6 Ăl israelițea pale cherde so si nasul angla o Rai, slujisarde le devlenghe ăl Bahal hai le zeiițenghe ăl Astarte, hai le devlenghe le Siriache, le devlenghe le Sidonosche, le devlenghe le Moabosche, le devlenghe le amonițienghe hai le devlenghe le filisteaenghe. Mucle le Raies hai ni mai slujisarde les. 7 E holi le Raieschi astardilis contra le Israeloschi hai bichindeas les le filisteaenghe hai le amonițenghe. 8 On phagle hai închearde le israelițen ando bărș codova hai încă deșohto bărș, saorăn save sas pă coiaver rig le Iordanoschi, ando them le emorițiengo, savo si ando Galaado. 9 Ăl amonițea nachle i o Iordano caște mardeon i le neamurența o Iuda, o Beniamin hai o Efraiim, cadea că o Israelo sas andăc baro necazo. 10 Ăl israelițea dine mui co Rai:

— Cherdeam bezeh contra chiri, că mucleam amare Devles hai slujisardeam le Bahalenghe.

11 O Rai phendeas le israelițenghe:

— Cana ăl egipteia, ăl emorițea, ăl amonițea, ăl filisteia, 12 ăl sidonițea, ăl amalecițea hai ăl maonițea ușteade tumen hai tume dinen mui mande, ni hastradem tumen anda lengo vast? 13 Dar tume muclen man hai slujisarden avre devlenghe. Codolasche ni va mai hastravava tumen. 14 Gian hai den mui căl devla cai alosarden len, te hastraven tumen on ando timpo tumare necazosco!

15 Ăl israelițea phende le Raiesche:

— Cherdeam bezeh, cher amenghe pala sar pacheas că si mișto! Numa hastra amen aghes, rughis tut!

16 Hai încalade anda peo mașcar le devlen străiinea hai slujisarde le Raiesche. Hai ov ni mai îndurisardeas ăl ducha le Israelosche.

17 Ăl amonițea sas dine mui co marimos hai laciarde pi tabăra ando Galaado. Ăl israelițea chidineaile hai laciarde pi tabăra che Mițpa. 18 Ăl mai bare le poporosche anda o Galaad phende iech avresche:

— Savo si o manuș cai va începola o marimos le amonițența? Ov va avela o baro saoră manușăngo cai beșen ando Galaad.