15
O Isus si e vica haj ame sǎm äl mlädice
Me sem e vica e ćaći haj muro Dad si kaj kerel e buki e rez. Saorä mlädice kaj ni den rodo, ov ćhinel len, haj saorä mlädice kaj den rodo, uźol len, kaśte anen i maj but rodo. Tume sen deźa uźe anθa-i kauza le vorbenqe kaj phendem len tumenqe. Aćhon anθä manθe haj me va aćhova anθä tumenθe. Nić äk mlädica ni daśtil te anel rodo pesθar kana ni aćhol anθ-e vica. Sa kadǎ nić tume ni daśtin te anen rodo kana ni aćhon anθä manθe. Me sem e vica haj tume sen äl mlädice. Kon aćhol anθä manθe haj me anθä lesθe del but roade, kä tume ni daśtin te keren khanć bi muro. Kana dakoniva ni aćhol anθä manθe, si ćhudino avri sar äk mlädica, haj va śukǒla. Kadal mlädice kiden len, ćhuden len anθ-e jag haj si phabarde. Kana aćhon anθä manθe haj mïrä sikaimata aćhon anθä tumenθe, daśtin te mangen orso kamen, haj va kerdǒla tumenqe. Haj kadǎ sikaven kabor dä baro si muro Dad, kana anen but rodo, haj kadǎ sikaven kä sen mïrä ućenićǎ. Sar jubil man o Dad, kadǎ jubiv tumen i me. Aćhon anθä mïrï dragostja! 10 Kana ïnkǎren mïrä porunć, va aćhona anθä mïrï dragostja, kadǎ sar me ïnkǎrdem äl porunć mïrä Dadesqe haj aćhov anθä lesqi dragostja.
11 Phendem tumenqe kadal bukǎ ka mïrï bukuria te avel anθä tumenθe, haj tume te aven pherde bukuria. 12 Kadaja si mïrï porunka, te jubin tumen jekh pä aver, kadǎ sar me jubiv tumen. 13 Kanikas naj les dragostja maj bari numa te del pi viaca anθa pe amal. 14 Tume sen mïrä amal kana kerena so porunćiv tumenqe. 15 Dakanara angle ni maj phenav tumenqe robi, kä o robo ni ʒanel so kerel lesqo stäpïno. Haj phenav tumenqe amal, kä sǎ so aśundem kaθar muro Dad kerdem tumenqe prinʒando. 16 Na tume alosarden man man, haj me alosardem tumen, haj ćhutem tumen te ʒan haj te anen roada, haj tumari roada te aćhol, kadǎ kä o Dad te del tumen orso va mangena anθä muro anav. 17 Kadaja porunćiv tumenqe: te jubin tume jekh pä aver!
E ura le lumǎqi
18 Kana e lumja urol tumen, anen tumenqe gogi kä man urosardǎ man maj anglal tumenθar. 19 Kana afi senas le lumǎqe, e lumja jubilas tumen sar piren. Dar ni sen le lumǎqe, haj me alosardem tumen anθa-i lumja, kodolasqe e lumja urol tumen. 20 Ta na bistren äl vorbe kaj phendem tumenqe: o robo naj maj baro dä sar pǒ stäpïno:a Joan 13:16 kana man kerde man te suferiv, va kerena tumen i tumen. Kana kerdes mïrä vorbe, va kerena i tumare. 21 Va kerena tumenqe saorä bukǎ kadala anθa mïrï kauza, kä on ni prinʒanen les koles kaj dinǎ man drom. 22 Kana ni afi avilemas haj ni afi dinemas lenqe duma, nas dośale bezexäsθar. Dar akanak ni daśtin te phenen kä ni ʒangles kä keren bezex. 23 Kon urol man man, urol i mïrä Dades. 24 Kana ni afi kerdemas maśkar lenθe bukǎ save konik aver dakoniva ni kerdǎ len, nas dośale kaθar o bezex kadava. Dar akanak kjar kä dikhles i man haj i mïrä Dades, sa uron amen. 25 Dar kadaja kerdǒl kaśte kerdon äl vorbe ramome anθä lenqo Lil le sikaimasqo: urosarde man bi ćaćimasqo.b Salmi 35:19; 69:4 26 Dar kana avela o Aźutori, savo me va dava les tumenqe drom kaθar o Dad, o Duxo le ćaćimasqo, savo avel kaθar o Dad, ov va phenela o ćaćimos anθa manθe. 27 Haj i tume va phenena o ćaćimos anθa manθe, kä senas dä anglal mança.

a15:20 Joan 13:16

b15:25 Salmi 35:19; 69:4