1 O Iacov așundeas le ciaven le Labanosche, save phenenas:

— O Iacov lileas sea so sas amare dadesco hai le bravalimasa amare dadesco chideas ov saoro bravalimos cadava!

2 O Iacov dichleas că o Laban ni mai iubisardea les sar anglal. 3 Atuncia o Rai phendeas le Iacovosche:

— Bolde tut ando them che phurengo, că che neamuri, hai me si te avav tusa.

4 O Iacov dinea drom hai dea mui le Rahela hai i le Leea po cîmpo că lesco cîrdo. 5 Ov phendea lenghe:

— Dichav că tumaro dad ni mai iubil man sar anglal, dar o Del mîră dadesco sas manța. 6 Tume gianen că me cherdem buchi tumare dadesche saoră zuralimasa muro. 7 Dar tumaro dad thardea man, deș drom parubdeas mîrî pochin, dar o Del ni muclea les te cherel manghe nasul. 8 Cana ov phenelas: «Ăl meia hai ăl iej ăl melale te aven chi pochin,» saoră brachea hai buznea cherenas meia hai iej melale. Hai cana phenelas: «Ăl meia hai iej dungasa te avel chi pochin,» saoră brachea hai buznea cherenas meia hai iej dungasa. 9 Cadea lilea o Del saoră animalen tumare dadesche hai dinea len manghe. 10 Cana avelas o timpo te aciol chamnea ăl buznea, vazdem ăl iacha ando suno hai dichlem că ăl țapi cai hutenas păl buznea sas dungasa, melale hai cotorale.

11 Hai o Îngero le Devlesco phendea manghe ando suno: «Iacove!» «Italem,» dinem anglal me. 12 Ov phendeas: «Vazde ăl iacha hai dich: saoră țapi cai huten păl buznea si dungasa, melale hai cotorale, că dichlem sea so cherdea tuche o Laban. 13 Me sem o Del cai dichlean man ando Betel, cai machlean o stîlpo le animasco goghi, cai halean manghe o sovel. Acanac uști hai încli anda cadava them, bolde tut palpale ando them che neamosco!»

14 E Rahela hai e Leea dines anglal:

— Mai si amen amen rig andăl buchea anda o cher amare dadesco? 15 Ni seam ame dichle lestar sar străiinea, că bichindea amen hai haleas i amaro prețo? 16 Ciaces saoro bravalimos cai lilea les o Del catar amaro dad si amaro hai amare ciavengo. Deci cher sea so phendea tuche o Del!

17 O Iacov uștilos hai ciuteas le ciaven hai pe romnean păl cămile. 18 Mînisardea saoră animalen hai sea lengo bravalimos cai chidea les: ăl animalea cai chidea len ando Padan-Aram; hai teleardeas că peo dad, o Isac ando Them Canaan. 19 Cana o Laban ghelosas te tunzil pe brachean hai pe buznean, e Rahela ciordeas ăl idolea pe dadesche, 20 hai o Iacov thardeas le Labanos arameno, că ni phendea lesche că si te nașăl. 21 Cadea nașlos sosa sas les, hai nachlos o Pai o Eufrato, hai ghelos caring ăl Plaia le Galaadosche.

22 Andă le trinengo ghes phendineailos le Labanosche că o Iacov nașlos. 23 O Laban lileas pesa pe neamos, hai ghelos pala leste drom iefta ghesengo hai areslos les căl Plaia le Galaadosche. 24 Dar o Del sicadilos e reat ando suno le Labanosche, o arameno, hai phendeas lesche:

— Ta na cumva phenes le Iacovosche daicii te daraes les!

25 O Laban ghelos co Iacov. (O Iacov ciuteasas peo corto po plai, hai o Laban ciuteasas peo corto pe phralența păl Plaia le Galaadosche.) 26 O Laban phendeas le Iacovosche:

— So cherdean? Thardean man, hai lilean mîră ceian sar lel pes ăl roabe ando război? 27 Soste nașlean cioreal hai thardean man? Te phendeanas manghe, me muclemas tut te teleares bucuriasa hai ghileanța ando așunimos le tamburinaco hai le harfaco. 28 Ni muclean man nici te ciumidav mîră nepoțen hai mîră ceian. Sar ăc dilo cherdean! 29 Sem destul dă zuralo caște cherav tumenghe nasul, dar o Del tumare dadesco phendea manghe ande reat cai nachlis: «Ta na phenes le Iacovosche daicii te daraes les.» 30 Dar acanac teleardean, că si tuche mila catar o cher che dadesco. Dar soste ciordean mîră devlen?

31 O Iacov dinea anglal:

— Darailem că cames te les che ceean palpale mandar. 32 Dar ta na traiil codova cai arachesa che devlen! Angla amare phral, dich so si mande anda chire hai le le tuche!

O Iacov ni gianelas că e Rahela ciordeasas len. 33 O Laban ni arachlea chanci ando corto le Iacovosco, ando corto le Leeaco hai ando corto le duie roabengo. Pala o corto le Leeaco ghelos ando corto le Rahelaco. 34 E Rahela lileasas ăl idolea, hai ciuteasas len ando șărand cai ciul pes p-e cămila hai beșlisas opral. O Laban rodeas andă saoro corto, dar ni arachleas chanci. 35 E Rahela phendeas pe dadesche:

— Muro rai, ta na holeaos cana ni daștiva te ușteav angla tute, că avilo manghe sar le giuvleanghe.

Rodea andă sea, dar ni arachleas ăl idolea. 36 O Iacov holeailos hai halea pes le Labanosa. Phendeas:

— Savi si mîrî doș, savo si muro bezeh, da aves manghe dă hac? 37 Rodean saoră buchea mîră, hai so buchea arachlean anda cheo cher? Ciu len cathe angla mîră neamuri hai che neamuri, caște cheren on cris mașcar amende! 38 Dich, beșlem tute biș bărș. Che brachea hai che buznea ni ciudes, hai ni halem berbecea anda cheo cîrdo. 39 Cana sas ăl animalea cinghearde, ni andem tuche chere. Me pochindem len tuche. Manghesas manghe palpale so ciordolas manghe o ghes sau e reat. 40 O ghes meravas tatimastar, hai e reat meravas șîlestar. Nașălas manghe e lindri andal iacha. 41 Cadea sas andă biș bărș so beșlem tumența. Cherdem tuche buchi deșuștar bărș anda che dui ceia, hai șov bărș anda che brachea hai che buznea, hai deș drom parubdean mîrî pochin. 42 Cana o Del mîră dadesco, o Del le Avraamosco, codova savestar daral o Isac, na fi sas manța, dineanas muro drom acanac bi chancesco. Dar o Del dichleas mîrî duch hai o chinimos mîră vastengo, hai arachi ereat dineas e cris.

43 O Laban dinea anglal le Iacovos:

— Ăl ceia cadala si mîră ceia, ăl ciave cala si mîră ciave. Ăl brachea hai ăl buznea cadala si mîră brachea hai mîră buznea, hai sea so diches si muro. Dar ni mai daștiv te cherav chanci anda mîră ceia hai anda lenghe ciave, cai cherde len. 44 Av te cheras ăc phanglimos, hai ov te avel sar ăc martori mașcar amende.

45 O Iacov lileas ăc bar hai vazdea les sar ăc stîlpo animasco goghi. 46 Phendeas pe phralenghe:

— Chiden bar!

On chides bar hai cherdes ăc grămada hai hales othe pașai grămada. 47 O Laban ciuteas laco anav Iegar-Sahaduta,* Iegar-Sahaduta ande cib e aramaica hai Galed ande cib ebraico hacheardeon „grămada animaschi goghi”. hai o Iacov ciutea laco anav Galed. 48 O Laban phendeas:

— E grămada cadaia te avel aghes mărturia mașcar amende!

Codolasche ciutea laco anav Grămada Animaschi Goghi. 49 Mai buciol i Mițpa,† Mițpa hacheardeol „turno dichimasco, fuiișoro”. că o Laban phendeas:

— O Rai te dichel opral pă amende so cheras cana ni mai avasa andăc than. 50 Cana cheresa nasul mîră ceianghe ori mai lesa aver romnea pala mîră ceia, dich mișto că na ăc manuș va avela amența, hai o Del si te avel martori mașcar mande hai tute!

51 O Laban mai phendeas le Iacovosche:

— Dich e grămada cadaia hai o stîlpo cadava, savo vazdem les mașcar mande hai tute! 52 E grămada cadaia te avel martora hai o stîlpo cadava te avel martori, că nici me nai te nachav tute pa-i grămada cadaia, hai nici tu nai te naches mande pa-i grămada cadaia, hai poa stîlpo cadava, te cherasa amenghe nasul. 53 O Del le Avraamosco hai o del le Nahorosco te cheren cris mașcar amende, ăl devla lenghe dadesche!

O Iacov halea sovel pă codova savestar daralas o Isac. 54 O Iacov andineas ăc jertfa te cherel ăc sinia sfînto po plai hai dinea mui pe phralen te han. On hales hai aciles saoră reat po plai. 55 O Laban uștilos de tehara andai reat, ciumideas pe nepoțen hai pe ceian hai binecuvintisardea len. Pala codoia teleardeas hai boldineailos chere.