O salmo 139
O Del prinʒanel sǎ so si anθ-o manuś
Karing o maj baro le muzikancenqo. Äk gili le Davidosqi.
1 Raja,
tu rodǎn anθä muro ilo,
haj prinʒanes man,
2 ʒanes kana beśav tele haj kana uśtǎv,
haj dural xakǎres muro gïndo.
3 Miśto dikhes kana phirav haj kana sovav,
haj prinʒanes saorä droma mïrä.
4 Ćaćes,
ʒi kaj te aresel e vorba pä mïrï ćhib,
haj dikh,
Raja,
kä prinʒanes lan anθä sǎ.
5 Tu ïnkonźuris man anglal haj palal,
haj ćhus kǒ vast pä ma.
6 Äk ʒanimos kadalesθar si but minunime anθa manθe,
si kadiki dä baro,
kä ni daśtiv te xakǎrav les.
7 Kaj daśtivas te ʒav kaθar kǒ Duxo?
Kaj daśtivas te naśav tuθar?
8 Te afi uśtǎvas anθ-o ćeri,
tu san othe.
Te afi sovavas anθ-o kher le mulenqo,
ita tu san i othe.
9 Te afi hurǎvas karing o räsärimos,
sau te afi beśavas kä kojaver rig le marjaqi,
10 i othe kǒ vast afi phiravelas man,
kǒ vast o ćaćo afi ïnkǎrelas man.
11 Te afi phenavas:
„Ćaćes o tunjariko va ućharela man,
e lumina anθä muro źuro va kerdola rǎt!”
12 Dar nić o tunjariko naj kalo anθa tuθe,
haj e rǎt strälućil sar o ges.
O tunjariko si sar e lumina anθa tuθe.
13 Käć tu kerdǎn saorä riga kaj si anθä manθe,
tu khubdǎn man anθ-äl pïntećǎ mïrä daqe.
14 Läudiv tut,
kä sem kerdo kadǎ dä ujmime haj minunime!
Minunime si ke bukǎ,
haj muro ilo ʒanel miśto e buki kadaja!
15 Mïrä kokalǎ nas garade tuθar kana semas kerdo anθ-äk than garado.
Kana semas subdo sar anθ-o adïnko le phuǎqo,
16 Ke jakha dikhle man ʒi kaj te kerdǒv.
Anθä kǒ lil sas ramome saorä gesa kaj sas hotärïme anθa manθe,
kana nas nić jekh anθa lenθe.
17 Kabor de kuć si anθa manθe ke gïnduri,
Devlǃa!
Haj kabor dä but si!
18 Te afi ginavas len,
afi sas maj but de sar o kiśaj.
Kana uśtǎv,
sem sa tuça.
19 O,
Devlǃa!
Te mudaresa kolen kaj keren nasul!
Durǒn manθar,
manuś ratesqe,
20 kola kaj phenen bukǎ nasul anθa tuθe!
Ke duśmaja phenen kǒ anav kaśte keren nasul!
21 Ćaćes,
ni urov me,
Raja,
kolen kaj uron tut?
Haj naj manqe skïrba kaθar kola kaj vazden pes ki kontra?
22 Da,
urov len äk urasa anθa saoro ilo muro,
kerdiles mïrä duśmaja.
23 Dikh anθä ma,
Devlǃa,
haj prinʒan muro ilo!
Ćhu ma ke proba haj prinʒan mïrä gïnduri kaj ïnkhǎren man!
24 Dikh kana sem p-äk drom karing o bezex
haj ïngǎr man p-o drom le veśnićaqo!
Această lucrare vă este pusă la dispoziţie prin ashunledevles.eu.org, sub licență Creative Commons Atribuire-Necomercial-FărăModificări 3.0. Puteți copia și redistribui această lucrare în orice format sau prin orice mediu - fără de a modifica conținutul - cu atribuția corespunzătoare și sub aceeași licență. Nu poți folosi această operă în scopuri comerciale.
This version of the recording was created by the copyright owners specially for distribution by ashunledevles.eu.org, under a Creative commons Attribution Non-commercial No Derivitives 3.0 Licence. Do not alter it, do not use it commercially, but do share it please (under the same conditions)