Ăl palune vorbe le Iakovoske pe ciavența
49
1 O Iakov dinea mui pe ciaven hai phendeas:
— Kiden tumen hai si te phenav tumenghe
so si te kerdeol tumenghe andăl ghesa
kai si te aven!
2 Kiden tumen hai așunen,
ăl ciave le Iakovoske!
Așunen tumare dades,
le Israelos!
3 Tu Ruben,
muro ciavo kerdo angluno,
mîrî vlaga
hai e roada e angluni
mîră zuralimaski,
o angluno ande mîndria
hai o angluno ando zuralimos,
4 Ciordos sar ăl paia
— tu nai te mai aves o angluno!
Kăci uștilean ando pato ke dadesko
hai mahrisardean les.
Uștilos andă muro pato!
5 O Simeon hai o Levi si phral.
Lenghe ciurea keren nasul.
6 Muro sufleto,
na kide tut kă lengo sfato!
Muro ilo,
na kide tut lența!
Kă andă lengo holearimos mudardes manuș,
hai kă placiuia len
cindes ăl vine le guruvenghe.
7 Dino armaia te avel lengo holearimos,
kă si zuralo,
hai lenghi holi,
kă si bi paki.
Si te hulavav len ando Iakov
hai si te durearav len iekh avrestar
ando Israel.
8 Iuda,
si te aves lăudime katar ke phral,
kă si te mares ke dușmaen.
Ăl ciave ke dadeske si te bangheon angla tute.
9 O Iuda si iekh puio leeosko.
Boldineailean katar o mudarimos,
muro ciavo!
Banghearel pe kocia,
sovel sar ăk leeo.
Kon si te vazdel ăk leeo kai sovel?
10 E rovli le zuralimaski
nai te dureol anda o Iuda,
nici e rovli le thagareski
mașkar leske pîrne,
gi kana si te avel kodova
kaski si e rovli,
hai lestar si te așunen ăl poporea.
11 O Iuda phandel pe hăres ke vița,
hai katar e mai lacii vița
le puios pe hărneako.
Thovel pi haina ande mol
hai pi mantaua ando rat le drakhako.
12 Leske iakha si lole katar e mol
hai leske dand parne katar o thud.
13 O Zabulon va beșela pașa o baro pai.
Ăl korăbii va țîrdena pes othe,
hai lesko than si te întinzol pes karing o Sidon.
14 O Isahar si ăk hăr zuralo
kai sovel po islazo.a
15 Dikhleas kă si ăk than lacio odihnimasko
hai kă e phuv si lacii,
kadea kă banghearel peo dumo tala o pharimos
hai va kerela buki sar ăk robo.
16 O Dan va krisila pe poporos
sar iekh andal neamuri le Israeloske.
17 O Dan si te avel ăk sap po drom,
ăk vipera pe poteka,
dandarel o pîrno le grastesko
hai kerel te perel pă zeiande
o manuș poa grast.
18 Ajukearav te hastras man,
Raia!
19 Po Gado si te aven but manuș ciureanța,
dar ov si te lel pes pala lende.
20 O hamos le Așerosko si te avel lacio:
hai ov si te del hamata gugle le thagaren.
21 O Neftali si ăk cerboaika slobodo.
Ov phenel vorbe șukar.
22 O Iosif si ăk hăr sălbatiko,
ăk hăr sălbatiko pașa ăk izvoro paiesa,
ăk kuro sălbatiko po plai.b
23 Ăl dușmaia kerkearde les,
ciudes săgeți urasa.
24 Dar lesko arko acilo zuralo,
hai ov sas kerdo te hakearel le vastența
katar ăl vast le Zuraleske le Iakovosko.
Kadea kerdilos ov o păstori
hai o bar le Israeloskoc
25 katar o Del ke dadesko
savo va ajutila tut,
katar kova o Mai Zuralo
savo si te binekuvintil tut
khamesa hai brîșîndesa opral
hai paiesa andal izvorea telal,
hai i le binekuvintimasa le ciuciango
hai i le pîntekosko.
26 Ăl binekuvintimata ke dadeske
si mai bare dă sar ăl binekuvintimata
le plaienghe veșnikod
hai i o lacimos le plaiengo
kai si dă kana si e lumea:
on te aven po șăro le Iosifosko,
opre po șăro le raiesko pe phralengo.
27 O Beniamin si ăk ruv kai mudarel
hai kerel kotora.
De tehara hal so astardeas,
hai e reat hulavel so lileas katar ăl dușmaia.
28 Kadala si sea ăl deșudui neamuri le Israeloske,
hai kadea dinea lenghe duma lengo dad
kana binekuvintisardea len.
Binekuvintisardeas fiosaves pe binekuvîntareasa.
O merimos le Iakovosko
29 Pala kodoia dinea len e porunka kadaia:
— Me si te avav ciutino ando rîndo mîră phurengo.
Te prahon man andăk than mîră phurența,
ande peștera kai si ando islazo le Efronosko o hetito,
30 ande peștera kai si ando islazo Makpela
kai si iekh angla avreste le Mamresa,
ando Them Kanaan,
savi kindea lan o Avraam le islazosa
katar o hetito Efron
ka than anda o prahomaste.
31 Othe prahosardes le Avraamos hai le Sara,
leski romni,
othe prahosardes le Isakos hai le Rebeka,
leski romni,
hai othe prahosardem i me le Leea.
32 O islazo hai e peștera kai si othe
sas kinde katar ăl ciave le Hetoske.
33 Kana termenisardeas o Iakov te del porunci pe ciaven,
țîrdeas pe pîrne ando pato,
dinea peo duho
hai nakhlos ando rîndo pe phurengo.
Această lucrare vă este pusă la dispoziţie prin ashunledevles.eu.org, sub licență Creative Commons Atribuire-Necomercial-FărăModificări 3.0. Puteți copia și redistribui această lucrare în orice format sau prin orice mediu - fără de a modifica conținutul - cu atribuția corespunzătoare și sub aceeași licență. Nu poți folosi această operă în scopuri comerciale.
This version of the recording was created by the copyright owners specially for distribution by ashunledevles.eu.org, under a Creative commons Attribution Non-commercial No Derivitives 3.0 Licence. Do not alter it, do not use it commercially, but do share it please (under the same conditions)