1 Sa kadea i ande Ikonia o Pavel hai o Barnaba întrisailes ande sinagoga le evreenghi hai dines duma, kadea kă foarte but evreea hai i greci pakeaies. 2 Dar ăl evreea save ni kamnes te pakean ațîțosardes le neevreen hai bolde len kontra le phralenghi. 3 Kodolaske beșles but vremea othe hai denas duma bi darako pakeamasa ando Rai, savo sikavelas kă si ciaces so on phenen anda lesko miștimos, ajutindos len te keren semnea hai minuni prin lenghe vast. 4 Ăl manuș anda o foro sas hulade: aver sas le evreența hai aver le apostolența. 5 Dar kana niște neevreea hai niște evreea andăk than pe mai barența kerenas planuri te batjokorin len hai te mudaren len barănța, 6 on aflisardes hai nașles andăl foruri le Likaoniake: ande Listra, ande Derbe hai andăl thana pașa kadala. 7 Othe phenenas e vestea e lacii.

8 Ande Listra beșelas ăk manuș le pîrnența paralizime, ăk ologo andai nașterea, savo ni phirdeasas nici ăk data. 9 Ov beșelas tele hai așunelas le Pavelos kana delas duma. O Pavel dikhleas orta pă leste hai dikhleas kă si les pakeamos te avel sasteardo. 10 Phendeas zurales:

— Uști hai beș orta andă pîrnende!

Ov huklos andă pîrnende hai începosailos te phirel. 11 Kana ăl manuș dikhles so kerdeasas o Pavel, dine mui ande cib likaoneeano:

— Ăl devla liles trupo manușăngo hai aviles amende!

12 Le Barnabaske phenenas Zeus hai le Paveloske Hermes, kăci ov sas kodova savo delas duma mai but. 13 O rașai le Zeusosko, savesko templo sas avri pașa o foro, andineas guruva hai koroane lulugheanghe anglai poarta le foroski andăk than le manușănța kidine, kă kamnos te anel lenghe jertfa. 14 Kana așundes kadai buki, ăl apostolea o Barnaba hai o Pavel cindes pa peste. Nașles ando mașkar le manușăngo hai dines mui:

— 15 Lumeale, soste keren kadala? I ame seam manuș sar tumende. Ame seam kathe kaște anas tumenghe e vestea lacii, kaște bolden tumen katar kadal bukea khancivale ko Del o giuvindo, savo kerdeas o ceri, e phuv, e marea hai sea so si andă lende. 16 Ando timpo kai nakhlos, ov mukleas saoră poporea te phiren pă pe droma. 17 Dar kerdeas bukea lace save te den tumenghe duma anda leste: dinea tumenghe brîșînda anda o ceri hai rekoltea kă lengo timpo, hai pherel tumare ile hamata hai bukuria.

18 Dar kear păce phendes kadal bukea, o Pavel hai o Barnaba phares daștisailes te oprin le manușăn kidine ta na anen lenghe jertfa.

19 Atunci aviles niște evreea andai Antiohia hai Ikonia hai țîrdes le manușăn peste. Ciudes barănța ando Pavel hai tîrîsarde les avri anda o foro, pakeandos kă mulos. 20 Hai kana ăl ucenicea kidineailes pașa leste, o Pavel uștilos hai intrisailos ando foro.

Andă le duiengo ghes o Pavel teleardeas le Barnabasa ke Derbe. 21 Păce phendes e vestea e lacii le manușănghe andă kadav foro hai kerdes but ucenicea, risailes ande Listra, ande Ikonia hai ande Antiohia. 22 Zureardes ăl ile le ucenicenghe hai phenenas lenghe te beșen ando pakeamos:

— Ame trăbul te nakhas anda but pharimata te daștis te intris ando thagarimos le Devlesko.

23 Pala so ciutes prezbiterea andă fiosavi khangheri hai păce rughisailes hai postisardes, dinea len ando vast le Raiesko, andă savo pakeanas.

24 Nakhindos andai Pisidia, aresles ande Pamfilia. 25 Păce phendes o kuvînto ande Perga, gheles ande Atalia. 26 Othar gheles le korabiiasa ke Antiohia, kai e khangheri rughisailisas le Devleske kaște avel les grija lendar andă lesko miștimos, ande buki savi akanak i termenisardesas lan. 27 Păce aresles, kides e khangheri hai phendes lenghe sea so kerdeas o Del lența hai sar putardeas le neevreenghe o udar le pakeamasko. 28 Hai on aciles mai but timpo le ucenicența.