11
O Rai phendeasas mai anglal le Moiseaske:
— Va anava înkă ăk urgia po faraono hai po Egipto. Pala kodoia va dela tumaro drom kotar. Dar kana va dela tumaro drom, kear si te gonil tumen dă sea kotar. De duma le poporosa, ka fiosavo manuș te manghel katar peo vecino hai fiosavi giuvli katar pi vecina bukea ruposke hai sumnakaske!
O Rai dineas le poporos miștimos anglal egipteia. I o Moisea sas dikhlo but baro ando Them le Egiptosko, anglal slujitorea le faraonoske hai angla o poporo.
O Moisea mai phendeas le faraonoske:
— Kadea del duma o Rai: «Kam ko mașkar le reakeako si te nakhav anda o Egipto, hai saoră kerde anglal anda o Them le Egiptosko va merena, katar o kerdo anglal le faraonosko, kai beșel po skauno leske thagarimasko, hai i sea angluno kerdo le roabako kai beșel ko bar le asavesko, hai i sea kerde anglal le animalenghe pașa o kher. Andă saoro Them le Egiptosko si te avel bare țipimata, kadea sar ni mai sas hai nai te mai avel. Dar kă saoră israelițea, katar ăl manuș gi kăl animalea pașa o kher, nici ăk giukel ni va bașăla, kaște gianen kă o Rai ni kerel le Israeloske sar kerel le Egiptoske.» Atuncia saoră slujitorea kire si te aven mande, si te bangheon angla mande, hai va phenena: «Telear, tu hai saoro poporo kai gial pala tute!» Pala kodoia va telearava.
Hai o Moisea înklisto katar o faraono, pherdo holi.
O Rai phendeasas le Moiseaske:
— O faraono nai te așunel tumendar, ka mîră minuni te aven but ando Them le Egiptosko.
10 O Moisea hai o Aron kerdes saoră minuni kadala angla o faraono. Dar o Rai kerdeas sar bar o ilo le faraonosko, hai ov ni dineas o drom le israelițengo anda lesko them.