O phirimos le evreenqo anθ-e mulani
(O phirimos 12—14; 16—18; 20; 21:4-9; 22—24)
Äl numerǎ
12
E Maria haj o Aron den duma kontra le Mojsǎsqi
1 E Maria haj o Aron dine duma kontra le Mojsǎsqi anθa-i kauza le ʒuvlǎqi kuśito savǎ lilǎsas ov dä romni; kä lilǎsas äk ʒuvli kuśito. 2 Phendes:
— Ćaćes numa prin o Mojsǎ dinǎ duma o Raj? Ni dinǎs duma i prin amenθe?
Haj o Raj aśundǎs. 3 (Haj o Mojsǎ sas äk manuś but smerime, maj smerime dä sar orso manuś pa-i phuv.)
4 Anθa-k data o Raj phendǎs le Mojsǎsqe, le Aronosqe haj le Marǎqe:
— Ïnklen sǎ äl trin k-o korto le malaimasqo!
Haj on ïnkliste. 5 O Raj dinǎ pes tele anθ-o stïlpo le norosqo haj beślos k-o udar le kortosqo. Dinǎ muj le Aronos haj le Maria, haj on paśiles. 6 Haj phendǎ lenqe:
— Aśunen miśto so phenav tumenqe!
Kana si maśkar tumenθe äk prooroko le Rajesqo,
anθ-äk dikhimos kerdǒv man prinʒando lesqe,
anθ-äk suno dav lesqe duma.
7 Na sa kadǎ si i mïrä roboça le Mojsǎça.
Daśtiv te avel man pakjamos anθä lesθe
anθä saoro kher muro.
8 Dav duma leça muj karing mosθe,
miśto, na vorbença phare xakǎrimasqe,
haj kjar dikhel sar sikadǒl o Raj.
Kadǎ, sar ni darajlen
te den duma kontra mïrä robosqe
le Mojsǎsqe?
9 O Raj xolǎjlos pä lenθe, haj telǎrdǎs.
10 O noro durilos poa korto, haj ita kä e Maria pherdilis parnimos lepraqo sar o iv. O Aron boldinǎlos karing e Maria, haj dikhlǎs kä sas lan lepra. 11 Atunća o Aron phendǎs le Mojsǎsqe:
— Ax, muro raj, rugiv tut, na ker amen te phiravas e doś le bezexäsqi savo kerdǎm les sar niśte dile! 12 Rugiv tut ta na avel e Maria sar äk ćhavo kerdo mulo, savesqo mas si pä epaśaθe kerno kana ïnklel anθa pi dej!
13 O Mojsǎ dine muj k-o Raj:
— Devl!a, rugiv tut, sastǎr lan!
14 Haj o Raj phendǎs le Mojsǎsqe:
— Te ćungardǎsas laqo dad pä laqo muj, na fi sas laʒavesqi timpo jefta ges? Kadǎ kä te avel dini avri jefta ges anθa-i tabära, numa pala kodoja te avel primime palpale.
15 E Maria sas dini avri jefta ges anθa-i tabära, haj o poporo ni telǎrdǎ ʒi kana sas primime palpale. 16 Pala kodoja o poporo telǎrdǎs anθa o Hacerot haj beśles anθ-e Mulani Paran.
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.