1 Mai anglal o Del cherdeas o ceri hai e phuv.

2 E phuv nas laciardi hai nas chanci pă late. Po pai adînco sas întunearico hai o Duho le Devlesco phirelas opral po pai. 3 O Del phendeas:

— Te avel lumina!

Hai sas lumina. 4 O Del dichleas că e lumina sas lacii, hai o Del dinea rigate e lumina catar o întunearico. 5 O Del phendeas le luminache „ghes”, hai le întunearicosche „reat”. Sas reat hai pala codoia sas deteherin: cadava sas o ghes o angluno.

6 O Del phendeas:

— Te avel ăc than te pharavel ăc pai catar aver pai, hai o than codova te aciol mașcar lende!

7 O Del cherdeas o than te pharavel ăl paia cai si tala o than, catar ăl paia cai si opral poa than. Hai cadea sas. 8 O Del phendeas le thanesche „ceri”. Sas reat hai pala codoia sas deteherin: cadava sas le duiengo ghes.

9 O Del phendeas:

— Te chiden pes andăc than ăl paia cai si tala o ceri hai te dicheol o șuchimos!

Hai cadea sas. 10 O Del phendeas le șuchimasche „phuv”, hai le paiesche chidino „baro pai”. O Del dichleas că sas lacii. 11 O Del phendeas:

— Te del e phuv zelenimata: zelenimata sămînțasa, dafia cai cheren rodo pala lengo soio, sămînțasa ando rodo!

Hai cadea sas. 12 E phuv dineas zelenimata, zelenimata sămînțasa pala lengo soio hai dafia cai cheren rodo, sămînțasa ando rodo, pala lengo soio. O Del dichleas că sas lacii. 13 Sas reat, hai pala codoia sas deteherin: cadava sas le trinengo ghes.

14 O Del phendeas:

— Te aven niște lumini ando ceri te den rigate o ghes catar e reat! On te sicaven ăl bare ghesa, ăl ghesa hai ăl bărșa; 15 hai te aven lumini ando ceri, te den lumina p-e phuv!

Hai cadea sas. 16 O Del cherdeas ăl dui bare lumini: e lumina e mai bari te stăpînil o ghes, hai e lumina e mai țîini te stăpînil e reat. Cherdeas i ăl steale. 17 O Del ciutea len po ceri te den lumina p-e phuv, 18 te stăpînin o ghes hai e reat hai te den rigate e lumina catar o întunearico. O Del dichleas că sas lacii. 19 Sas reat, hai pala codoia sas deteherin: cadava sas le ștarengo ghes.

20 O Del phendeas:

— O pai te avel pherdo giuvindimata, hai te hurean ciriclea opral pa-i phuv po ceri!

21 O Del cherdeas ăl bare giuvindimata ando baro pai, hai i saoră giuvindimata cai înotin pherindos o pai, pala lengo soio, hai saoră ciriclea cai hurean, pala lengo soio. O Del dichleas că sas lacii. 22 O Del binecuvintisardea len:

— Cheren puia, buteon, hai pheren ăl paia ăl bare! Te buteon i ăl ciriclea p-e phuv!

23 Sas reat, hai pala codoia sas deteherin: cadava sas le pangengo ghes.

24 O Del phendeas:

— Te del e phuv giuvindimata pala lengo soio: animalea cheresche, animalea țîine hai animalea sălbaticea cai si p-e phuv, pala lengo soio.

Hai cadea sas. 25 O Del cherdeas ăl animalea sălbaticea pala lengo soio, ăl animalea le cheresche pala lengo soio hai saoră animalea țîine cai si p-e phuv pala lengo soio. O Del dichleas că sas lace. 26 Pala cadaia o Del phendeas:

— Te cheras manuș te aven sar amende, te amean amența! Te stăpînin păl mace anda o baro pai, păl ciriclea le ceresche, păl animalea cheresche, pă sea e phuv hai pă sea animalea țîine cai mișchin p-e phuv!

27 O Del cherdeas le manușăs te avel sar leste, sar leste cherdea les o Del, murș hai giuvli cherdea len. 28 O Del binecuvintisardea len hai phendea lenghe:

— Cheren ciave, buteon, pheren e phuv hai cheren lan te avel tala tumende! Stăpînin păl mace le bare paiesche, păl ciriclea le ceresche hai pă saoră animalea cai mișchin p-e phuv!

29 O Del phendeas:

— Ita, dav tumen saoră zelenimata sămînțasa cai si pă saorî phuv, hai saoră dafia cai cheren rodo sămînțasa andră. Cadala te avel tumaro hamos! 30 Hai saoră animalenghe sălbatice, saoră ciricleanghe le cerosche hai saoră animalenghe țîine phuiache, cai si len andă lende giuvindimos, dinem len ca hamos saoră zelenimata.

Hai cadea sas. 31 O Del dichleas sea so cherdeasas hai ita, sas but lace. Sas reat, hai pala codoia sas deteherin: cadava sas le șovengo ghes.