10
O Del del drom le Petres că ăc neevreeo
Sas ăc manuș cai buciolas Corneliu ande Cezareea. Ov sas comandanto păc șăl soldațea andai trupa savi buciolas Italiana. Sas smerime hai daralas catar o Del saoră cheresa piresa. Delas but le ciorăn andal evreea hai totdeauna rughilas pes le Devlesche. Andăc ghes căl trin pala ăl deșudui dichleas claro andăc dichimos ăc îngeros le Devlesco cai întrisailos leste hai phendea lesche:
— Corneliu!
Ov dichleas orta pă leste hai sas lesche dar. Hai dineas anglal:
— So si, Raia?
Hai o îngero phendea lesche:
— Che rugăciuni hai che daruri uștiles sar ăc jertfa angla o Del. Acanac de drom niște manuș co Iope te den mui ăc manușăs po anav Simon, savesche phendeol pe i Petre. Ov beșel că ăc manuș po anav Simon, ăc tăbăcari, savesco cher si pașa e marea.
Păce teleardeas o îngero savo dineasas lesche duma, ov dinea mui dui anda pe slujitorea hai ăc soldato smerime anda cola save sas leste saoro timpo. Păce phendea lenghe sea, dinea len drom co Iope.
Le Petres si les ăc dichimos
Andă le duiengo ghes, cana on sas po drom hai pașonas catar o foro, o Petre ghelos po acoperiș le cheresco caște rughil pes. Sas cam căl deșudui. 10 Lea les boch hai camnos te hal. Ando timpo so cherenas lesche te hal, sas les ăc dichimos. 11 Dichleas o ceri putardo hai daiicii sar ăc pînza bari cai sas mucli tele p-e phuv astardi catar ăl ștar colțuri. 12 Andă late sas saoră feluri animalenghe ștare pîrnența, reptilea phuveache hai ciriclea cerosche. 13 Hai ăc glaso phendea lesche:
— Uști, Petre, cin hai ha!
14 Dar o Petre phendeas:
— Nici ăc data, Raia! Că nici ăc data ni halem daiicii bi-ujo sau mahrime.
15 Hai o glaso pale phendea lesche:
— So ujosardeas o Del, ta na cheres bi-ujo!
16 E buchi cadaia cherdilis trin drom, hai imedime pala codoia e pînza sas lili parpale ando ceri.
17 Ando timpo so o Petre sa pucelas pes so te hacheardeol cadav dichimos cai dichlea les, ita că ăl manuș dine drom catar o Corneliu, pucindos anda o cher le Simonosco, aresles ch-e poarta. 18 Denas mui hai pucenas cana o Simon, phendo i Petre, beșel othe. 19 Hai ando timpo so o Petre gîndilas pes co dichimos codova, o Duho phendea lesche:
— Dich, că roden tut trin manuș! 20 Cadea că uști, de tut tele hai gia lența hai na îndoiisao, că me dinem len drom!
21 Hai o Petre dinea pes tele căl manuș hai phendeas:
— Ita, me sem codova saves roden les. Soste avilen?
22 On phendes:
— O Corneliu, ăc comandanto păc șăl, ăc manuș ciacio hai savo daral catar o Del, hai anda savo saoro poporo evreeo del duma șucar, sas sicado catar ăc îngero sfînto te del tut mui andă peo cher hai te așunel so tu phenes.
23 Cadea că ov dinea len mui andră hai on aciles othe.
Andă le dongo ghes uștilos hai teleardeas lența. Pangi șov andal phral anda o Iope gheles lesa. 24 Ando ghes coaver aresles ande Cezareea. O Corneliu ajuchearelas len hai chideasas pe neamos hai pe amalen ăl mai pașarde. 25 Cana o Petre întrilas, o Corneliu dichlea les, ghelos leste, dinea cocia că lesche pîrne caște onoril les. 26 Dar o Petre vazdea les hai phendea lesche:
— Uști, i me sem manuș!
27 Hai dindos duma lesa, întrisailos andră hai othe arachleas but manuș chidine. 28 Phendea lenghe:
— Tume gianen că anda amende nai misto ca ăc evreeo te maladeol ăc neevreeosa, sau te phiren andăc than. Dar o Del sicadea manghe că ni trăbul te phenav anda nici ăc manuș că si bi-ujo sau mahrime. 29 Codolasche avilem hai ni phendem ni, cana dinen man mui. Cadea că puciav, soste dinen man mui?
30 Atunci o Corneliu phendeas:
— Acanac ștar ghes, sa codol ciasoste, căl trin, rughivas man andă muro cher. Hai andac data angla mande avilos ăc manuș andă hainende cai strălucinas. 31 Phendeas: «Cornelie, o Del așundeas chi rugăciunea hai andea pesche goghi că saoră buchea cai dinean len le ciorănghe. 32 Cadea că de drom co Iope hai de mui le Simonos savesche phendeol i Petre, cai beșel ando cher le Simonosco, ăc tăbăcari, pașa e marea.» 33 Cadea că dinem drom imedime pala tute hai si mișto că avilean. Acanac, sea seam cathe angla o Del te așunas sea so sas tuche poruncime catar o Rai.
O Corneliu boldino co Del
34 Atunci o Petre începosailos te del duma hai phendeas:
— Hachearav acanac că si ciaces că o Del ni cherel deosebirea mașcar ăl manuș, 35 dar anda orso poporo, con daral lestar hai cherel o ciacimos, si primime lestar. 36 Gianen o mesajo savo dinea les drom le israelițenghe phenindos e vestea e lacii: că andineas e pacea prin o Isus Cristos, ov si o Rai saorăngo. 37 Tume gianen ăl buchea cai cherdiles andă saorî Iudeea, începîndos andai Galileea, pala o bolimos vestime catar o Ioan. 38 Gianen sar o Del macleas les, le Isusos anda o Nazareto Duhosa Sfînto hai zuralimasa, hai sar phirelas andac than andă aver than hai cherelas mișto hai sastearelas saorăn cai sas stăpînime catar o beng, anda codoia că o Del sas lesa.
39 Ame seam martorea că saoră buchea cai cherdea len ando them le evreengo hai i ando foro Ierusalimo. Hai les mudarde les, atîrnindos les păc trușul. 40 Les o Del andă le trinengo ghes înviosardea les hai muclea les te dicheol pes, 41 na catar saoro poporo, dar numa catar ăl martorea saven o Del alosardea len mai anglal: ame, save haleam hai pileam lesa păce înviosardeas andal mule. 42 Ov poruncisardea amenghe te phenas o ciacimos le poporosche: că o Del ciutea les te crisol le giuvinden hai le mulen. 43 Anda leste phenen saoră proorocea că si te aven iertime ăl bezeha prin lesco anav fiosavesche savo pacheal andă leste.
44 Ando timpo so o Petre mai delas duma, o Duho Sfînto muclea pes pă sea cola cai așunenas lesche vorbe. 45 Sea cola cai pacheaies hai sas cinde tele, cai avilesas le Petresa, aciles uimime cana dichles că o daro le Duhosco Sfînto ciordilos chear i păl neevreea. 46 Că așunenas len dindos duma andă aver ciba hai sar lăudinas le Devles. Atunci o Petre phendeas:
47 Ciaces daștilas daconiva te opril o pai ta na aven bolde cadal manuș save primisardes o Duho Sfînto, sar i ame?
48 Hai poruncisardeas ca on te aven bolde ando anav le Isusosco Cristos. Pala codoia on rughisarde les te mai aciol trin ștar ghes lența.