Äl israelicǎ telǎren anθa o Eʒipto
12
(O ïnklistimos 12:1—13:16)
O Raj phendǎs le Mojsǎsqe haj le Aronosqe so te keren ke Patragi
O Raj phendǎs le Mojsǎsqe haj le Aronosqe anθ-o Them le Eʒiptosqo:
O ćhon kadava si te avel anθa tumenθe o ćhon o angluno, o angluno ćhon anθa o bärś si te avel anθa tumenθe. Phenen saorä poporosqe le Israelosqo: «Anθä le deśenqo ges anθa o ćhon kadava, fiosavo manuś te lel äk mielo sau äk jedo anθa pi famelia, äk mielo anθa fiosavo kher! Kana si prea cïra anθ-o kher anθa-k mielo, te lel les pe većinoça o maj paśardo, pala o numäro le manuśänqo! Dikhen kabor daśtil te xal fiosavo anθa o mielo kodova! Te len anθa tumenθe äk mielo sau äk jedo, te avel laćho, te avel anθa-i rig murśani haj äk bärśäsqo! Ïnkǎren les ʒi anθ-o ges le deśuśtarenqo o ćhon kadava, haj saorä manuś anθa o Israel te ćhinen les kana perel o kham! Te len anθa lesqo rat haj te makhen äl duj stïlpi le udaresqe haj o prago opral le kheresqo kaj va xana les! O mas te xan les anθ-e rǎt kodoja, peko pe jag, haj te xan les marneça bi dospime haj zelenimatença kerke. Na xan les bi peko sau kirado anθä pajesθe, numa peko ke jag ïntrego: le śäreça, le pïrnença haj le märuntajença! 10 Na muken khanć anθa lesθe ʒi detexara! So va aćhola anθa lesθe pä detexara, phabaren les anθ-e jag! 11 Kana xan les, te aven gata hurǎde te telǎren, äl pogimata anθ-äl pïrne haj e rovli anθ-o vast, haj xan les sigo: Si e Patragi le Rajesqi!
12 Anθ-e rǎt kodoja va nakhava anθa o Them le Eʒiptosqo haj va dava dab saorä anglune kerde anθ-o Them le Eʒiptosqo, kaθar äl manuś ʒi k-äl animalǎ paśa o kher. Va kerava kris kontra saorä devlenqi le Eʒiptosqe: me sem o Raj. 13 O rat si te avel o semno p-äl khera kaj sen. Va dikhava o rat haj si te nakhav paśa tumenθe, kadǎ kä naj te kerdǒl tumenqe nić äk rimomos, kana va dava dab o Them le Eʒiptosqo.
E särbätoarja le azimenqi
14 Ta na bistren o ges kadava, särbätorin les anθ-e ćinstja le Rajesqi! Te avel äk kris veśniko kaśte särbätorin lan anθa-k nǎmo anθä aver nǎmo! 15 Timpo jefta gesenqo träbul te xan marno bi dospime. Anθ-o ges o angluno träbul te ćhuden e droźdia anθa tumare khera, kä orkon va xala marno dospime anθä kodola jefta gesa, te avel durǎrdo anθa o maśkar le Israelosqe! 16 Anθ-o ges o angluno kiden tumen haj te avel tumen äk särbätoarja sfïnto, haj i anθä le jeftanqo ges kiden tumen haj te avel tumen äk särbätoarja sfïnto. Anθ-äl gesa kodola na keren nić äk buki, numa te keren xamos fiosavesqe!
17 Ïnkǎren e särbätoarja le azimenqi, kä anθ-o ges kodova ïnkaladem tumare ośti anθa o Them le Eʒiptosqo! Ïnkǎren o ges kodova sar äk kris veśniko anθa-k nǎmo anθä aver nǎmo! 18 Anθ-o ćhon o angluno, anθä le deśuśtarenqo ges le ćhonesqo, e rǎt, xan marno bi dospime, ʒi anθ-e rǎt le gesesqi biśtajekh le ćhonesqo! 19 Timpo jefta gesenqo ta na arakhadǒl droźdia anθä tumare khera, kä orkon va xala marno dospime te avel durǎrdo anθa o maśkar le poporosqo le Israelosqo, kä si sträiino, kä si israelito. 20 Na xan khanć dospime! Orkaj beśena, xan marno bi dospime!»
E Patragi
21 O Mojsǎ dinǎ muj saorä phuren le Israelosqe haj phendǎ lenqe:
— Ʒan te len äk mielo sau äk jedo anθa tumare fameli, haj ćhinen les anθa-i Patragi! 22 Len äk legätura isoposqi, kingǎren lan anθ-o rat anθa o kastrono haj makhen o prago opral haj äl duj stïlpi le udaresqe le rateça anθa o vaso! Koniva anθa tumenθe ta na ïnklel anθa o kher ʒi detexara! 23 O Raj va nakhela kaśte del dab o Eʒipto, haj kana va dikhela o rat p-o prago opral haj p-äl duj stïlpi le udaresqe, va nakhela paśa o udar haj ni mukel koles kaj mudarel te ʒal anθä tumare khera kaśte del tumen dab.
24 Ïnkǎren e buki kadaja sar äk krisimos anθa tuθe haj anθa ke ćhave veśniko! 25 Kana va ïntrina anθ-o them savo va dela les tumenqe o Raj, sar phendǎs, ïnkǎren kadav obićej! 26 Haj kana va pućena tumen tumare ćhave: «So si o obićej kadava anθa tumenθe?» 27 Den len anglal: «Si e sfïnto sinia le Patragǎqi anθ-e ćinstja le Rajesqi, pentrukä nakhlos paśa äl khera le israelicenqe anθ-o Eʒipto, kana dinǎs dab o Eʒipto, haj xastradǎs amare khera.»
O poporo dine koća haj ïnkinosajlos. 28 Äl israelicǎ telǎrdes haj kerdes kadǎ sar phendǎsas o Raj le Mojsǎsqe haj le Aronosqe.
29 K-o maśkar le reakjaqo, o Raj dinǎs dab saorän kerde anglal anθa o Them le Eʒiptosqo, kaθar o angluno kerdo le faraonosqo, savo beśel p-o skauno le thagaresqo, ʒi k-o angluno kerdo kolesqo kaj si phandado, haj sǎ kerde anglal le animalenqe paśa o kher. 30 O faraono uśtilos e rǎt, ov haj saorä sluźitorǎ lesqe, haj saorä eʒipteǎ, haj sas bare cipimata anθ-o Eʒipto, kä ni sas kher ta na avel äk mulo. 31 Anθ-e rǎt kodoja o faraono dinǎs muj le Mojsǎs haj le Aronos haj phendǎ lenqe:
— Uśten, ïnklen anθa o maśkar mïrä poporosqo, tume haj äl israelicǎ! Ʒan te sluźin le Rajesqe, sar phenden! 32 Len i tumare brakhǎn, tumare buznǎn haj tumare guruven, sar phenden! Ʒan haj binekuvintin man i man!
33 Äl eʒipteǎ zorinas le poporos te telǎren sigo anθa o them, kä phenenas: „Sǎ si te meras!” 34 O poporo lilǎs o aluato anglal ʒi kaj te ćhul droźdia anθä lesθe. Ućhardes pe bäläi anθ-äl hajne haj ćhute len p-äl dume. 35 Äl israelicǎ kerdesas so phendǎsas o Mojsǎ haj manglesas le eʒipteěnqe bukǎ ruposqe haj sumnakasqe haj coale. 36 O Raj kerdǎsas ka äl eʒipteǎ te dikhen miśto le poporos, haj dine len so mangles. Kadǎ kä nangǎrdes le eʒipteěn.
Äl israelicǎ telǎren anθa o Eʒipto
37 Äl israelicǎ telǎrdes anθa o Ramses karing o Sukot. Sas paśä śov śäla mi murś kaj ʒanas telal, bi le ćhavenqo haj le rromnǎnqo. 38 But manuś anθa aver naci geles lença, haj brakhǎ, buznǎ haj guruva, but maj but animalǎ. 39 Anθa o aluato, kaj lilesas les anθa o Eʒipto, pekles marno bi dospime, kä ïnkä ni dospisajlosas, kä sas gonime kaθar äl eʒipteǎ. Ni daśtisajles te maj beśen, nić xamos ni kerdes anθa pesθe. 40 Äl israelicǎ beśles anθ-o Eʒipto śtar śäla haj trǎnda bärś. 41 Kana kerdiles śtar śäla haj trǎnda bärś, anθ-o ges kodova, saorä ośti le Rajesqe ïnkliste anθa o Them le Eʒiptosqo. 42 E rǎt kodoja le Rajes sas les griźa lenθar, kaśte ïnkalel len anθa o Them le Eʒiptosqo, kadǎ kä e rǎt kodoja saorä israelicǎ träbul te avel len griźa ta na soven anθ-e ćinstja le Rajesqi anθa-k nǎmo anθä aver nǎmo.
Maj but anθa-i Patragi
43 O Raj phendǎs le Mojsǎsqe haj le Aronosqe:
— Kadaja si e kris le Patragǎqi: Nić äk sträiino ta na xal anθa laθe! 44 Saorä robi kinde haj ćhinde tele daśtin te xan anθa laθe. 45 Dar äk manuś sträiino kaj beśel äk cïra anθä kǒ them, sau äk manuś sträiino kaj kerel tumenqe buki, ta na xal. 46 Haj te xal pes andrä anθ-äl khera, ta na le dälok mas avri anθa-l khera! Ta na ïnkhǎren nić äk kokalo! 47 Saoro poporo le Israelosqo te ïnkǎren e Patragi! 48 Kana äk sträiino, kaj beśel tuθe, va kamela te kerel e Patragi le Rajesqi, orso murś anθä lesqi famelia träbul ćhindo tele. Pala kodoja va daśtila te kerel lan, haj si te avel sar äk manuś kerdo anθ-o them. Dar nić äk bi ćhindo tele ta na xal anθa laθe! 49 Sa kadav sikaimos si te avel anθa o bäśtinaś haj i anθa o sträiino savo va beśela anθä tumaro maśkar!
50 Saorä israelicǎ kerdes sar phendǎsas o Raj le Mojsǎsqe haj le Aronosqe. 51 Haj kjar anθ-o ges kodova, o Raj ïnkaladǎs anθa o Them le Eʒiptosqo le israelicen, pala lenqe ośti.