1 Kate începol o ramomos andal bukea save kerdea len o neamo le Adamosko. Kana kerdeas o Del le manușăs, kerdea les te ameal lesa. 2 Kerdea len murș hai giuvli, binekuvintisardea len hai dinea len o anav dă „manuș” kana sas kerde.

3 Ko phurimos ăk șălako hai treanda bărș le Adamoske, kerdineailos leske ăk ciavo kai amealas lesa hai sas sar leste, hai ciuteas lesko anav Set. 4 Pala so kerdilos o Set, o Adam traiisailos ohtoșăla bărș, hai kerdineailes leske ciave hai ceia. 5 Saoră ghes kai traiisailos o Adam sas îneașăla hai treanda bărș. Pala kodoia mulos.

6 Ko phurimos ăk șălako hai pangi bărș le Setoske, kerdineailos leske o Enos. 7 Pala so kerdineailos o Enos, o Set mai traiisailos ohto șăla hai iefta bărș hai kerdineailes leske ciave hai ceia. 8 Saoră ghes le Setoske sas îneașăla hai deșudui bărș, pala kodoia mulos.

9 Ko phurimos le îneadeșa bărșengo le Enososke, kerdineailos leske o Kainan. 10 Pala so kerdilos o Kainan, o Enos mai traiisailos ohto șăla hai deșupangi bărș hai kerdineailes leske ciave hai ceia. 11 Saoră ghes le Enososke sas înea șăla hai pangi bărș, pala kodoia mulos.

12 Ko phurimos le ieftadeșa bărșengo le Kainanoske, kerdineailos leske o Mahalalel. 13 Pala so kerdineailos o Mahalalel, o Kainan mai traiisailos ohto șăla hai saranda bărș, hai kerdineailes leske ciave hai ceia. 14 Saoră ghes le Kainanoske sas înea șăla hai deș bărș, pala kodoia mulos.

15 Ko phurimos le șovardeșengo hai pangi bărș le Mahalaleloske, kerdineailos leske o Iared. 16 Pala so kerdineailos o Iared, o Mahalalel mai traiisailos ohto șăla hai treanda bărș, kerdineailes leske ciave hai ceia. 17 Saoră ghes le Mahalaleloske sas ohto șăla hai îneadeșa hai pangi bărș, pala kodoia mulos.

18 Ko phurimos ăk șălako hai șovardeș hai dui bărș le Iaredoske, kerdineailos leske o Enoh. 19 Pala so kerdineailos o Enoh, o Iared mai traiisailos ohto șăla bărș, hai kerdineailes leske ciave hai ceia. 20 Saoră ghes le Iaredoske sas înea șăla hai șovardeș hai dui bărș, pala kodoia mulos.

21 Ko phurimos le șovardeșengo hai pangi bărș le Enohoske, kerdineailos leske o Metusala. 22 Pala so kerdineailos o Metusala, o Enoh mai phirdeas le Devlesa trin șăla bărș, hai kerdineailes leske ciave hai ceia. 23 Saoră ghes le Enohoske sas trin șăla hai șovardeș hai pangi bărș. 24 O Enoh phirdeas le Devlesa, pala kodoia ma nas, pentrukă lilea les o Del pesa.

25 Ko phurimos ăk șălako hai ohtodeșa hai iefta bărș le Metusalaske, kerdineailos leske o Lameh. 26 Pala so kerdineailos o Lameh, o Metusala mai traiisailos iefta șăla hai ohtodeșa hai dui bărș, hai kerdineailes leske ciave hai ceia. 27 Saoră ghes le Metusalaske sas înea șăla hai șovardeș hai înea bărș, pala kodoia mulos.

28 Ko phurimos ăk șălako hai ohtodeșa hai dui bărș, le Lamehoske kerdineailos leske ăk ciavo. 29 Ov ciuteas lesko anav Noia,* O anav Noia hakeardeol „odihna”, hai mai așundeol sar mîngîimos. phenindos: „Kadava si te mîngîil amen anda amari buki hai anda o pharimos amare vastengo, kai avel anda kadai phuv savi dinea lan armaia o Rai.” 30 Pala so kerdineailos o Noia, o Lameh mai traiisailos pangi șăla hai îneadeșa hai pangi bărș, hai kerdineailes leske ciave hai ceia. 31 Saoră ghes le Lamehoske sas iefta șăla ieftadeșa hai iefta bărș, pala kodoia mulos.

32 Pala so o Noia pherdeas pangi șăla bărș, kerdineailes leske o Sem, o Ham hai o Iafet.