15
O Isus si e vița hai ame seam ăl mlădițe
Me sem e vița e ciacii hai muro Dad si kai kerel e buki e rez. Saoră mlădițe kai ni den rodo, ov cinel len, hai saoră mlădițe kai den rodo, ujol len, kaște anen i mai but rodo. Tume sen deja uje andai kauza le vorbenghe kai phendem len tumenghe. Acion andă mande hai me va aciova andă tumende. Nici ăk mlădița ni daștil te anel rodo pestar kana ni aciol ande vița. Sa kadea nici tume ni daștin te anen rodo kana ni acion andă mande. Me sem e vița hai tume sen ăl mlădițe. Kon aciol andă mande hai me andă leste del but roade, kă tume ni daștin te keren khanci bi muro. Kana dakoniva ni aciol andă mande, si ciudino avri sar ăk mlădița, hai va șukeola. Kadal mlădițe kiden len, ciuden len ande iag hai si phabarde. Kana acion andă mande hai mîră sikaiimata acion andă tumende, daștin te manghen orso kamen, hai va kerdeola tumenghe. Hai kadea sikaven kabor dă baro si muro Dad, kana anen but rodo, hai kadea sikaven kă sen mîră ucenicea. Sar iubil man o Dad, kadea iubiv tumen i me. Acion andă mîrî dragostea! 10 Kana înkearen mîră porunci, va aciona andă mîrî dragostea, kadea sar me înkeardem ăl porunci mîră Dadeske hai aciov andă leski dragostea.
11 Phendem tumenghe kadal bukea ka mîrî bukuria te avel andă tumende, hai tume te aven pherde bukuria. 12 Kadaia si mîrî porunka, te iubin tumen iekh avresa, kadea sar me iubiv tumen. 13 Kanikas nai les dragostea mai bari numa te del pi viața anda pe amal. 14 Tume sen mîră amal kana kerena so porunciv tumenghe. 15 Dakanara angle ni mai phenav tumenghe robi, kă o robo ni gianel so kerel lesko stăpîno. Hai phenav tumenghe amal, kă sea so așundem katar muro Dad kerdem tumenghe pringiando. 16 Na tume alosarden man man, hai me alosardem tumen, hai ciutem tumen te gian hai te anen roada, hai tumari roada te aciol, kadea kă o Dad te del tumen orso va manghena andă muro anav. 17 Kadaia porunciv tumenghe: te iubin tume iekh pă aver!
E ura le lumeaki
18 Kana e lumea urol tumen, anen tumenghe goghi kă man urosardea man mai anglal tumendar. 19 Kana afi senas le lumeake, e lumea iubilas tumen sar piren. Dar ni sen le lumeake, hai me alosardem tumen andai lumea, kodolaske e lumea urol tumen. 20 Ta na bistren ăl vorbe kai phendem tumenghe: o robo nai mai baro dă sar peo stăpîno:a Ioan 13:16 kana man kerde man te suferiv, va kerena tumen i tumen. Kana kerdes mîră vorbe, va kerena i tumare. 21 Va kerena tumenghe saoră bukea kadala anda mîrî kauza, kă on ni pringianen les koles kai dinea man drom. 22 Kana ni afi avilemas hai ni afi dinemas lenghe duma, nas doșale bezehăstar. Dar akanak ni daștin te phenen kă ni giangles kă keren bezeh. 23 Kon urol man man, urol i mîră Dades. 24 Kana ni afi kerdemas mașkar lende bukea save konik aver dakoniva ni kerdea len, nas doșale katar o bezeh kadava. Dar akanak kear kă dikhles i man hai i mîră Dades, sa uron amen. 25 Dar kadaia kerdeol kaște kerdon ăl vorbe ramome andă lengo Lil le sikaiimasko: urosarde man bi ciacimasko.b Salmi 35:19; 69:4 26 Dar kana avela o Ajutori, savo me va dava les tumenghe drom katar o Dad, o Duho le ciacimasko, savo avel katar o Dad, ov va phenela o ciacimos anda mande. 27 Hai i tume va phenena o ciacimos anda mande, kă senas dă anglal manța.

a15:20 Ioan 13:16

b15:25 Salmi 35:19; 69:4