17
Na keren avren te keren bezeh!
O Isus phendeas pe ucenicenghe:
— Ciaces va avena bukea save va kerena le manușăn te keren bezeha, dar vai katar o manuș prin savo aven! Afi sas mai mișto anda leste te avel les ăk bar aseavesko phanglo ke kor hai te avel ciudino ando pai, dă sar te kerel iekhes andal țîinoră kadala te kerel bezeh. Kadea kă len seama tumende!
Kana tumaro phral kerel bezeh, mustrosar les! Hai kana fal les nasul, iertisar les! Hai kana kerel bezeh kontra kiri iefta drom po ghes, hai iefta drom boldel pes tute hai phenel: «Fal man nasul», trăbul te iertis les.
De amen mai but pakeamos!
Ăl apostolea phendes le Raieske:
— De amen mai but pakeamos!
Hai o Rai phendeas:
— Te avelas tumen pakeamos kabor ăk kukin muștareski, phenenas kadal dudoske: «Înkli andai phuv hai plantosao ande marea», hai așunelas tumendar.
So trăbul te kerel ăk robo
Te phenas kă iekh anda tumende si les ăk robo savo aril sau si le brakheanța. Kana ril pes katar o kîmpo, ni va phenena leske: «Av sigo hai beș ke sinia.» Mai sigo va phenena leske: «Ker manghe te hav, ciu keo șorțo hai servisar man gi kana hav hai peav! Pala kodoia daștis te has hai te pes i tu.» Oare trăbul te nais ke roboske kă kerdeas so phendean leske? Ni trăbul. 10 Sa kadea i tume, păce keren sea so poruncisailos tumenghe, te phenen: «Seam robi bimeritosko. Kerdeam so trăbulas te keras.»
O Isus sastearel deș manuș lepratar
11 Kana o Isus gialas karing o Ierusalimo, ghelos pașa o hotaro kai si mașkar e Samaria hai e Galileea. 12 Kana pașilos te întril andăk gav, malade les deș manuș nasfale lepratar. On beșenas dur, 13 hai dines mui zurales:
— Isuse, stăpîne, av tut mila amendar!
14 Kana dikhlea len o Isus, phendea lenghe:
— Gian hai sikadeon le rașaienghe!
Hai ando timpo so gianas kăl rașaia, ujosailes.
15 Iekh anda lende, kana dikhleas kă si sasteardo, risailos, hai mosa baro lăudilas le Devles. 16 Ciudea pes le mosa ke phuv kăl pîrne le Isusoske hai naiisardea leske. Ov sas andai Samaria. 17 O Isus phendeas:
— Ni ujosailes sea ăl deș? Kai si kolaver înea? 18 Soste ni aviles te lăudin le Devles hai numa kadav străiino korkoro avilos?
19 Hai phendea leske:
— Uști hai telar! Keo pakeamos sasteardea tut.
Kana va avela o thagarimos le Devlesko?
20 Ăl fariseia pușles le Isusos, kana va avela o thagarimos le Devlesko. Ov phendeas lenghe:
— O thagarimos le Devlesko ni avel andăk felo te avel dikhlo. 21 Ni va phendola: «Ita, si kathe!» sau «Si okote!» Dar așunen, o thagarimos le Devlesko si mașkar tumende.
22 Hai phendeas le ucenicenghe:
— Va avena ghesa kana va kamena te dikhen iekh andal ghesa le Ciaveske le Manușăsko, hai ni va dikhena les. 23 Va phendeola tumenghe: «Ita, si kathe!» sau «Ita, okote si!» Beșen kai sen hai na gian pala lende! 24 Anda kodoia kă kana o Ciavo le Manușăsko va rila pes, ando ghes kodova, va avela sar o fulgero kai strălucil hai luminil katar ăk rig kă aver le ceroski. 25 Dar mai anglal trăbul te suferil but hai te avel dino rigate katar ăl manuș save train akana.
26 Hai sar sas andăl ghesa le Noiaske, kadea va avela i andăl ghesa le Ciaveske le Manușăsko: 27 hanas, penas, însurinas pes hai mărătinas pes gi ando ghes kana întrisailos o Noia ande korabiia. O pai tasadeas e phuv hai distrugisardeas saorăn.
28 Sa kadea si te avel sar sas andăl ghesa le Lotoske: hanas, penas, kinenas, bikinenas, plantonas, zidonas. 29 Dar ando ghes kana înklistos o Lot andai Sodoma, dineas brîșînd iagasa hai pucioasasa anda o ceri hai distrugisardea len saorăn.
30 Sa kadea va avela i ando ghes kana va sikadeola o Ciavo le Manușăsko. 31 Ando ghes kodova, kova savo va avela po akoperiș le kheresko hai va avela les leske lacimata ando kher, ta na del pes tele hai te întril te lel len! Hai kova savo va avela po kîmpo, sa kadea, ta na mai ril pes khere! 32 Na bistren le romnea le Lotoski! 33 Kon va încerkola te hastravel pi viața, va hasarela lan, hai kon va hasarela lan va păstrola lan. 34 Phenav tumenghe kă ande reat kodoia anda dui manuș save va avena andăk pato, iekh va avela lilo, hai koaver va avela muklo. 35 Anda dui giuvlea save măcinina andăk than, iekh va avela lili, hai koiaver va avela mukli.
37 Ăl ucenicea pușle les:
— Kai, Raia?
Hai ov phendea lenghe:
— Kai si o trupo mulo, othe kiden pes ăl vulturi.