I Hágár the o Ismáél
16
1 I Szárai,
lé Ábrámoszkri rromnyi,
ná kérgyász lészké ciné csávén.
Lá hász lá jég szogáloviszá kátho Egyiptomosz,
szávi kide bicsijász Hágár.
2 The i Szárai ode phéngyász lé Ábrámoszké:
— Dikh,
o Drágon Dél ná mikjász mán té kéráv ciné csávén.
Mángáv tut té dzsász ká morri szogáloviszá,
the kide majd sej ké ávélá mán cino csávo látár.
O Ábrám ode kérgyász szo phéngyász i Szárai.
3 I Szárai,
lé Ábrámoszkri rromnyi,
lijász lá Hágárá,
szávi kátho Egyiptomosz hász,
pészkrá szogáloviszá,
the dinyász lá rromnyáké lé Ábrámoszké,
pészkré rromészké.
Akor o Ábrám ebe gyé dés bors bésjász án thém Kánaán.
4 Kide ké o Ábrám lá Hágáráhá szutyá,
the voj bárész ácsijász.
Káná i Hágár dikhjász ké bárész hinyi,
télé dikhjász lá Száraivá,
pészkrá gázdászonyá.
5 The i Szárai ode phéngyász lé Ábrámoszké:
— Vás morro bájosz tu hán o dosálo!
Mé dinyom morrá szogáloviszá tuké,
the voj,
gyészár dikhjász ké bárész ácsijász,
télé dikhjász mán.
O Drágon Dél té kérél csácsibo máská mándé the máská tuté!
6 The o Ábrám ode phéngyász láké:
— Dikh,
tri szogáloviszá án tro vászt hinyi.
Kér lá szo kámész!
The i Szárai dzsungálész phirágyász pész láhá,
káj i Hágár násjász pészké látár.
7 The lé Drágoné Délészkro Ángyálosz
árákhjász lá pásá jég hhányik án pusztá,
pásá kode hhányik
szávi pásá kodo drom hin szávo dzsál ko Sur.
8 O Ángyálosz ode phéngyász:
— Hágár,
lá Száraivákri szogáloviszá,
káthár ávész the káj dzsász?
The voj ode phéngyász:
— Násáv mángé káthá Szárai,
káthá murri gázdászonyá.
9 Drágoné Délészkro Ángyálosz ode phéngyász láké:
— Dzsá pálé ká tri gázdászonyá
the kér tut télé ánglá láté!
10 The inké ode phéngyá:
— Kide bárároho tré csávészkro nyámosz,
ké nástyig té iginéná lén.
11 Drágoné Délészkro Ángyálosz inké ode phéngyász láké:
— Dikh!
Bárész hán the neszvejuvehe jékhé csász,
szávészké csuvehe lészkro náv Ismáel,
a ké o Drágon Dél hájárgyá tut án tri dukh.
12 Vo kide phirávélá pész szár jég vadon grászt.
Szembe ácsélá szekkoné mánusehe,
the té o mánusá szembe ácséná lehe.
The dur bésélá káthá pészkré phrálá.
13 The i Hágár kide csugyász lé Drágoné Délészkro náv,
szávo dumázingyász láhá:
„Tu hán o Dél,
szávo dikhél mán.”
Ké voj ode phéngyász:
„Csácsész hin ké kádé dikhjom kolész,
szávo dikhél mán?”
14 Vás kede kode hhányik kide bicsol Láhháj-Roj.
b Voj hin máská o Kádes the o Bared.
15 The i Hágár neszvejász lé Ábrámoszké jékhé csász,
the vo kide csugyász lészkro náv Ismáel.
16 Lé Ábrámosz hász lész ohhtovárdés the so bors
káná i Hágár neszvejász lészké lé Ismáelosz.