21
Ăl love le phivleake
O Isus vazdeas pe iakha hai dikhleas le bravalen ciutindos pe daruri ande visteria le Temploski. Hai dikhleas i ăk phivlea ciorî ciutindos othe dui pareți. Hai phendeas:
— Ciaces, phenav tumenghe: kadaia phivli ciorî ciuteas mai but dă sar sea kolaver, kă sea kadala ciutes anda so sas len opral. Dar oi ciuteas anda peo ciorîmos, sea so sas lan kaște trail.
Ăl phare timpuri kai va avena
Ando timpo so niște manuș denas duma anda o Templo, kă sas șukar hureado barănța kuci hai darurența dine anda o Del, o Isus phendeas:
So dikhen akanak – si te avel o timpo kana ni va aciola bar pă barăste ta na avel pherado dușmaendar.
On pușle les:
— Sikaiitorina, kana va kerdeona pes sea kadal bukea? Hai savo va avela o semno kai va sikavela kă si te kerdeon kadal bukea?
O Isus phendeas:
— Avel tumen grija ta na tharel tumen dakoniva! Kă but si te aven andă muro anav hai va phenena: «Me sem o Kristos» hai «O timpo si pașă!» Ta na len tumen pala lende! Kana va așunena anda războiende hai răskoalende, ta na daran, kă mai anglal trăbul te kerdeon kadal bukea. Dar o sfîrșito nai imedime.
10 Pala kodoia phendea lenghe:
— Poporea va uștena kontra avre poporenghe, hai thagarimata kontra avre thagarimatenghe. 11 Va avela bare izdraiimata phuiake, hai andak than andă aver than, bokh hai nasfalimata. Va kerdeola bukea daraiimaske hai va avena bare semnea ando ceri.
12 Dar mai anglal dă sea kadala, andai kauza mîră anaveski va ciuna o vast pă tumende hai va rodena te keren tumenghe numa nasul. Va dena tumen andăl vast le sinagogheanghe, va ciudena tumen andăl temnițe, va înghearena tumen angla ăl thagara hai angla ăl guvernatorea. 13 Dar kadal bukea va kerdeona tumenghe kaște aven martorea. 14 Kadea kă hotărîn tume ta na gîndin tumen mai anglal so va phenena kaște apărin tumen! 15 Kă va dava tumen vorbe hai goghi savenghe tumare dușmaia ni va daștina te den anglal. 16 Kear tumare dada, tumare phral, tumare neamuri hai tumare amal va dena tumen andă lenghe vast, hai manuș anda tumende si te aven mudarde. 17 Andai kauza mîră anaveski sea va urona tumen. 18 Dar nici ăk bal anda tumaro șăro ni va hasaola tumenghe. 19 Prin tumari răbdarea va hastravena tumare sufletea.
20 Kana va dikhena kă o Ierusalimo si înkonjurime armatendar, te gianen kă pașol o timpo kana va avela distrugime. 21 Atunci, kola andai Iudeea te nașăn păl plaia, kola anda o Ierusalimo te înklen anda leste, hai kola kai si avri anda o foro ta na întrin andă leste, 22 kă kodola va avena ghesa andă save o Del va pedepsila kaște kerdeol sea so si ramome! 23 Vai katar ăl giuvlea save va avena khamnea hai katar kola save den ciucii andăl ghesa kodola! Kă po them va avena timpuri phare hai va holeaola pes po poporo kadava. 24 Aver manuș va avena mudarde katar e sabia, aver va avena lile prizonerea hai înghearde andă saoră thema, hai o Ierusalimo va avela ușteado andăl pîrne katar aver poporea, gi kana va nakhela e vremea le poporenghi.
25 Va avela semnea ando kham, ando cionot hai andăl stele. Hai pe phuv ăl poporea va avena andăl dukha. Ăl mări va tulburina pes hai va urleana, hai ăl manuș ni va gianena so te keren. 26 Ăl manuș va merena daratar ajukearindos so va kerdeola pe phuv, kăci sea so si baro ando ceri va izdrala. 27 Atunci va dikhena le Ciaves le Manușăsko avindos păk noro zuralimasa hai bare slavasa. 28 Kana va începona te kerdeon kadal bukea, orton tumen hai vazden tumare șăre, kăci tumaro hastraiimos pașol!
29 Hai phendea lenghe ăk pilda:
— Dikhen o smokino hai saoră dafia! 30 Kana dikhen kă den lenghe patrea, gianen kă o milai si pașă. 31 Sa kadea, kana dikhen kă kerdeon ăl bukea kadala, te gianen kă o thagarimos le Devlesko si pașă. 32 Ciaces, phenav tumenghe, kă ni va merena saoră manuș save train akana, gi kana va kerdeona saoră bukea kadala. 33 O ceri hai e phuv va nakhena, dar mîră vorbe ni va nakhena nici ăk data.
34 Len tumari seama, hai na muken tumare ile te phareon petrecerendar hai matimastar, hai le grijatar kadal viațaki hai kadea o ghes kodova te avel pă tumende fără te ajukearen, 35 sar ăk kapkana. Kăci o ghes kodova va avela pă saoră save beșen pă saorî phuv. 36 Dar te len seama saoro timpo hai te rughin tumen, te daștin te hastran katar saoră bukea kadala save va avena, hai te daștin te beșen le șăresa opre angla o Ciavo le Manușăsko!
37 O ghes, o Isus sikavelas ande bar le Templosko, hai e reat gialas hai nakhavelas lan po plai savo buciol le Măslinengo. 38 Hai detehara andai reat saoro poporo avelas leste ko Templo, kaște așunen les.