1 O Avraam teleardeas othar ando Them Neghevo. Acilos mașkar ăl thana o Kades hai o Șur, hai othe beșlos sar străiino ando Gherar. 2 O Avraam phendeas andai Sara leski romni:

— Si mîrî phei.

O Abimelek, o thagar le Gherarosko dineas drom hai lileas le Sara.

3 Atunci o Del sikadilos e reat andăk suno le Abimelekoske, hai phendea leske:

— Ita si te meres andai kauza le giuvleaki kai lilean lan, kă si e romni ăk romeski!

4 O Abimelek, kai ni pașilosas late, phendeas:

— Raia, mudares tu ciaces ăk neamo kai nai doșalo? 5 Ni phendea manghe ov kă si leski phei? Hai ni phendeas oi korkori kă ov si lako phral? Me kerdem buki ilesa ujo hai le vastența bidoșale.

6 O Del phendea leske ando suno:

— I me gianav kă kerdean buki ilesa ujo, kodolaske ferisardem tut te na keres bezeh kontra Mîrî. Kodolaske ni muklem tut te pașos late. 7 Akanak de le romes leske romnea palpale, kă ov si prooroko. Si te rughil pes anda tute hai si te traiis. Dar kana ni desa lan palpale, te gianes ciaces kă si te meres, tu hai sea so si kiro.

8 O Abimelek uștilos de tehara andai reat, hai dineas mui saoră manușăn pire. Kana phendea lenghe sea so kerdineailos, ăl manuș kodola darailes zurales. 9 O Abimelek dineas mui le Avraamos hai phendeas leske:

— So kerdean amenghe? So bezeh kerdem me kontra kiri, da kerdean te avel peste mande hai muro thagarimos ăk bezeh kadea dă baro? Kerdean karing mande bukea kai ni trăbulas kerde.

10 Hai o Abimelek mai phendeas le Avraamoske:

— So dikhlean da kerdean kadai buki?

11 O Avraam boldeas palpale:

— Phenavas manghe, andă kav them nai dar katar o Del, hai si te mudaren man andai kauza mîră romneaki. 12 Aver felo si ciaces kă si mîrî phei, e cei mîră dadeski. Numa kă nai e cei mîră daki, hai aresli te avel manghe romni. 13 Hai kana o Del înkaladea man anda o kher mîră dadesko, phendem le Sarake: «Te keres manghe kav miștimos: andă saoră thana katar phirasa, te phenes anda mande kă sem keo phral!»

14 O Abimelek lileas brakhea, buznea hai guruva, robi hai roabe, hai dinea len le Avraamoske, hai dinea les palpale i leske romnea, le Sara. 15 O Abimelek phendeas:

— Ita muro them si angla tute, beș kai tu kames!

16 Hai le Sarake phendeas:

— Ita dav ke phrales ăk mia rupea. Kadala te avel ăk dovada kă san uji, angla sea kai si tusa, kadea kă angla sea tu san bi doșako.

17 O Avraam rughisailos le Devleske, hai o Del sasteardeas le Abimelekos, leske romnea hai i leske roaben, kadea kă daștisailes te bianen. 18 Kăci o Rai phangleasas saoră pîntecea giuvleanghe anda o kher le Abimelekosko andai kauza le Saraki, e romni le Avraamoski.