1 Dikhen so dragostea dea amen o Dad, kă phendea amenghe ciave le Devleske. Hai kadea seam. Kodolaske e lumea ni hakarel amen, kă nici les ni hakardea les. 2 Mîră gugle, akanak seam ciave le Devleske. Hai so si te avas, o Del ni sikadea amenghe gi akanak. Dar gianas kă, atunci kana va sikadeola, va avasa sar leste,* Ando originalo „va sikadeola”, daștil pes te hakeardol „o Kristos va sikadeola”, sau „so si te avas va sikadeola”. kă si te dikhas les kadea sar si. 3 Hai saorăn kai si len e nadejda kadaia, ujon pes, sar si ov ujo.

4 Sea kai keren bezeh, vazden pes kontra le krisaki le Devleski, kă te keres bezeh si te vazdes tut kontra leski krisaki. 5 Hai gianen kă ov sikadilos kaște lel ăl bezeha hai andă leste nai bezeh. 6 Kadea kă sea kai acion andă leste ni keren bezeh. Kola kai keren bezeh ni dikhle les, nici ni pringiande les.

7 Ciavorale, konik ta na tharel tumen! Kova kai trail ando ciacimos si ciacio, sar ov si ciacio. 8 Kova kai trail ando bezeh si le benghesko, kă dă anglal o beng kerel bezeh. Anda kadaia o Ciavo le Devlesko sikadilos kaște nimicil ăl bukea kai keren len o beng. 9 Nici ăk ciavo le Devlesko ni trail ando bezeh, kă e viața le Devlestar aciol andă leste. Hai ni daștil te trail ando bezeh,† Ando originalo „ni daștil te trail ando bezeh” si „ni daștil te kerel bezeh”. kă si ăk ciavo le Devlesko. 10 Prin kadaia pringiandeon ăl ciave le Devleske hai ăl ciave le bengheske: sea kai ni train ando ciacimos nai katar o Del, nici kola save ni iubin pe phralen.

11 Kă kadaia si e vestea savi așunden lan dă anglal, te iubis amen iekh pă aver. 12 Ta na avas sar sas o Kain, kai sas le nasulesko hai mudardeas pe phrales. Hai sostar mudardea les? Kă leske fapte sas nasul, hai ăl fapte leske phraleske sas ciace. 13 Phralale, na mirin tumen, kana urol tumen e lumea! 14 Ame gianas kă nakhleam anda o mulimos ke viața, pentrukă iubis amare phralen. Kon ni iubil aciol ando mulimos. 15 Sea kai uron pe phralen si ucigașea. Hai gianen kă nici ăk ucigaș nai les andă leste e viața veșniko.

16 Ame pringiandeam e dragostea prin kadaia kă o ov dineas pi viața anda amende. I ame trăbul te deas amari viața anda amare phral. 17 Kana dakoniva si les ăl lacimata le lumeake, hai dikhel pe phrales andăl pharaimata hai ni sikavel leske mila, sar si andă leste e dragostea le Devleski? 18 Ciavorale, ta na iubis le vorbasa, nici le cibasa, hai te iubis le faptasa hai le ciacimasa!

19 Kadea va pringianasa kă seam le ciacimaske hai va liniștisa amare ile angla leste, 20 kana amaro ilo mustrol amen, anda kodoia kă o Del si mai baro dă sar amaro ilo hai pringianel sea. 21 Mîră gugle, kana ni mustrol amen amaro ilo, seam bi darako angla o Del. 22 Hai orso va mangasa va primisa lestar, kodolaske kă păzis leske porunci hai keras so les placiol les. 23 Kadaia si leski porunka: te pakeas ando anav leske Ciavesko, o Isus Kristos, hai te iubis amen iekh pă aver, sar poruncisardea amenghe ov. 24 Kon kerel leske porunci aciol ando Del hai o Del andă leste. Hai kadea gianas kă ov aciol andă amende: prin o Duho saves dinea les amenghe.