1 O Iosua chideas saoră neamuri le Israelosche co Sihem. Dineas mui le phuren le Israelosche, lesche mai baren, lesche crisarea hai lesche bulibașa, hai on aviles angla o Del. 2 O Iosua phendeas saoră poporosche:

— Cadea del duma o Rai, o Del le Israelosco: «Tumare dada, i o Terah, o dad le Avraamosco hai o dad le Nahorosco, mai dă anglal beșenas pă coiaver rig le paieschi Eufrato hai slujinas avre devlenghe. 3 Lilem tumare dades le Avraamos anda coiaver rig le Eufratoschi, phiradem les andă saoro Them Canaan, buteardem lesche ciaven hai dinem les le Isacos. 4 Le Isacos dinem les le Iacovos hai le Esaos, le Esaos dinem les o Plai Seir te avel lesco, hai o Iacov hai lesche ciave gheles ando Egipto.

5 Dinem drom le Moiseas hai le Aronos hai dinem dab o Egipto sosa cherdem lenghe andă lengo mașcar. Pala codoia încaladem tumen othar. 6 Încaladem tumare daden anda o Egipto, hai areslen co baro pai. Ăl egipteia gheles pala tumare dada urdonența hai manușănța păl grast gi co Baro Pai le Trestiengo. 7 Tumare dada dines mui co Rai, hai ov ciuteas întunearico mașcar tumende hai ăl egipteia, andeas o baro pai pă lende hai tasadea len. Dichlen tumare iachența so cherdem ando Egipto. Hai beșlen but timpo ande mulani. 8 Hai andinem tumen ando them le emorițengo, save beșenas închealtar o Iordano, hai on mardiles contra tumari. Dinem len andă tumare vast, lilen lengo them anda tumende, hai mudardem len angla tumende.

9 O Balac, o ciavo le Țiporosco, o thagar le Moabosco, laciardilos te mardeol contra le Israeloschi. Dineas drom te del mui le Balaamos, o ciavo le Beorosco, caște del tumen armaia. 10 Dar ni camnem te așunav le Balaamos: ov binecuvintisardea tumen butioar, hai me hastradem tumen anda o vast ⸤le Balacosco⸥.

11 Nachlen o Iordano hai areslen co Ierihono. Ăl manuș le Ierihonosche mardiles contra tumari, hai ăl emorițea, ăl ferezițea, ăl canaanițea, ăl hetițea, ăl ghirgasițea, ăl hevițea hai ăl iebușițea. Dinem len andă tumare vast, 12 dinem drom angla tumende bari dar, hai gonisardeas len angla tumende, hai colen le duie thagaren le emorițenghe: na che sabiasa, nici che arcosa. 13 Dinem tumen phuv savi ni cherden lan buchi, foruri save ni vazden len, dar andă save beșen. Hai han i andal reza hai andal măslini save ni ciuten len.»

14 Codolasche, daran catar o Rai hai slujin les ciacimasa hai pacheamasa! Ciuden le devlen savenghe slujisardes tumare dada închealtar o Eufrato hai ando Egipto, hai slujin le Raiesche! 15 Dar cana ni placiol tumen te slujin le Raiesche, alon aghes casche camen te slujin: sau le devlenghe savenghe slujinas tumare dada închealtar o Eufrato, sau le devlenghe le emorițenghe ando them savengo beșen! Dar me hai muro cher va slujisa le Raiesche.

16 O poporo dineas anglal:

— Ni daștis te mucas le Raies caște slujis avre devlenghe! 17 Că o Rai, amaro Del, ov sas cova cai andinea amen anda o Them le Egiptosco, anda o them le robiaco, amen hai i amare daden; hai savo cherdeas angla amare iacha codol bare semnea hai păzisardea amen andă saoro drom pă savo phirdeam, hai ando mașcar saoră poporengo catar nachleam. 18 Ov gonisardeas angla amende saoră poporen hai le emorițen save beșenas ando them. I ame va slujisa le Raiesche, că ov si amaro Del!

19 O Iosua phendeas le poporosche:

— Tume ni va daștina te slujin le Raiesche, că si ăc Del sfînto, ăc Del cai camel tumen numa anda leste. Ov ni va iertila tumari doș hai tumare bezeha. 20 Cana va muchena le Raies hai va slujina avre devlenghe, ov si te boldel pes contra tumari hai va cherela tumenghe nasul. Va nimicila tumen chear pala so cherdea tumenghe mișto.

21 O poporo phendeas le Iosuasche:

— Ni! Că va slujisa le Raiesche.

22 O Iosua phendeas le poporosche:

— Tume sen martorea contra tumari că alosarden le Raies caște slujin lesche.

On dine les anglal:

— Seam martorea!

— 23 Atunci ciuden le devlen străiino cai si andă tumaro mașcar, hai bolden tumaro ilo caring o Rai, o Del le Israelosco!

24 Hai o poporo phendeas le Iosuasche:

— Ame va slujisa numa le Raiesche, amare Devlesche, hai va așunasa catar lesco glaso.

25 Ando ghes codova co Sihem o Iosua cherdeas ăc phanglimos le poporosa hai dinea len crisimata sar te train. 26 O Iosua ramosardeas cadal vorbe ando lil le Sicaiimasco le Devlesco. Lileas ăc bar baro hai ciutea les othe tala o stejari cai sas co than o sfînto le Raiesco.

27 O Iosua phendeas saoră poporosche:

— Ita, o bar cadava si te avel martori contra tumari, că așundeas saoră vorbe save phendea len amenghe o Rai. Si te avel martori contra tumari, caște na tharen tumare Devles.

28 Pala codoia o Iosua dineas o drom le poporosco, fiosavesco că leschi phuv cai peli lesche.

29 Pala ăl buchea cadala, o Iosua le Nunosco, o robo le Raiesco, mulos phuro ăc șălaco hai deș bărș. 30 Prahosarde les andă leschi phuv, cai peli lesche, co Timnat-Serah, păl Plaia le Efraiimosche, co nordo catar o Plai Gaș. 31 O Israelo slujisardeas le Raiesche andă saoro timpo so traiisailos o Iosua, hai ando timpo cana mai traiinas pala o Iosua ăl phure save pringianenas sea so cherdeasas o Rai anda o Israelo. 32 Ăl cocalea le Iosifosche, cai andinesas len ăl israelițea anda o Egipto, sas prahome co Sihemo, ande rig le cîmposchi cai chindea les o Iacov catar ăl ciave le Hamorosche, o dad le Sihemosco, ăc șălasa rupo,a Geneza 33:19 savi pelis le ciavenghe le Iosifosche. 33 O Eleeazar, o ciavo le Aronosco, mulos hai sas prahome co plai lesche ciavesco, le Fineeasosco, co plai savo sas dino lesche, păl Plaia le Efraiimosche.