9
1 O Del binekuvintisardeas le Noias hai leske ciaven:
— Keren ciave, buteon hai pheren e phuv! 2 Bari dar tumendar te avel pă saoră animalea sălbaticea, pă saoră ciriklea le ceroske, pă sea so mișkil p-e phuv hai pă saoră mace le bare paieske. Dinem len tumenghe andă tumare vast. 3 Sea so mișkil hai si len viața te avel tumenghe hamaske. Sar dinem tumen ăl plante zeli, akanak dav tumen sea. 4 Numa mas pe viațasa, leske ratesa, ta na han! 5 Si te mangav palpale o rat tumare viațako; si te mangav les palpale katar orso animalo, hai katar orso manuș si te mangav palpale e viața avre manușăski. 6 Kana dakoniva ciorela o rat ăk manușăsko, i lesko rat te avel ciordo manușăstar, kă o Del kerdeas le manușăs te avel sar leste. 7 Hai tume, keren ciave hai buteon! Beșen pă saoră phuv, hai buteon pă late!
8 O Del mai phendeas le Noiaske hai leske ciavenghe kai sas lesa:
— 9 Dikh, me kerav ăk phanglimos tumența hai tumare ciavența pala tumende, 10 saoră giuvindimatența kai sas tumența: ăl ciriklea, ăl animalea pașa o kher hai ăl animalea sălbaticea kai sas tumența, saorănța kai înkliste andai korabiia hai saoră animalența save va traiila p-e phuv. 11 Kerav ăk phanglimos tumența kă sea so trail nai te mai avel tasade, e phuv nai te mai avel rimome paiestar.
12 Hai o Del phendeas:
— Dita o semno le phanglimasko savo kerav les mașkar mande hai tumende hai mașkar saoră giuvindimata kai si tumența, andăk neamo andă aver neamo întotdeauna: 13 Muro kurkubeeo saves laciardem les ando noro, ov si te avel o semno le phanglimasko mașkar mande hai e phuv. 14 Kana va kidava nori opral e phuv, hai o kurkubeeo si te sikadeol ando noro, 15 si te anav manghe goghi katar o phanglimos mașkar mande hai tumende hai mașkar sea giuvindimata kai train, hai ăl paia nai te mai kerdeon bare kaște tasaen sea so trail. 16 Kana o kurkubeeo si te avel ando noro, me si te dikhav leste hai si te anav manghe goghi ko phanglimos o veșniko mașkar o Del hai sea giuvindimata kai si p-e phuv.
17 Kadea phendeas o Del le Noiaske:
— Kadava si o semno le phanglimasko savo kerdem les mașkar mande hai sea so trail p-e phuv.
Ăl ciave le Noiaske
18 Ăl ciave le Noiaske sas o Sem, o Ham hai o Iafet, hai on înkliste andai korabiia. O Ham sas o dad le Kanaanosko. 19 Kadala sas ăl trin ciave le Noiaske, hai saoră manuș pa-i phuv înklistes anda lende.
20 O Noia începosardeas te kerel buki e phuv hai ciuteas ande phuv ăk rez. 21 Pileas mol, matilos hai nanghilos ando mașkar pe kortosko. 22 O Ham, o dad le Kanaanosko, dikhleas kă lesko dad si nango, hai phendeas avri pe duie phralenghe. 23 Atuncia o Sem hai o Iafet liles e mantaua, ciute lan păl dume, gheles palpale zeianța hai uciardes o nanghimos lenghe dadesko. On sas palpale zeianța, hai ni dikhles o nanghimos lenghe dadesko. 24 Kana o Noia trezosailos anda o matimos hai așundeas so kerdeasas leske lesko ciavo o mai tărno, 25 phendeas:
— Dino armaia te avel o Kanaan! Te avel o robo mai telal pe phralengo!
26 Mai phendeas:
— Binekuvintime te avel o Rai, o Del le Semosko, hai le Semosko robo te avel o Kanaan! 27 O Del te del but phuv le Iafetos, ov te beșel bukuriasa pașa o Sem, hai lengo robo te avel o Kanaan!
28 O Noia traiisailos pala so sas tasadi e phuv trin șăla hai peinda bărș. 29 Saoră ghes le Noiaske sas înea șăla hai peinda bărș, pala kodoia mulos.
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.