1 Kurke, o angluno ges anθa o kurko, detexara anθa-i rǎt kana ïnkä maj sas tunjariko, e Maria anθa-i Magdala gelis k-o than le praxomasqo, haj dikhlǎs kä o bar sas dino rigaθe poa than le praxomasqo. 2 Atunć naślis haj gelis k-o Simon Petru haj kolavresθe ućeniko, saves jubilas les o Isus, haj phendǎ lenqe:

— Liles amare Rajes anθa o than le praxomasqo, haj ni ʒanas kaj ćhute les.

3 Atunć o Petre haj koaver ućeniko ïnklistes haj ʒanas karing o than le praxomasqo. 4 Äl duj ïnćeposajles te naśän anθ-äk than. Dar koaver ućeniko naśälas maj sigo dä sar o Petre haj areslos maj anglal. 5 Bangilos haj dikhlǎs äl dorǎ le pïnzaqea Joan 19:40 tele, dar ni ïntrisajlos. 6 Atunć o Simon Petre, kaj avelas pala lesθe, arezlos i ov haj ïntrisajlos anθ-o than le praxomasqo, haj dikhlǎs äl dorǎ le pïnzaqe tele. 7 Haj o śtergari, savo sas p-o śäro le Isusosqo, nas le dorjança le pïnzaqe, haj sas ćhutino anθä aver than korkoro, kerdo sulo. 8 Atunć koaver ućeniko, kaj arezlosas maj anglal k-o than le praxomasqo, ïntrisajlos i ov haj dikhlǎs haj pakǎjas. 9 Kä ïnkä ni xakǎrenas so sas ramome: kä o Isus träbulas te ïnviol anθa-l mule. 10 Pala kodoja äl ućenićǎ risajle kä pe khera.

11 Dar e Maria beśelas avri paśa o than le praxomasqo haj rovelas. Haj kana rovelas, bangilis te dikhel anθ-o than le praxomasqo. 12 Haj dikhlǎs duj ïnʒerǎ anθä parnimasθe, beśïndos anθ-o than kaj sas ćhutino o trupo le Isusosqo, jekh k-o śäro haj jekh k-äl pïrne. 13 Haj on phende laqe:

— Ʒuvlie, sosθe roves?

Oj phendǎ lenqe:

— Kä liles mïrä Rajes, haj ni ʒanav kaj ćhute les.

14 Päće phendǎs kadal vorbe, boldinǎjlis haj dikhlǎs le Isusos beśïndos othe anθä pïrnenθe, haj ni ʒanelas kä si o Isus. 15 O Isus phendǎ laqe:

— Ʒuvlie, sosθe roves? Kas rodes?

Oj pakǎjas kä si o grädinari haj phendǎ lesqe:

— Rai!a, kana tu lilǎn les, phen manqe kaj ćhutǎn les, haj va ʒava te lav les.

16 O Isus phendǎ laqe:

— Marě!

Oj boldinǎjlis haj phendǎ lesqe anθ-e ćhib le evreenqi:

— Rabuni!

Kaj xakǎrdǒl: „Sikaitorina!” 17 O Isus phendǎ laqe:

— Na ïnkǎr man, kä ïnkä ni uśtilem k-o Dad. Haj ʒa kä mïrä phral haj phen lenqe kä uśtǎv kä muro Dad haj kä tumaro Dad, kä muro Del haj kä tumaro Del!

18 E Maria anθa-i Magdala gelis haj phendǎs le ućenićenqe:

— Dikhlem le Rajes!

Haj phendǎ lenqe so phendǎs laqe o Isus.

19 Anθ-e rǎt sa kodol kurkesqi, kana äl udara le thanesqe kaj sas kidine äl ućenićǎ sas phandade daraθar kaθar äl bare le evreenqe, avilos o Isus, beślos anθä lenqo maśkar haj phendǎ lenqe:

— Paće tumenqe!

20 Haj päće phendǎs kadal vorbe, sikadǎ lenqe pe vast haj pǒ praśao. Kadǎ kä äl ućenićǎ bukurisajles kä dikhles le Rajes.b Joan 16:19-22 21 Atunć o Isus pale phendǎ lenqe:

— Paće tumenqe! Sar man dinǎ man drom o Dad, kadǎ i me dav tumen drom.

22 Haj päće phendǎs kadala, phurdǎs pä lenθe haj phendǎ lenqe:

— Len o Duxo Sfïnto! 23 Kana va jertina dakanikasqe bezexa, va avela jertime, haj kana avrenqe ni va putrena lenqe bezexa, naj te aven putarde.

24 Dar o Toma, phendo Ʒjamäno, jekh anθa-l deśuduj, nas lença kana avilos o Isus. 25 Kadǎ kä kolaver ućenićǎ phende lesqe:

— Dikhlǎm le Rajes!

Dar ov phendǎs lenqe:

— Nić äk data ni va pakǎva, kana ni va dikhava anθä lesqe vast o semno le karfenqo haj kana ni va ćhava muro naj anθ-o semno le karfenqo haj kana ni va ćhava muro vast anθä lesqo praśao!

26 Pala äk kurko, äl ućenićǎ le Isusosqe sas pale anθ-o kher, haj sas i o Toma lença. Kana äl udara sas phandade, avilos o Isus, beślos anθä lenqo maśkar haj phendǎs:

— Paće tumenqe!

27 Pala kodoja phendǎs le Tomasqe:

— An kathe kǒ naj haj dikh kä mïrä vast! Haj an kǒ vast haj ćhu les anθä muro praśao! Haj na av bi pakjamasqo haj av pakjamaça!

28 O Toma dinǎ les anglal:

— Muro Raj haj muro Del!

29 O Isus phendǎ lesqe:

— Anθa kodoja kä dikhlǎn man, pakǎjan. Baxtale si kola kaj ni dikhle dar sa pakǎje.c 1 Petre 1:8-9

30 Haj o Isus maj kerdǎs but aver semnǎ angla pe ućenićǎ, save naj ramome anθ-o lil kadava, 31 dar äl bukǎ kadala sas ramome ka tume te pakǎn kä o Isus si o Kristos, o Ćhavo le Devlesqo, haj anθa kodoja kä pakǎn, te avel tumen viaca prin lesqo anav.