4
Ăl proorocea ohamne
1 Mîră gugle, ande lumea si but proorocea ohamne, cadea că na pachean orso duho ⸤savesa ăl manuș den duma⸥, hai dichen cana ăl duhuri si catar o Del!a Deuteronomo 13:1-3 2 Le Duhos le Devlesco daștin te pringianen les cadea: saoră duhuri cai marturisin o Isus sar o Cristos, savo avilos ando trupo, si catar o Del. 3 Hai saoră duhuri cai ni marturisin cadaia anda o Isus nai catar o Del. Cadava si o duho le dușmanosco le Cristososco, anda savo așunden că va avela hai acanac si deja ande lumea.
4 Tume, ciavorale, sen le Devlesche, hai biruiisarden le dușmanos, că cova cai si andă tumende si mai baro dă sar cova cai si ande lumea. 5 Ăl proorocea ăl ohamne si le lumeache, codolasche den duma sar andai lumea, hai e lumea așunen lendar. 6 Dar ame seam le Devlesche. Con pringianel le Devles așunen amendar, con nai le Devlesco ni așunen amendar. Prin cadaia pringianas o Duho le ciacimasco hai o duho le ohaiimasco.
So si e dragostea ciacii?
7 Mîră gugle, te iubis amen iech pă aver, că e dragostea si catar o Del. Sea cai iubin si ciave le Devlesche hai pringianen le Devles. 8 Con ni iubil ni pringianel le Devles, că o Del si dragostea. 9 E dragostea le Devleschi sicadilis mașcar amende cadea: o Del dinea drom ande lumea pe corcoro Ciaves, ca ame te trais prin leste. 10 Cadaia si e dragostea ⸤e ciacii⸥: na că ame iubisardeam le Devles, hai că ov iubisardea amen hai dinea drom pe Ciaves ca jertfa anda amare bezeha. 11 Mîră gugle, cana cadea iubisardea amen o Del, trăbul te iubis amen i ame iech pă aver.
Cana o Del si andă amende, atunci iubis amen iech pă aver!
12 Conic ni dichleas dacdata le Devles. Dar cana iubis amen iech pă aver, o Del aciol andă amende, hai leschi dragostea pherel amen. 13 Hai cadea gianas că acios andă leste hai că ov aciol andă amende: că dinea amen peo Duho. 14 Hai ame dichleam hai phenas o ciacimos i avrenghe, că o Dad dineas drom pe Ciaves caște hastravel le lumea. 15 Cana daconiva phenel o ciacimos, că o Isus si o Ciavo le Devlesco, o Del aciol andă leste, hai ov ando Del. 16 Ame pringiandeam hai pacheaiam ande dragostea savi si le Devles anda amende.
O Del si dragostea, hai cova cai aciol ande dragostea, aciol ando Del, hai o Del aciol andă leste. 17 Cadea că e dragostea pherel amen caște avas bi daraco ando ghes le crisaco, anda codoia că sar si o Isus, cadea seam i ame ande lumea cadaia. 18 Ande dragostea nai dar, hai e dragostea pherdi gonil e dar. Con daral catar e pedeapsa, e dragostea ni aresli că peo scopo. 19 Ame iubis, anda codoia că ov iubisardea amen anglal. 20 Cana daconiva phenel: „Me iubiv le Devles”, dar urol pe phrales, si ăc ohamno. Că, savo ni iubil pe phrales, saves daștil te dichel les, ni daștil te iubil le Devles, saves ni daștil te dichel les. 21 Hai cadaia si e porunca savi si amen lestar: con iubil le Devles te iubil i pe phrales!
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.