18
Trin manuș aviles ko Avraam
1 O Rai sikadilos le Avraamoske kăl bare stejarea le Mamreske, kana ov beșelas ando mui le kortosko po baro tatimos le ghesesko.
2 Ov vazdeas pe iakha opre hai dikhleas trin manuș kai beșenas andă pîrnende, pașa leste. Kana ov dikhlea len katar o mui le kortosko, nașlos angla lende, banghilos gi ke phuv 3 hai phendeas:
— Muro Rai, akanak kana sem lacio angla tute, rughiv tut ta na nakhes pașa keo robo! 4 Muk, rughiv tut, te anav ăk țîra pai te thoven tumare pîrne, hai beșen tala kav stejari! 5 Te anav ăk kotor marno te zuralen tumare ile! Pala kodoia daștin te dikhen katar tumaro drom, kăci makar kă nakhlen katar tumaro robo!
On phendes:
— Ker sar phendean!
6 O Avraam ghelos sigo ando korto ke Sara hai phendeas:
— Le sigo trin gărniți arăske, aro parno, frămîntisar len hai ker bokolea!
7 Hai o Avraam nașlos ke turma hai lileas ăk guruv tărno hai lacio, kai dinea les kă ăk sluga te kerel sigo hamos. 8 Pala kodoia lileas kiral hai thud andăk than le guruvesa le tărnesa kai sas kerdo hamos hai ciutea len angla lende. Ov beșlos pașa lende tala o stejari gi kana on hales.
9 Pala kodoia on phende leske:
— Kai si kiri romni e Sara?
Hai ov phendeas:
— Okote ando korto.
10 Hai ov phendeas:
— Gi bărșă ke vremea kadaia si te avav palpale tute hai dikh, e Sara kiri romni si te avel lan ăk ciavo.
E Sara așundeas pala o mui le kortosko. 11 O Avraam hai e Sara sas phure, but bărșenghe. Le Sarake ni mai avelas sar le giuvleanghe. 12 E Sara asaias andă peste hai phendeas: „Akanak kăl phurimata te mai avel man e bukuria le ciavenghi? Muro rom o rai, i ov si phuro!”
13 Hai o Rai phendeas le Avraamoske:
— Soste asaias hai phendeas e Sara: «Si ciaces te mai bianav? Me sem phuri!» 14 Si dak buki phari anda o Rai? Ke vremea kai phendem, me avav palpale tute hai le Sara si te avel lan ăk ciavo.
15 Hai e Sara ni pringiandeas hai phendeas:
— Ni asaiem! — kă sas lake dar. Hai ov phendeas:
— Ni, kă asaian.
O Avraam rughil le Devles
16 Ăl manuș uștile opre othar te telearen, hai dikhles tele karing e Sodoma, hai o Avraam ghelos te nakhavel len. 17 O Rai phendeas:
— Te garavav me katar o Avraam so si te kerav? 18 O Avraam si te aresel ăk neamo baro hai zuralo hai si te avel binekuvintime andă leste saoră neamuri pa-i phuv. 19 Alegisardem le Avraamos kă si te sikavel pe ciaven hai i lenghe ciaven te așunen mandar. Kana on keren so si ciacimos hai miștimos, o Rai si te kerel sea so ov phendea le Avraamoske.
20 Hai o Rai mai phendeas:
— O zbărîmos karing e Sodoma hai e Gomora barilos, hai lengo bezeh si ciaces kadea dă pharo, 21 kodolaske si te dav man tele te dikhav kana ciaces kerdes buki pala o zbărîmos kai avilos gi mande. Kana ni avela kadea, si te gianav.
22 Ăl manuș kodola duriles hai teleardes karing e Sodoma. O Rai sa mai beșelas angla o Avraam. 23 O Avraam pașilos hai phendeas:
— Ciaces si te mudares i le lacen hai i kolen kai keren nasul andăk than? 24 Kana avela ando foro peinda gene lace? Ciaces mudares len i len, hai ni va iertisa o than kodova anda kola peinda gene lace kai si ando foro? 25 Te mudares le lacen andăk than kolența kai keren nasul? Kadea si te keres le lacența sar kolența kai keren nasul? Dur tutar kodoi buki, dur tutar! Kova kai krisil saorî phuv ni va kerela ov o ciacimos?
26 Hai o Rai phendeas:
— Kana arakhava peinda gene lace ande Sodoma, si te iertiv saoro than kodova anda lende.
27 Hai o Avraam phendeas:
— Ita astardem te dav duma le Raieske, hai ni sem mai but sar ăk prafo. 28 Kana anda kola peinda gene lace nai te aven pangi, mudaresa saoro foro anda kola pangi?
Hai ov phendeas:
— Nai te mudarav, kana arakhava ando foro saranda hai pangi lace.
29 O Avraam dineas leske duma mai angle:
— Kana arakhesa numa saranda gene lace?
Hai o Rai phendeas:
— Nai te mudarav anda kodola saranda gene.
30 O Avraam phendeas:
— Te na holeaos, rughiv tut Raia, kana mai dava duma! Kana arakhadona numa treanda gene lace?
Hai o Rai phendeas:
— Nai te mudarava, kana arakhava treanda gene lace.
31 O Avraam phendeas:
— Ita astardem te dav duma le Raieske. Kana arakhadona biș gene lace?
Hai o Rai phendeas:
— Nai te mudarav len anda kodola biș.
32 O Avraam phendeas:
— Te na holeaos, rughiv tut Raia, kana mai dava duma mai ăk data. Kana arakhadona deș gene lace?
Hai o Rai phendeas:
— Nai te mudarav len anda kodola deș gene lace.
33 Pala soste dineas duma le Avraamosa, o Rai teleardeas, hai o Avraam boldineailos palpale kă peo kher.
CC BY-NC-ND 3.0 Másolhatod és terjesztheted a művet bármilyen módon vagy formában. Az alábbi feltételekkel:
- A szerzőt megfelelően fel kell tüntetned, hivatkozást kell létrehoznod a licencre.
- A mű nem használható fel kereskedelmi célokra.
- A mű nem módosítható és nem készíthető belőle átdolgozás, származékos mű.