1 Andăk ghes Sabatosko, o Isus ghelos ke sinia ando kher iekhesko andal bare le fariseienghe. Ăl manuș pîndinas les pașal. 2 Hai ita, angla leste sas ăk manuș nasfalo, sas les pai ando korpo. 3 O Isus dineas anglal le sikaiitoren le Krisake hai le fariseien:

— Si voia te sasteares ando ghes le Sabatosko sau ni?

4 On ni denas duma. Atunci o Isus lileas le manușăs kodoles, sasteardea les hai dinea lesko drom. 5 Hai phendea lenghe:

— Savo anda tumende, kana perela lesko ciavo sau lesko guruv ande haing ando ghes le Sabatosko, ni va înkalavela les po than?

6 Hai ni daștisailes te den les khanci anglal kăl vorbe kadala.

7 Phendeas ăk pilda le manușănghe kai sas dine mui ke sinia, kana dikhleas kă alonas ăl mai lace thana:

— 8 Kana dakoniva del tut mui ko abeav, ta na beșes ke sinia ko than o mai lacio! Daștil pes te afi dineas mui dakanikas mai dikhlo dă sar tute, 9 hai avel kova savo dinea tumen mui i tut hai i les hai phenel tuke:

— De keo than kadal manușăs!

Atunci lagiavesa va beșesa po than palal. 10 Kana san dino mui, gia hai beș po than palal! Atunci kana va avela kova savo dinea tut mui, va phenela tuke: «Amala, av orde păk than mai lacio!» E buki kadaia va kerela tuke cinstea angla sea kai si tusa ke sinia. 11 Kăci sea kai vazden pes va avena umilime, hai kova savo umilil pes va avela vazdino.

12 Phendeas i koleske kai dineasas les mui:

— Kana des ăk sinia o ghes sau e reat, ta na des mui ke amalen, nici ke phralen, nici ke neamuren, nici ke vecinen kai si bravale, ka na kumva i on kă peo rîndo te den tut i tut mui hai numa kadea te aves pokindo! 13 Dar kana des ăk sinia, de mui le ciorăn, le skilozen, le banghen, le korăn! 14 Hai va avesa binekuvintime, kă len nai len sosa te pokinen tuke, anda kadaia kă pokindol pes tuke ke învierea le ciacenghi.

15 Iekh anda kola kai beșenas lesa ke sinia, kana așundeas kadaia, phendea leske:

— Binekuvintime si kova savo va beșela ke sinia ando thagarimos le Devlesko!

16 Hai o Isus phendea leske:

— Ăk manuș dineas ăk bari sinia hai dineas mui but manuș. 17 Kana avilos o timpo le hamasko, dineas drom pe robos te phenel kolenghe kai sas dine mui: «Aven, kă sea si gata!» 18 Dar sea începosailes te phenen kă ni daștin te aven. O angluno phendea leske: «Numa so kindem ăk than po kîmpo hai trăbul te giav te dikhav les. Rughiv tut, iertisar man!» 19 Aver phendeas: «Akanak kindem deș guruva hai giav te probiv len. Rughiv tut, iertisar man!» 20 Aver phendeas: «Akanak însurisailem hai kodolaske ni daștiv te avav.»

21 Kana o robo risailos, phendea pe stăpînoske kadal bukea. Atunci o stăpîno le kheresko holeailos hai phendeas pe roboske: «Gia sigo păl droma hai păl ulițe le foroske hai an kathe le ciorăn, le skilozen, le korăn, le banghen!» 22 Pala kodoia o robo phendeas: «Stăpîne, kerdineailos sar poruncisardean, hai sa mai si than.» 23 Hai o stăpîno phendeas le roboske: «Înkli hai rode păl droma hai pașal barea, hai ker le manușăn te aven, kaște pherdol muro kher! 24 Kă phenav tumenghe kă nici iekh anda kola dine mui ni va hana anda muro hamos!»

25 Andăk than le Isusosa gianas but manuș. Ov boldineailos hai phendea lenghe:

— 26 Kana dakoniva avel mande hai ni urola pe dades,* O Isus kamel te phenel kă dakoniva kai avel pala leste trăbul te iubil mai but les dă sar pi familia. pe da, pe romnea, pe ciaven, pe phralen, pe pheian hai kear pi viața, ni daștil te avel muro uceniko. 27 Savo ni înghearel peo trușul hai ni avel pala mande, ni daștil te avel muro uceniko.

28 Kăci savo si anda tumende, kai kana kamel te vazdel ăk turno, mai anglal ni beșel tele te ghinel kabor love hal le turnosa? Kadea va dikhela kana aresel les ăl love te termenil les. 29 Kana ni kerel kadea, daștil pes kă păce ciuteas leski fundația, ni daștil te termenil les, hai sea kai dikhen te începon te asan lestar 30 hai te phenen: «O manuș kadava începosailos te vazdel, hai ni daștisailos te termenil!»

31 Sau savo thagar, kana gial ko război te mardeol avre thagaresa, ni beșel mai anglal te dikhel kana daștil te gial deșă miența manuș angla kova kai avel kontra leski bișă miența manuș? 32 Kana ni daștil, atunci, so koaver thagar si înkă dur, del leske drom soli te manghel pacea. 33 Sa kadea, ni daștin te aven mîră ucenicea kana ni ciudena tumen katar saoră bukea tumare.

34 O lon si lacio. Dar kana i o lon hasarel peo gusto, sar va dela pes leske parpale kadav gusto? 35 Nai lacio nici andai phuv, nici andai grămada le bălegareski, hai ciudel pes avri. Kas si les kan așunimaske te așunel!