11
O Raj phendǎsas maj anglal le Mojsǎsqe:
— Va anava ïnkä äk urʒa p-o faraono haj p-o Eʒipto. Pala kodoja va dela tumaro drom koθar. Dar kana va dela tumaro drom, kjar si te gonil tumen dä sǎ koθar. De duma le poporoça, ka fiosavo manuś te mangel kaθar pǒ većino haj fiosavi ʒuvli kaθar pi većina bukǎ ruposqe haj sumnakasqe!
O Raj dinǎs le poporos miśtimos anglal eʒipteǎ. I o Mojsǎ sas dikhlo but baro anθ-o Them le Eʒiptosqo, anglal sluźitorǎ le faraonosqe haj angla o poporo.
O Mojsǎ maj phendǎs le faraonosqe:
— Kadǎ del duma o Raj: «Kam k-o maśkar le reakjaqo si te nakhav anθa o Eʒipto, haj saorä kerde anglal anθa o Them le Eʒiptosqo va merena, kaθar o kerdo anglal le faraonosqo, kaj beśel p-o skauno lesqe thagarimasqo, haj i sǎ angluno kerdo le roabaqo kaj beśel k-o bar le asavesqo, haj i sǎ kerde anglal le animalenqe paśa o kher. Anθä saoro Them le Eʒiptosqo si te avel bare cipimata, kadǎ sar ni maj sas haj naj te maj avel. Dar kä saorä israelicǎ, kaθar äl manuś ʒi k-äl animalǎ paśa o kher, nić äk ʒukel ni va baśäla, kaśte ʒanen kä o Raj ni kerel le Israelosqe sar kerel le Eʒiptosqe.» Atunća saorä sluźitorǎ kire si te aven manθe, si te bangǒn angla manθe, haj va phenena: «Telǎr, tu haj saoro poporo kaj ʒal pala tuθe!» Pala kodoja va telǎrava.
Haj o Mojsǎ ïnklisto kaθar o faraono, pherdo xoli.
O Raj phendǎsas le Mojsǎsqe:
— O faraono naj te aśunel tumenθar, ka mïrä minuni te aven but anθ-o Them le Eʒiptosqo.
10 O Mojsǎ haj o Aron kerdes saorä minuni kadala angla o faraono. Dar o Raj kerdǎs sar bar o ilo le faraonosqo, haj ov ni dinǎs o drom le israelicenqo anθa lesqo them.