18
Trin manuś aviles k-o Avraam
O Raj sikadilos le Avraamosqe k-äl bare steźarǎ le Mamresqe, kana ov beśelas anθ-o muj le kortosqo p-o baro tatimos le gesesqo.
Ov vazdǎs pe jakha opre haj dikhlǎs trin manuś kaj beśenas anθä pïrnenθe, paśa lesθe. Kana ov dikhlǎ len kaθar o muj le kortosqo, naślos angla lenθe, bangilos ʒi ke phuv haj phendǎs:
— Muro Raj, akanak kana sem laćho angla tuθe, rugiv tut ta na nakhes paśa kǒ robo! Muk, rugiv tut, te anav äk cïra paj te thoven tumare pïrne, haj beśen tala kav steźari! Te anav äk kotor marno te zuralen tumare ile! Pala kodoja dikhen kaθar tumaro drom, päće dikhena tumare robos!
On phendes:
— Ker sar phendǎn!
O Avraam gelos sigo anθ-o korto ke Sara haj phendǎs:
— Le sigo trin gärnici aräsqe, aro parno, främïntisar len haj ker bokolǎ!
Haj o Avraam naślos ke turma haj lilǎs äk guruv tärno haj laćho, kaj dinǎ les kä äk sluga te kerel sigo xamos. Pala kodoja lilǎs kiral haj thud anθ-äk than le guruveça le tärneça kaj sas kerdo xamos haj ćhutǎ len angla lenθe. Ov beślos paśa lenθe tala o steźari ʒi kana on xales.
Pala kodoja on phende lesqe:
— Kaj si kiri rromni e Sara?
Haj ov phendǎs:
— Okote anθ-o korto.
10 Haj ov phendǎs:
— Ʒi bärśä ke vremǎ kadaja si te avav palpale tuθe haj dikh, e Sara kiri rromni si te avel lan äk ćhavo.
E Sara aśundǎs pala o muj le kortosqo. 11 O Avraam haj e Sara sas phure, but bärśenqe. Le Saraqe ni maj avelas sar le ʒuvlǎnqe. 12 E Sara asajas anθä pesθe haj phendǎs: „Akanak k-äl phurimata te maj avel man e bukuria le ćhavenqi? Muro rrom o raj, i ov si phuro!”
13 Haj o Raj phendǎs le Avraamosqe:
— Sosθe asajas haj phendǎs e Sara: «Si ćaćes te maj bianav? Me sem phuri!» 14 Si dak buki phari anθa o Raj? Ke vremǎ kaj phendem, me avav palpale tuθe haj le Sara si te avel lan äk ćhavo.
15 Haj e Sara ni prinʒandǎs haj phendǎs:
— Ni asajem! — kä sas laqe dar. Haj ov phendǎs:
— Ni, kä asajan.
O Avraam rugil le Devles
16 Äl manuś uśtile opre othar te telǎren, haj dikhles tele karing e Sodoma, haj o Avraam gelos te nakhavel len. 17 O Raj phendǎs:
— Te garavav me kaθar o Avraam so si te kerav? 18 O Avraam si te aresel äk njamo baro haj zuralo haj si te avel binekuvintime anθä lesθe saorä njamuri pa-i phuv. 19 Aleʒisardem le Avraamos kä si te sikavel pe ćhaven haj i lenqe ćhaven te aśunen manθar. Kana on keren so si ćaćimos haj miśtimos, o Raj si te kerel sǎ so ov phendǎ le Avraamosqe.
20 Haj o Raj maj phendǎs:
— O zbärïmos karing e Sodoma haj e Gomora barilos, haj lenqo bezex si ćaćes kadǎ dä pharo, 21 kodolasqe si te dav man tele te dikhav kana ćaćes kerdes buki pala o zbärïmos kaj avilos ʒi manθe. Kana ni avela kadǎ, si te ʒanav.
22 Äl manuś kodola duriles haj telǎrdes karing e Sodoma. O Raj sa maj beśelas angla o Avraam. 23 O Avraam paśilos haj phendǎs:
— Ćaćes si te mudares i le laćhen haj i kolen kaj keren nasul anθ-äk than? 24 Kana avela anθ-o foro peinda ʒene laćhe? Ćaćes mudares len i len, haj ni va jertisa o than kodova anθa kola peinda ʒene laćhe kaj si anθ-o foro? 25 Te mudares le laćhen anθ-äk than kolença kaj keren nasul? Kadǎ si te keres le laćhença sar kolença kaj keren nasul? Dur tuθar kodoj buki, dur tuθar! Kova kaj krisil saorï phuv ni va kerela ov o ćaćimos?
26 Haj o Raj phendǎs:
— Kana arakhava peinda ʒene laćhe anθ-e Sodoma, si te jertiv saoro than kodova anθa lenθe.
27 Haj o Avraam phendǎs:
— Ita astardem te dav duma le Rajesqe, haj ni sem maj but sar äk prafo. 28 Kana maśkar kola peinda ʒene laćhe ni avena panʒ, mudaresa tu anθä panʒ saoro foro?
Haj ov phendǎs:
— Naj te mudarav, kana arakhava anθ-o foro saranda haj panʒ laćhe.
29 O Avraam dinǎs lesqe duma maj angle:
— Kana arakhesa numa saranda ʒene laćhe?
Haj o Raj phendǎs:
— Naj te mudarav anθa kodola saranda ʒene.
30 O Avraam phendǎs:
— Te na xolǎos, rugiv tut Rai!a, kana maj dava duma! Kana arakhadona numa trǎnda ʒene laćhe?
Haj o Raj phendǎs:
— Naj te mudarava, kana arakhava trǎnda ʒene laćhe.
31 O Avraam phendǎs:
— Ita astardem te dav duma le Rajesqe. Kana arakhadona biś ʒene laćhe?
Haj o Raj phendǎs:
— Naj te mudarav len anθa kodola biś.
32 O Avraam phendǎs:
— Te na xolǎos, rugiv tut Rai!a, kana maj dava duma maj äk data. Kana arakhadona deś ʒene laćhe?
Haj o Raj phendǎs:
— Naj te mudarav len anθa kodola deś ʒene laćhe.
33 Pala sosθe dinǎs duma le Avraamoça, o Raj telǎrdǎs, haj o Avraam boldinǎjlos palpale kä pǒ kher.