O Del del o them o Kanaan le Israelosqe
(O Josua 1:1—10:15; 11:16-23; 24)
1
O Raj sikavel le Josuas te avel zuralo
Pala o merimos le Mojsǎsqo, o robo le Rajesqo, o Raj phendǎs le Josuasqe le Nunosqo, o sluźitori le Mojsǎsqo:
O Mojse, muro robo, mulos. Akanak, pregätisao te nakhes o Jordano kadava, tu haj saoro poporo kadava, anθ-o them savo dav les lenqe, le israelicenqe! Orso than savo va uśtjaela e talpa tumare pïrnesqi, tumenqe dinem les, sar phendem le Mojsǎsqe. E rig tumare themosqi si te avel kaθar e mulani haj kaθar o Libano ʒi k-o paj o baro, o Eufrato – saoro them le heticenqo – haj ʒi k-o Baro Paj, karing perel o kham. Koniva ni va daśtila te beśel ki kontra, so va traisa. Kadǎ sar semas le Mojsǎça, si te avav tusa; naj te mukav tut, naj te telǎrav tuθar. Av zuralo haj bi daraqo, kä tu va keresa kadal poporos te len o them te avel lenqo, anθa savo xalem sovel lenqe dadenqe kä va dava les lenqe. Numa av zuralo haj but bi daraqo, te keres griźaça pala saoro sikaimos savo porunćisardǎs les tuqe o Mojse, muro robo! Na de tut rigaθe lesθar, nić ke ćaći, nić ke stïngo, kaśte ʒal tuqe miśto orkaj va ʒasa! Ta na durǒl kaθar kǒ muj kadav lil sikaimasqo! Gïndisao lesθe i o ges haj e rǎt, te keres griźaça sǎ so si ramome anθä leste; kä atunć va räuśiça anθä kǒ drom haj atunć si te ʒal tuqe miśto. Naj kadǎ kä porunćisardem tuqe: «Av zuralo haj bi daraqo»? Na izdra haj na xasao, kä o Raj, kǒ Del si tuça orkaj va ʒasa!
O poporo aśunel kaθar o Josua sar kaθar o Mojsǎ
10 O Josua porunćisardǎs le bulibaśänqe le poporosqe:
11 Nakhen anθa-i tabära haj porunćin le poporosqe: «Keren tumenqe xamos dromesqo, kä pa trin ges va nakhena o Jordano kaśte ʒan te len anθa tumenθe o them savo o Raj, tumaro Del del les tumenqe te len les anθa tumenθe.»
12 O Josua phendǎs le rubenicenqe, le gadicenqe haj le epaśaqe anθa o nǎmo Manase:
13 Anen tumenqe gogi e buki savi porunćisardǎ lan tumenqe o Mojse, o robo le Rajesqo: «O Raj, tumaro Del, del tumen odihna haj si te del tumen o them kadava.» 14 Tumare rromnǎ, tumare ćhave äl cïjne haj tumare animalǎ va aćhona anθ-o them savo dinǎ les tumenqe o Mojsǎ ordalθar o Jordano. Dar tume saorä manuś zurale kaj ʒanen te mardǒn miśto, te nakhen anglal anθ-äl rïnduri le marimasqe. Haj kadǎ si te aźutin tumare phralen, 15 ʒi kana o Raj va dela len i len odihna sar i tumen, haj ʒi kana va lena anθa lenθe o them savo del les lenqe o Raj, tumaro Del. Pala kodoja rin tumen anθä tumaro them, haj si te avel tumaro, o them savo dinǎ les tumenqe o Mojsǎ, o robo le Rajesqo, ordalθar o Jordano, kaθar ïnklel o kham.
16 On dines anglal le Josuas:
— Ćaćes si te keras sǎ so porunćisardǎn amenqe haj si te ʒas orkaj va desa amen drom. 17 Si te aśunas tuθar, sar aśundǎm anθä sǎ kaθar o Mojse. Numa o Raj, kǒ Del, te avel tuça, sar sas le Mojsǎça! 18 Orso manuś savo va uśtela kontra anθa sosθe phenes haj savo ni va aśunela kaθar ke vorbe, sǎ so porunćis lesqe, si te avel mudardo! Numa av zuralo haj bi daraqo!