1 Ando ghes kodova o Boaz ghelos ke poarta le foroski hai beșlos othe. Hai ita kă nakhelas o răskumpărători anda savo phendeasas o Boaz. Atunci phendeas:

— Mo amale, av kathe hai beș!

Hai ov avilos hai beșlos. 2 O Boaz lileas deș manuș andal phure le foroske hai phendeas:

— Beșen kathe!

Hai on beșles. 3 Pala kodoia phendeas le răskumpărătoreske:

— E Naomi, kai risailis andal thana orta le Moaboske, bikinel o kotor le phuiako savo sas amare phralesko, le Elimelekosko. 4 Hai gîndisailem te kerav tuke pringiandi kadai buki hai te phenav tuke: kin lan angla kala kai beșen kathe hai angla ăl phure amare poporoske! Kana kames te răskumpăris lan, răskumpăris lan! Dar kana ni kames te răskumpăris lan, phen manghe kaște gianav, kă angla tute nai koniva savo te răskumpăril lan, hai pala tute sem me.

Atunci ov phendeas:

— Si te răskumpăriv lan.

5 O Boaz mai phendeas:

— Ando ghes kana va kinesa e phuv katar e Naomi, sa ăk data va kinesa i le Rutea e moabita, e romni le muleski, kaște înkeardeol o anav le mulesko andă leski moștenirea.

6 Atunci o răskumpărători phendeas:

— Ni daștiv te răskumpăriv lan pă muro ghinimos, daratar ta na rimov mîrî moștenirea. Le tu o drepto le răskumpărimasko, kă me ni daștiv te răskumpăriv lan!

7 Anglal ando Israelo sas ăk obicei kana kindeolas sau parubdolas daiicii, kaște zuraol e buki: iekh înkalavelas anda o pîrno pi sandaua hai delas lan kolavreske, hai e buki kadaia sas ăk mărturia ando Israel. 8 Kadea kă o răskumpărători phendeas le Boazoske:

— Kin lan anda tute — hai înkaladeas pi sandaua. 9 Atunci o Boaz phendea le phurenghe hai saoră poporoske:

— Aghes sen martorea kă me kinav katar e Naomi sea so sas le Elimelekos hai sea so sas le Kilionos hai le Mahlonos. 10 Hai sa ăk data kinav i le Rutea ka romni, e moabita, e romni le Mahlonoski, kaște înkeardeol o anav le mulesko andă leski moștenirea, hai o anav le mulesko ta na hasaol mașkar leske phral, hai nici andă lesko foro. Tume sen martorea aghes.

11 Atunci saoro poporo kai sas ke poarta hai ăl phure phendes:

— Seam martorea! O Rai te kerel le romnea savi întril andă keo kher te avel sar e Rahela hai sar e Leea, save kerdes o kher le Israelosko! Te avel tut bravalimos hai cinstea ande Efrata hai te keres tuke ăk anav baro ando Betleemo! 12 Ăl ciave, save va dela le tuke o Rai andai kadai tărni giuvli, te keren tuke ăk kher sar o kher le Perețosko, o Pereț kai kerdea les e Tamar le Iudaske!

13 Kadea kă o Boaz lileas le Rutea hai oi sas leski romni, hai ov sutos lasa. O Rai kerdeas lan te aciol khamni, hai oi kerdeas ăk ciavo. 14 Atunci ăl giuvlea phenenas le Naomeake:

— Binekuvintime te avel o Rai, savo ni muklea tut aghes bi ăk răskumpărătoresko! Lesko anav te avel slăvime ando Israel! 15 Ov si te boldel pale keo sufleto te trail hai si te dikhel tutar kăl phurimata, kă kerdea les ki bori, savi iubil tut hai savi si mai lacii anda tute dă sar iefta ciave.

16 E Naomi lileas le ciaves ande angali hai dikhleas lestar. 17 Ăl vecinea ciute leske anav phenindos:

— Ăk ciavo kerdilos le Naomeake!

Hai phende leske Obed. Kadava sas o dad le Ișaiesko, o dad le Davidosko.

18 Kadala si ăl ciave kai kerdiles ando neamo le Perețosko: o Pereț sas o dad le Hețronosko. 19 O Hețron sas o dad le Ramosko, o Ram sas o dad le Aminadabosko. 20 O Aminadab sas o dad le Nahșonosko, o Nahșon sas o dad le Salmonosko. 21 O Salmon sas o dad le Boazosko, o Boaz sas o dad le Obedosko. 22 O Obed sas o dad le Ișaiosko hai o Ișai sas o dad le Davidosko.