139
O Del pringianel sea so si ando manuș
Karing o mai baro le muzikanțengo. Ăk ghili le Davidoski.
1 Raia, tu rodean andă muro ilo,
hai pringianes man,
2 gianes kana beșav tele hai kana ușteav,
hai dural hakeares muro gîndo.
3 Mișto dikhes kana phirav hai kana sovav,
hai pringianes saoră droma mîră.
4 Ciaces, gi kai te aresel e vorba pă mîrî cib,
hai dikh, Raia, kă pringianes lan andă sea.
5 Tu înkonjuris man anglal hai palal,
hai cius keo vast pă ma.
6 Ăk gianimos kadalestar si but minunime anda mande,
si kadiki dă baro, kă ni daștiv te hakearav les.
7 Kai daștivas te giav katar keo Duho?
Kai daștivas te nașav tutar?
8 Te afi ușteavas ando ceri, tu san othe.
Te afi sovavas ando kher le mulengo, ita tu san i othe.
9 Te afi hureavas karing o răsărimos,
sau te afi beșavas kă koiaver rig le mareaki,
10 i othe keo vast afi phiravelas man,
keo vast o ciacio afi înkearelas man.
11 Te afi phenavas: „Ciaces o tuneariko va uciarela man,
e lumina andă muro juro va kerdola reat!”
12 Dar nici o tuneariko nai kalo anda tute,
hai e reat strălucil sar o ghes.
O tuneariko si sar e lumina anda tute.
13 Kăci tu kerdean saoră riga kai si andă mande,
tu khubdean man andăl pîntecea mîră dake.
14 Lăudiv tut, kă sem kerdo kadea dă uimime hai minunime!
Minunime si ke bukea,
hai muro ilo gianel mișto e buki kadaia!
15 Mîră kokalea nas garade tutar kana semas kerdo andăk than garado.
Kana semas subdo sar ando adînko le phuiako,
16 Ke iakha dikhle man gi kai te kerdeov.
Andă keo lil sas ramome saoră ghesa kai sas hotărîme anda mande,
kana nas nici iekh anda lende.
17 Kabor de kuci si anda mande ke gînduri, Devla!
Hai kabor dă but si!
18 Te afi ghinavas len, afi sas mai but de sar o kișai.
Kana ușteav, sem sa tusa.
19 O, Devla! Te mudaresa kolen kai keren nasul!
Dureon mandar, manuș rateske,
20 kola kai phenen bukea nasul anda tute!
Ke dușmaia phenen keo anav kaște keren nasul!
21 Ciaces, ni urov me, Raia,
kolen kai uron tut?
Hai nai manghe skîrba katar kola kai vazden pes ki kontra?
22 ⸤Da⸥, urov len ăk urasa anda saoro ilo muro,
kerdiles mîră dușmaia.
23 Dikh andă ma, Devla, hai pringian muro ilo!
Ciu ma ke proba hai pringian mîră gînduri kai înkhearen man!
24 Dikh kana sem păk drom karing o bezeh
hai înghear man po drom le veșniciako!
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.