4
O Petre haj o Joan angla äl bare
Anθ-o timpo so o Petre haj o Joan denas duma le poporosqe, aviles lenθe äl raśaja, o käpitano kaθar o Templo haj äl sadukea. On sas xolǎme anθa-i kauza kä sikavenas le poporos haj vestinas kä anθa-i kauza le Isusosqi, äl mule va ïnviona. Ćhutes o vast pä lenθe haj phandade len ʒi anθä le dujenqo ges, kä pelisas e rǎt. Dar but anθa kola kaj aśundesas so phendǎsas o Petre, pakǎjes, haj o numäro le manuśänqo barilos kam k-äl panʒ mi.
Anθä koaver ges lenqe bare, äl phure haj äl sikaitorǎ le Krisaqe kidinǎjles anθ-o Jerusalimo. Othe sas i o baro raśaj o Ana haj o Kajafa, o Joan, o Aleksandro haj sǎ kaj cïrdenas pes anθa o njamo le raśajenqo. Ćhutes le Petres haj le Joanos anθ-o maśkar haj ïnćeposajles te pućhen len:
— So zuralimaça sau anθä kasqo anav kerden tume kadaj buki?
Atunć o Petre pherdo Duxo Sfïnto, phendǎ lenqe:
— Äl maj bare haj äl phure le poporosqe! Ages pućhen amen anθa äk miśtimos kerdo äk manuśäsqe nasfalo haj sar sas sastǎrdo? 10 Te ʒanen sǎ haj te ʒanel saoro poporo le Israelosqo, kä o manuś kadava beśel angla tumenθe sastevesto prin o anav le Isusosqo Kristos anθa o Nazareto, saves tume rästignisarden les, dar saves o Del ïnviosardǎ les anθa-l mule. 11 O Isus si
«o bar, savo tume, äl zidarǎ, ćhuden les,
dar savo areslos te avel o bar o maj laćho».a Salmi 118:22
12 O Isus si korkoro kaj daśtil te xastravel le manuśän, käć naj tala o ćeri aver anav dino le manuśänqe anθa savo träbul te avas xastrame.
13 Kana dikhles kä o Petre ni daral haj nić o Joano, haj kana dine pi sǎma kä si manuś bi sikaimasqo, manuś simpli, aćhiles ujmime. Haj dine pi sǎma kä sas le Isusoça. 14 Dar, kä dikhenas paśa lenθe le manuśäs kaj sas sastǎrdo, ni daśtisajles te phenen khanć kontra. 15 Numa porunćisardǎ lenqe te ïnklen avri anθa-i kris haj dine duma maśkar pesθe:
16 So te keras kadal manuśänça? Kä saorä manuś anθa o Jerusalimo ʒanen kä prin lenθe kerdilos äk baro semno, haj ni daśtis te phenas kä naj kadǎ. 17 Dar, ka e buki kadaja ta na aśundǒl maj dur maśkar äl manuś, te daravas len ka dakanara angle ta na maj den duma kanikasqe anθ-o anav kadava!
18 Äl bare dine len muj andrä haj phende lenqe ta na maj den duma dä lok haj nić ta na maj sikaven anθ-o anav le Isusosqo. 19 Dar o Petre haj o Joan dine len anglal:
— Krisonta tume korkoro: si miśto angla o Del te keras so tume phenen sau so phenel o Del? 20 Kä ame ni daśtis ta na das duma anθa so dikhlǎm haj aśundǎm.
21 Päće pale ïnćerkosarde te daraven len, mukle len te telǎren, kä ni ʒanenas sar te pedepsin len, anθa-i kauza le poporosqi, kä sǎ läudinas le Devles anθa so kerdinǎjlosas. 22 Käć o manuś, saveça kerdilosas kadav semno sastǎrimasqo, sas les maj but dä saranda bärś.
Äl manuś kaj pakǎn rugin pes haj na daran
23 Päće dinǎ pes lenqo drom, geles kä pe amal haj phende lenqe sǎ so phendǎsas lenqe äl raśaja äl bare haj äl phure. 24 Kana aśundes kadal bukǎ, rugisajles jagale anθ-äk than karing o Del:
— Rai!a, tu kerdǎn o ćeri, e phuv, e marǎ haj sǎ so si anθä lenθe! 25 Tu phendǎn prin o Duxo Sfïnto, prin o muj amare dadesqo David, kǒ robo:
«Sosθe xolǎon pes äl njamuri,
haj keren äl poporǎ planuri kaj ni va kerdǒna?
26 Äl thagara le phuǎqe pregätisajles marimasqe,
äl bare unisajles
kontra le Rajesqi
haj kontra lesqe Kristososqi.»b Salmi 2:1-2
27 Kä ćaćes, o Irod haj o Ponciu Pilat unisajles le neevreença haj le njamurença le Israelosqe anθ-o foro kadava, kontra ke robosqe o sfïnto, o Isus, saves makhlǎn les thagar, 28 kaśte keren so hotärïsardǎsas kǒ vast haj ki voja. 29 Haj akanak, Rai!a, aśun sar daraven amen. De zuralimos ke roben te phenen kǒ kuvïnto bi daraqo, 30 anθ-o timpo so sikaves kǒ zuralimos te sastǎres le nasfalen haj te keres semnǎ haj minuni prin o anav ke robosqo o sfïnto, o Isus!
31 Haj päće rugisajles, izdrajas o than kaj sas kidine, sǎ pherdiles Duxo Sfïnto haj phenenas o kuvïnto le Devlesqo bi daraqo.
Kolen kaj pakǎjes, sǎ sas len anθ-äk than
32 Äl but manuś kaj pakǎjesas sas äk ilo haj äk sufleto. Nić jekh ni phenelas kä lesqe bukǎ si numa lesqe, haj sǎ sas len anθ-äk than. 33 Äl apostolǎ bute zuralimaça phenenas saoränqe kä o Raj o Isus ćaćes ïnviosardǎs. Haj sas bari binekuvïntarǎ saorän. 34 Kä nas nić jekh maśkar lenθe te ïngǎrel lipsa daićesqi, kä kolen saven sas len phuja sau khera, bikinenas len, anenas äl love 35 haj ćhunas len k-äl pïrne le apostolenqe, haj äl love sas xulade fiosavesqe pala sar sas les nevoja.
Ni daśtis te xoxaves le Duxos Sfïnto
36 Haj o Josif, äk levito anθa o Ćipro, savesqe äl apostolǎ phende lesqe Barnaba (savo xakǎrdol „kaj zurǎrel tut”), 37 bikindǎs äk ogoro kaj sas les, andǎs äl love haj ćhutǎ len k-äl pïrne le apostolenqe.

a4:11 Salmi 118:22

b4:26 Salmi 2:1-2