Geneza 38

O Iuda hai e Tamar

1 Ande vremea codoia,

o Iuda teleardeas catar pe phral

hai oprisailos anda peo drom

hai acilos că ăc manuș anda o Adulam,

cai buciolas Hira.

2 Othe,

o Iuda dichleas le ceia le Șuaschi,

ăc canaanițoeschi;

lilea la dă romni hai sutos lasa.

3 Oi acilis chamni

hai cherdeas ăc ciavo,

savesche ov ciuteas o anav Er.

4 Pale acilis chamni

hai cherdeas ăc ciavo

savesche oi ciuteas o anav Onan.

5 Pale cherdea ăc ciavo,

savesche oi ciuteas o anav Șela.

Cherdea les ando Chezib.

6 O Iuda lilea pe ciavesche le anglunosche le Erosche

ăc romni po anav Tamar.

7 O Er,

ciavo angluno le Iudasco,

sas nasul angla o Rai,

hai o Rai mudardea les.

8 Atunci o Iuda phendeas le Onanosche:

— Gia che romni che phraleschi

te avel les ciave che phrales!^a

9 O Onan,

giandos că o ciavo cadava

nai te avel lesco,

ciorelas pi sămînța pe phuv

cabor drom sovelas le romneasa pe phraleschi,

ta na del ciave pe phrales.

10 So cherelas ov sas nasul angla o Rai,

hai i les mudardea les.

11 Atuncia o Iuda phendea pe boreache le Tamarache:

— Acio phivli ando cher che dadesco

gi cana va bareola muro ciavo o Șela!

Că ov gîndisailo că i o Șela

si te merel sar lesche phral.

E Tamar ghelis hai beșlis ando cher pe dadesco.

12 Nachlos but timpo

hai e cei le Șuaschi,

e romni le Iudaschi,

mulis.

Pala so nachles ăl ghesa le jaleache,

o Iuda uștilos che Timna,

colende cai tunzilas le brachean hai le buznean,

ov hai lesco amal,

o Hira anda o Adulam.

13 Phendineailos le Tamarache:

— Dich,

cheo socro uștel che Timna,

caște tunzil le brachean hai le buznean.

14 Atuncia oi ciudeas pe țoale le phivlimasche,

uciardilis ăc bazmavasa hai hureadilis,

hai beșlis che poarta le Enaiimoschi

cai si po drom caring e Timna;

că dichleas că o Șela cherdilos baro,

hai oi ni sas lesche dini dă romni.

15 O Iuda dichlea lan hai gîndisailo

că si ăc curva,

că uciardeas peo mui.

16 Oprisailo late anda peo drom

hai phendeas:

— Muc man te sovav tusa!

Că ni pringiandea lan

că sas leschi bori.

Oi phendeas:

— So des man te soves manța?

—

17 Si te dav tuche drom ăc iedo anda muro cîrdo.

— Numa cana muchesa manghe gajo

gi cana des les drom.

—

18 So gajo te dav tut?

— Cheo sigilo pe doreasa

hai e rovli cai si tut ando vast.

Ov dinea len lache.

Pala codoia sutos lasa,

hai oi acilis chamni lestar.

19 Oi uștilis hai teleardeas.

Ciudeas e bazmava

hai hureadilis pale andăl țoale le phivlimasche.

20 O Iuda dineas drom le iedos

pă peo amal anda o Adulam,

caște încalavel o gajo andal vast le romneache.

Dar ov ni arachlea lan.

21 Pușleas le manușăn le thanesche:

— Cai si e curva cai beșelas cate co Enaim,

po drom?

On dine les anglal:

— Nas nici ăc curva cate.

22 Ov boldineailos co Iuda hai phendea lesche:

— Ni arachlem lan,

hai ăl manuș le thanesche phendes:

‘Nas nici ăc curva cate.’

23 O Iuda phendeas:

— Te închearel so lileas,

numa ta na cherdeos lagiavesche.

Dich,

dinem drom o iedo cadava,

hai ni arachlean lan.

24 Cam pala trin cion phendilos le Iudasche:

— E Tamar,

chi bori curvisardeas hai dich,

acili chamni păce curvisardeas.

Hai o Iuda phendeas:

— Încalaven lan avri te avel phabardi!

25 Cana înghearenas lan,

oi dinea drom te phenen lache socrosche:

— Catar o manuș

casche si ăl buchea cadala,

acilem me chamni.

Dich,

rughiv tut,

casco si o sigilo cadava,

e dori cadaia hai caia rovli?

26 O Iuda pringiandea len hai phendeas:

— Si mai ciacii dă sar mande,

că ni dinem la dă romni

mîră ciavesche le Șelasche.

Dă atunci ni mai sutos lasa.

27 Cana avilis e vremea te cherel,

dich,

andă laco păr sas dui ciave.

28 Ando timpo le cherimasco,

iech încaladeas o vast anglal.

E moașa lilea lesco vast

hai phanglea les ăc thavesa lolo,

phenindos:

— Cadava înclistos anglal.

29 Dar cana ov țîrdelas o vast palpale,

înclisto lesco phral.

Atunci e moașa phendeas:

— So pharaiimos cherdean!

Codolasche lesco anav sas ciutino Pereț.^b

30 Palal înclisto lesco phral,

saves sas les o thav lolo co vast,

hai lesco anav sas ciutino Zerah.