— 1 Kana va kerdeola saoră bukea kadala, e binekuvîntarea hai e armai anda save dinem tuke duma, atunci si te anes tuke goghi lendar ando mașkar saoră neamurengo andă save gonisardea tut o Rai, keo Del. 2 Hai kana va risa tut ko Rai, keo Del, hai kana va așunesa lestar, anda saoro ilo kiro hai anda saoro sufleto kiro, tu hai ke ciave, sa kadea sar porunciv tuke aghes, 3 atunci o Rai, keo Del si te boldel tut andai robia, va avela les mila tutar, hai pale va kidela tut anda o mașkar saoră poporengo andă savo pharadea tut o Rai, keo Del. 4 Kear kana avesa gonime gi ke rig le ceroski, kear i othar va kidela tut o Rai, keo Del, hai i othar va anela tut.

5 O Rai, keo Del va anela tut ando them savo lenas les anda lende ke dada, hai va lesa les anda tute. Si te kerel tuke mișto hai va butearela tut mai but dă sar ke daden. 6 O Rai, keo Del va cinela împrejur keo ilo hai o ilo ke ciavengo, te iubis le Raies, ke Devles, anda saoro ilo kiro hai anda saoro sufleto kiro, kaște trais. 7 O Rai, keo Del va anela saoră armaia kadala pă ke dușmaia, pă kola kai urîn tut hai phirde pala tute. 8 Hai tu va risa tut ko Rai, va așunesa lestar, hai va keresa saoră porunci kadala save dav len tuke aghes. 9 O Rai, keo Del va dela tut but sporo andă saoră bukea ke vastenghe, le rodos ke pîntekosko, o rodo ke animalengo hai o rodo ke phuiako. Kă o Rai va bukurila pes pale te kerel tuke mișto, sar bukurilas pes ke dadendar, 10 kana va așunesa katar o Rai, keo Del, te păzis ăl porunci hai ăl krisimata leske ramome ando lil kadava le sikaiimasko, kana va risa tut ko Rai, keo Del saoră ilesa kiro hai saoră sufletosa kiro.

11 E porunka kadaia, savi dav lan tuke aghes, nai prea phari anda tute, nici prea dur tutar. 12 Nai ando ceri, kaște phenes: «Kon va uștela anda amende ando ceri te anel lan amenghe, te kerel amen te așunas hai te keras?» 13 Nai nici înkealtar o pai baro, kaște phenes: «Kon va nakhela anda amende înkealtar o baro pai te anel lan amenghe, te kerel amen te așunas hai te keras?» 14 Dikh, si kadea dă pașă tutar, andă keo mui hai andă keo ilo, kaște keres lan!

15 Ita ciav aghes angla tute e viața hai o miștimos, o mulimos hai o nasulimos, 16 kă aghes porunciv tuke te iubis le Raies, ke Devles, te phires pă leske droma hai te keres leske porunci, leske krisimata hai leski kris, kaște trais hai te buteos hai ka o Rai, keo Del, te binekuvintil tut ando them kai gias te les les anda tute. 17 Dar kana keo ilo va parubdola, kana ni va așunesa hai mukesa tut thardo te bangheos angla aver devla hai te slujis lenghe, 18 atunci phenav tumenghe aghes kă va merena ciaces, nai te train but ando them kai nakhes o Iordano te les les anda tute. 19 Aghes lav o ceri hai e phuv martori kontra tumari: e viața hai o mulimos ciutem angla tute, e binekuvîntarea hai e armai. Alosar e viața, kaște trais, tu hai ke ciave! 20 Alosar e viața, iubindos le Raies, ke Devles, așunindos lestar hai înkearindos lestar! Kă ov del tut viața hai but ghes, kaște beșes p-e phuv anda savi haleas sovel o Rai ke dadenghe, le Avraamoske, le Isakoske hai le Iakovoske kă va dela lan lenghe.