16
E Agar haj o Ismael
1 E Saraj e rromni le Avramosqi ni kerdǎsas lesqe nić äk ćhavo. Lan sas lan äk roaba eʒiptjanka p-o anav Agar. 2 Haj e Saraj phendǎs le Avramosqe:
— Dikh, o Raj ni muklǎ man te kerav ćhave. Rugiv tut te ʒas kä mïrï roaba, kadǎ daśtiva te avel man ćhave laθar!
O Avram aśundǎs so phendǎs e Saraj. 3 E Saraj e rromni le Avramosqi lilǎs le eʒiptjanka Agar, pe roaba, haj dǎ lan dä rromni pe rromesqe le Avramosqe, pala so o Avram beślos deś bärś anθ-o Them Kanaan.
4 Ov gelos ke Agar haj oj aćhilis khamni. Kana oj dikhlǎ pes khamni, dikhlǎs opral pe stäpïnka. 5 Haj e Saraj phendǎs le Avramosqe:
— Tu san dośalo sosθe kerdǒl manqe! Me dinem mïrï roaba anθä kiri angali, haj oj kana dikhlǎs kä aćhili khamni, dikhlǎ man opral. O Raj te kerel kris maśkar amenθe!
6 O Avram phendǎs palpale le Sarajaqe:
— Dikh, ki roaba si anθä kǒ vast. Ker laqe so tu kames!
Haj e Saraj phiradilis nasul laça, haj e Agar naślis laθar. 7 Haj o Ïnʒero le Rajesqo arakhlǎ lan paśaj xaing anθ-e mulani, paśa o drom kaj ïngǎrel k-o Śur. 8 Ov phendǎs:
— Agar, e roaba le Sarajaqi, kaθar aves haj kaj ʒas?
Haj oj phendǎs:
— Naśav kaθar mïrï stäpïnka, e Saraj.
9 O Ïnʒero le Rajesqo phendǎs laqe:
— Bolde tut kä kiri stäpïnka haj aśun laθar, beś telal laqo vast!
10 O Ïnʒero le Rajesqo phendǎ:
— Si te butǎrav but ke ćhaven, si te aven kadǎ dä bare kä ni daśtin te aven ginde.
11 O Ïnʒero le Rajesqo phendǎs:
— Dikh, akana san khamni. Si te biandes* Biandes äk ćhavo = keres äk ćhavo äk ćhavo kaj si te ćhus lesqo anav Ismael,† O anav Ismael xakǎrdǒl „o Del aśunel”. kä o Raj aśundǎs ki dukh. 12 Ov si te avel sar äk xär sälbatiko maśkar äl manuś. Lesqo vast si te avel vazdino karing sǎ äl manuśa haj o vast saorä manuśänqo si te avel vazdino karing lesθe, haj si te avel korkoro bi phralenqo.
13 Haj oj ćhutǎs o anav le Rajesqo kaj dǎ laqe duma:
— Tu san o Del kaj dikhel man.
Kä oj phendǎs: „Ćaćes? Kate me dikhlem kodoles kaj dikhlǎ man!” 14 Kodolasqe e xaing kodoja bućholas Lahaj-Roi: „E xaing Kolesqi kaj si ʒungado haj dikhel”. Oj si maśkar o Kades haj o Bared.
15 E Agar biandǎs le Avramosqe äk ćhavo, haj o Avram ćhutǎs lesqo anav Ismael. 16 Le Avramos sas les oxtodeśa haj śov bärśa kana e Agar biandǎs lesqe le Ismaelos.
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.