Galateni 2

O Pavelo si dikhlo miśto kaθar kolaver apostolǎ

1 Pala deśuśtar bärś

pale gelem anθ-o Jerusalimo le Barnabaça,

haj lilem mança i le Titos.

2 Gelem othe päće sikadilos manqe o Del.

Maladilem rigaθe kolença

kaj si maj bare anθ-e khangeri,

lenqe sikadem e evangelia

kaj phenav lan avre nǎmurenqe.

Kamavas ka sǎ so kerdem

haj maj kerava,

ta na avel khanćesqi.

3 Nić o Tit kaj sas mança haj si greko

nas ćhutino te ćhinel pes tele.

4 Dar maj sas niśte phral xoxamne

kaj intrisajles ćorjal maśkar amenθe,

haj kamnes te rimon amari libertatja

kaj si amen anθ-o Kristos Isus,

haj te phanden amen.

5 Amen ni muklǎm amen lenqe

nić äk cïra,

ka o ćaćimos le evangelǎqo te aćhol tumenθe.

6 Kabor anθa kola kaj dikhǒn

kä si dajći

– so si on,

anθa manθe si sa jekh,

o Del ni dikhel k-o muj le manuśäsqo

– sar maj phendem,

kola kaj dikhǒn kä si dajći

ni andes khanć anθa sosθe me phendem.

7 Dar on aresles te dikhen

kä manqe sas dini e evangelia

anθa kola kaj naj ćhinde tele,

haj le Petrosqe anθa kola kaj si ćhinde tele.

8 Pentrukä o Del kaj kerdǎs buki anθ-o Petre,

haj kerdǎs les apostolo anθa kola kaj si ćhinde tele,

sa kadǎ kerdǎs buki i anθä manθe,

haj dinǎs man drom

kolenθe kaj si anθa aver nǎmurh.

9 Kana o Jakov,

o Kifa haj o Joan,

kaj si prinʒande

kä ïnkǎren e buki le Devlesqi,

prinʒandes o miśtimos kaj sas manqe dino,

dines vast mança haj le Barnabaça,

kadǎ sikades amenqe

kä on si amença anθ-e buki:

ame te ʒas

kolenθe kaj si anθa aver nǎmurh,

haj on kolenθe kaj si ćhinde tele.

10 Mangles numa äk buki:

te anas amenqe gogi k-äl ćorä,

buki kaj kamnem lan but te kerav.

O Pavel xolǎol p-o Petre

11 Dar kana avilos o Kifa anθ-e Antiohia,

angla lesθe semas lesqi kontra,

kä sas dośalo.

12 Ʒi kana te avel niśte manuś

dine drom kaθar o Jakov,

ov xalas anθ-äk than kolença

kaj sas anθa aver nǎmurh.

Dar kana on aviles,

ov dinǎs pes rigaθe

haj ni maj xalǎs lença,

kä darajlos kaθar äl manuś kadala,

kaj sas ćhinde tele.

13 Leça anθ-äk than

i kolaver evrea kerdes sar lesθe,

kadǎ kä i o Barnaba sas astardo

anθä lenqo trajo xoxamno.

14 Kana dikhlem kä ni train

sar träbul pala o ćaćimos le evangelǎqo,

phendem le Kifasqe angla sǎ:

„Kana tu kaj san evreo,

trais sar jekh anθa aver nǎmurh,

haj na sar äk evreo,

sar daśtis te ćhus avre manuśän

kaj si anθa aver nǎmurh

te train sar evrea?

15 Ame kaj sǎm evrea anθa amari deǎ,

haj ni sǎm sar aver nǎmurh,

kaj ni ʒanen e Kris le evreenqi,

16 ʒanas kä o Del ni phenel anθa-l manuś kä si ćaće

kana keren so phenel e Kris,

dar numa kä o Isus Kristos si pakjamasqo.

Haj i ame pakǎjam anθ-o Isus Kristos,

ka o Del te phenel kä sǎm ćaće,

pentrukä o Kristos si pakjamasqo,

haj na pentrukä keras so phenel e Kris.

Kä o Del ni phenel anθa koniva kä si ćaćo

kana kerel so phenel e Kris.

17 Kana kamas ka o Del te phenel

kä ame sǎm ćaće anθ-o Kristos,

haj aver dakoniva phenen kä sǎm bezexale,

kä ni maj keras so phenel e Kris,

atunć o Kristos kerel amen bezexale?

Naj ćaćes.

18 Rimosardem o pakjamos anθ-äl bukǎ le Krisaqe.

Kana laćharava les,

sikavav man kä sem bezexalo.

19 Kä e Kris mudardǎs man.

Man naj man khanć laça,

te avav ʒuvindo anθa o Del.

20 Semas rästignime anθ-äk than le Kristosoça,

haj me ni maj sem ʒuvindo,

dar o Kristos si ʒuvindo anθä manθe

haj mïrï viaca kaj me traiv lan anθ-o trupo,

traiv lan anθ-o pakjamos

anθ-o Ćhavo le Devlesqo,

savo jubisardǎs man

haj dinǎs pes anθa manθe.

21 Me ni durǎrav o miśtimos le Devlesqo:

kana e Kris kerel amen ćaće,

atunć deʒjaba mulos o Kristos.”