11
O turno Babel
Saorî phuv sas lan ăk cib hai sa kodola vorbe. On telearindos katar o răsărimos arakhles ăk islazo ando Them Șinar, hai beșles othe. Phendes iekh karing aver:
— Haida te keras kărămida hai te phabaras lan mișto!
E kărămida înkeardea lenghe o than le barăsko, hai e smoala înkeardea lenghe o than le varnițako. Mai phendes:
— Haida te vazdas amenghe ăk foro hai ăk turno savesko ucimos te aresel ko ceri, hai te keras amenghe ăk anav, kaște na avas pharade pă saoro phuv!
O Rai dinea pes tele te dikhel o foro hai o turno savo vazdenas les ăl manuș. Hai o Rai phendeas:
— Ita, on si ăk poporo hai saorăn si len ăk cib. Kana astardiles te keren kadea, khanci ni înkearel len ta na keren sea so ciuten peske ando gîndo. Haida te das amen tele hai te hamis othe e cib, kaște na mai hakeardeol iekh avresa!
Hai o Rai dureardea len othar pă saorî phuv, hai acile te na mai vazden o foro. Kodolaske sas lesko anav Babel,* Ande cib ebraiko o kuvînto Babel așundeol sar „hamimos”. kă othe hamisardeas o Rai e cib saorî phuiaki, hai othar dureardea len o Rai pă sea e phuv.
O neamo le Semosko
10 Kadala si ăl bukea kai kerdiles ando neamo le Semosko: Kă dui bărș păce sas tasadi e phuv, ko phurimos ăk șălako bărș, le Semoske kerdinealos leske o Arpakșad. 11 Pala o kerimos le Arpakșadosko o Sem traiisailos pangi șăla bărș, hai kerdineales leske ciave hai ceia.
12 Ko phurimos le treandango hai pangi bărș, le Arpakșadoske kerdineailos leske o Șelah. 13 Pala so kerdilos o Șelah, o Arpakșad mai traiisailos ștar șăla hai trin bărș, hai kerdineailes leske ciave hai ceia.
14 Kăl treanda bărș le Șelahoske, kerdinealos leske o Eber. 15 Pala so kerdilos o Eber, o Șelah mai traiisailos ștar șăla hai trin bărș, hai kerdinealos leske ciave hai ceia.
16 Ko phurimos le treandango hai ștar bărș, le Eberoske kerdineailos o Peleg. 17 Pala so kerdineailos o Peleg, o Eber mai traiisailos ștar șăla hai treanda bărș, hai kerdineailes leske ciave hai ceia.
18 Ko phurimos le treandango bărș, le Pelegoske kerdineailos leske o Reu. 19 Pala so kerdineailos o Reu, o Peleg mai traiisailos dui șăla hai înea bărș, hai kerdineailes leske ciave hai ceia.
20 Ko phurimos le treandango hai dui bărș, le Reuloske kerdineailos leske o Serug. 21 Pala so kerdineailos o Serug, o Reu mai traiisailos dui șăla hai iefta bărș hai kerdineailes leske ciave hai ceia.
22 Ko phurimos le treandango bărș, le Serugoske kerdineailos leske o Nahor. 23 Pala so kerdineailos o Nahor, o Serug mai traiisailos dui șăla bărș, hai kerdineailes leske ciave hai ceia.
24 Ko phurimos le biș tai înea bărșengo le Nahoroske, kerdineailos leske o Terah. 25 Pala so kerdineailos o Terah, o Nahor mai traiisailos ăk șăl hai deșuînea bărș, hai kerdineailes leske ciave hai ceia.
26 Pala so o Terah pherdeas ieftadeșa bărș, kerdineailes leske o Avram, o Nahor hai o Haran.
O Del kerdeas anda o Avraam ăk poporo baro
(11:27—25:19)
O neamo le Avramosko
27 Kadala si ăl bukea kai kerdiles ando neamo Terah. O Terah kerdeas le Avramos, le Nahoros hai le Haranos. Hai o Haran kerdeas le Lotos. 28 O Haran mulos angla peo dad o Terah, ando them pe neamosko, ando Ur le kaldeiengo. 29 O Avram hai o Nahor lile peske romnea. O anav le romneako le Avramoski sas Sarai. Hai o anav le romneako le Nahoroski sas Milka, e cei le Haranoski, o dad le Milkako hai o dad le Iskaiako. 30 E Sarai naștilas te kerel ciave. Nas lan ciave.
31 O Terah leas pe ciaves le Avramos, le Lotos (o ciavo le Haranosko, o ciavo leske ciavesko) hai pe borea le Sarai (e romni le Avramoski, lesko ciavo), hai înklisto lența anda o Ur le Kaldeiengo te gian ando Them Kanaan, numa aviles ando foro Haran. Hai othe beșles. 32 O Terah mulos ando Haran kă dui șăla hai pangi bărș.

*11:9 Ande cib ebraiko o kuvînto Babel așundeol sar „hamimos”.