hai nai man ciave.
Hai kodova kai lela mîră bukea
si o Eliezer anda o Damasko.
3 Dikh,
man ni dean man ciave.
Hai o robo anda muro kher lela mîră bukea.
4 Atunci o lav le Raiesko phenel leske:
— Na kadava si te lel kire bukea,
hai kodova kai înklela anda tute,
kodova lela kire bukea.
5 Hai o Rai înkaladea les avri hai phendeas:
— Dikh o ceri!
Ghin ăl steale,
te daștisa te ghines len!
Kadea but si te aven kodola save înklena anda tute.
6 Hai ov pakeaias ando Rai.
Hai o Rai sokotisardea leske kadaia sar ciacimos.
O Rai kerdeas ăk phanglimos le Avramosa
7 O Rai phendea le Avramoske:
— Me sem o Rai
savo înkaldea tut anda o Ur le kaldeiengo
te dav tut kadava than te avel kiro.
8 Raia Devla,
sar gianav kă avela muro?
9 Le anda mande iekh gurumni trine bărșenghi,
ăk buzni trine bărșenghi
hai iekh brakho trine bărșengo,
ăk turturika hai iekh tărno porumbelo!
10 Hai ov leas leske sea kadala
hai cindea len po mașkar.
Hai ciutea len ăl epașa fiosaveske
iekh angla avreate,
hai le ciriklean ni cindea len.
11 Hai avile bare hașbale ciriklea,
hulisardes po mas mulo,
hai o Avram dureardea len.
12 Kana te perel o kham,
iekh phari lindri peli po Avram.
Hai ita,
ăk kalimos reateako
hai ăk bari dar peli po Avram.
13 Hai o Rai phendea le Avramoske:
— Te gianes ciaces
kă ăl ciave ke ciavenghe
si te beșen andăk them savo nai lengo,
hai si te keren buki ando neamo kodova
hai si te beșen astarde ștar șăla bărș.
14 Hai kodole neamos saveske kerena buki
krisiva les me,
hai pala kodola
on înklen othar bare barvalimasa.
15 Hai tut si te avel tut ăk merimos șukar,
hai si te aves prahome kă ăk lacio phurimos.
16 Hai le ștarengo neamo si te avel palpale kate,
kă nai pherdo o bezeh le amorițengo gi akanak.
17 Hai o kham pelos,
hai sas ăk tuneariko pîkla.
Hai iekh bov thuvesa
hai ăk kașt astardo savo phabolas nakhles mașkar kodola epașa.
18 Ando kodova ghes o Rai kerdeas ăk phanglimos le Avramosa
hai phendeas:
— Kodolenghe kai înklen anda tute dav len kadava them,
katar o Pai le Egiptosko gi ko baro pai o Eufrato,
19 o them le kenițengo,
kenizițengo,
kadmonițengo,
20 hetițengo,
perezițengo,
refaiițengo,
21 amorițengo,
kanaanițengo,
ghirgasițengo hai le iebușițengo.