17
O phanglimos maśkar o Del haj o Avraam
Kana le Avramos sas les ïnǎdeśa haj ïnǎ bärś, o Raj sikadilos lesqe haj phendǎs:
— Me sem o Del o Maj Zuralo, phir angla manθe bi dośaqo! Haj si te kerav äk phanglimos maśkar manθe haj maśkar tuθe, haj si te butǎrav tut but maj but.
O Avram ćhudǎ pes le moça pe phuv.
O Del dǎ lesqe duma kadǎ:
Dikh muro phanglimos kaj kerav les tuça: Si te aves o dad bute nǎmurenqo. Naj te maj bućhos Avram, haj si te bućhos Avraam, kä kerdem tut te aves o dad bute nǎmurenqo. Si te dav tut but ćhave pala tuθe, si te kerav anθa tuθe but nǎmuri, haj anθa tuθe va ïnklena thagara. Si te ïnkǎrav muro phanglimos maśkar manθe haj maśkar tuθe haj ke ćhave kaj aven pala tuθe, anθ-äk nǎmo anθä aver nǎmo. Kadava si te avel äk phanglimos veśniko, kaśte avav kiro Del haj ke ćhavenqo kaj aven pala tuθe. Tuqe haj ke ćhavenqe pala tuθe si te dav o them kaj beśes akanak sar sträiino, saorä Them Kanaan te avel tumaro veśniko, haj me si te avav lenqo Del.
Haj o Del maj phendǎs le Avraamosqe:
— Te ïnkǎres muro phanglimos, tu haj ke ćhave pala tuθe anθ-äk nǎmo anθä aver nǎmo! 10 Kadava si muro phanglimos kaj te ïnkǎren les maśkar manθe haj tumenθe haj kire ćhave kaj aven pala tuθe: sǎ so si rig murśani maśkar tumenθe te aven ćhinde tele.* Ćhinde tele = ćirkumćizime 11 Te aven ćhinde anθ-o mas tele, haj kodova te avel o semno le phanglimasqo maśkar manθe haj tumenθe! 12 K-o phurimos le oxto gesenqo, o ćhavo de rig murśani anθa tumenθe te avel ćhindo tele anθ-äk nǎmo anθä aver nǎmo, i kä si robo biando anθ-o kher, i kaj si kindo lovença kaθar äk sträiino kaj naj anθa kiro nǎmo! 13 Si musaj te avel ćhindo tele kadikita o robo biando anθ-o kher, kabor kova kindo pä lovenθe. Haj kadǎ muro phanglimos te avel zurǎrdo anθä tumaro mas, sar äk phanglimos veśniko. 14 Äk murś kaj naj ćhindo anθ-o mas tele te avel durǎrdo anθa o maśkar pe nǎmosqo! Uśtǎdǎs muro phanglimos.
15 O Del phendǎs le Avraamosqe:
— Te na maj xakǎres ke rromnǎ Saraj, kä laqo anav si te avel Sara! 16 Me si te binekuvintiv lan, si te dav tut äk ćhavo anθa laθe, haj si te binekuvintiv lan, haj oj si te avel e dej bute nǎmurenqi. I thagara poporenqe si te ïnklen anθa laθe.
17 O Avraam ćhudǎ pes le moça ke phuv, haj asaja anθä pǒ ilo haj phendǎs:
— Te maj biandol äk ćhavo manuśäsqe äk śälaqo bärś? Maj daśtil te bianel e Sara k-äl ïnǎdeśa bärś?
18 Haj phendǎs le Devlesqe:
— Te ʒuvindil o Ismael angla tuθe!
19 O Del phendǎ lesqe:
— Ćaćimaça ki rromni e Sara si te bianel tuqe äk ćhavo haj si te ćhus lesqo anav Isak. Me si te ïnkǎrav muro phanglimos leça sar äk phanglimos veśniko, anθä lesqe ćhave pala lesθe. 20 I anθa o Ismael aśundem tut, binekuvintiv les, si te kerav te avel les but ćhave, si te butǎrav les but maj but. Si te avel o dad deśudujenqo thagara. Si te avel äk nǎmo baro. 21 Dar muro phanglimos si te ïnkǎrav les le Isakoça, savo si te bianel les e Sara ʒi bärśä ke vremja kadaja.
22 Pala so dinǎs duma leça, o Del vazdinǎjlos kaθar o Avraam. 23 O Avraam lilǎs pe ćhaves le Ismaelos, haj saorän kaj biandile anθä lesqo kher haj saorä robi kaj sas kinde pä lovenθe, sǎ so sas murś anθ-o kher le Avraamosqo, haj anθä kodova ges ćhindǎ len anθä lenqo mas tele, kadǎ sar porunćisardǎ lesqe o Del. 24 Le Avraamos sas les ïnǎdeśa haj ïnǎ bärś kana sas ćhindo anθä piro mas tele. 25 Haj lesqe ćhaves le Ismaelos sas les deśutrin bärś kana sas ćhindo anθä piro mas tele. 26 O Avraam haj pǒ ćhavo o Ismael sas ćhinde tele kjar anθ-o ges kodova. 27 Haj saorä manuśa anθa lesqo kher, robi biande anθä lesqo kher sau kinde pä lovenθe kaθar äl sträiinja, on sas ćhinde tele anθ-äk than leça.

*17:10 Ćhinde tele = ćirkumćizime