3
E Rut căl pîrne le Boazosche
Hai e Naomi, lachi soacra, phendea lache:
— Mîrî cei, nas mișto te rodav tuche ăc than te odihnis tut, cai te avel tuche mișto? Ita o Boaz savesche giuvleanța sanas, nai ov ruda amența? Dich că ov racheaco si te ucianel o ghiv p-e aria. Thov tut, mach tut uleiesa, hureado șucar hai de tut tele ch-e aria le treierimaschi! Dar ta na cherdos pringiandi cadal manușăsche gi cana ni hala hai ni pela! Cana ciula pes tele, dich o than cai ciul pes tele, pala codoia gia, de rigate pa lesche pîrne hai ciu tut tele! Atunci ov si te phenel tuche so te cheres.
E Rut dinea lan anglal:
— Si te cherav sea so phendean.
Dinea pes tele ch-e aria hai cherdeas sea so poruncisardeasas lachi soacra.
O Boaz haleas hai pileas hai lesco ilo sas lacio. Pala codoia ghelos te ciul pes tele pașa e grămada le ghiveschi. E Rut avilis cioreal, dinea rigate pa lesche pîrne hai ciutea pes tele. Co mașcar le reacheaco o manuș izdraias, boldea pes, hai dich ăc giuvli sas tele că lesche pîrne. Atunci ov phendeas:
— Con san?
Hai oi dineas anglal:
— Sem e Rut, chi slujnica. Întinzosar che poghea le hainache pă chi slujnica, că tu san muro răscumpărători!
10 Hai ov phendeas:
— Binecuvintime te aves catar o Rai, mîrî cei! Tu sicadean mai but miștimos mai palal dă sar anglal. Că ni phirdean pala tărne, fie că on si cioră sau bravale. 11 Acanac, mîrî cei, na dara, si te cherav tuche sea so phenes, că saoro foro gianel că san ăc giuvli gogheaver. 12 Si ciaces că sem tuche pașardo, dar mai si ăc manuș, ăc ruda mai pașă sar mande. 13 Acio cadai reat cathe! Hai tehara cana camela te răscumpăril tut, mișto, te răscumpăril tut. Dar cana ni placiol les te răscumpăril tut, si te răscumpăriv tut me, giuvindo si o Rai! Sov cathe gi detehara!
14 Oi acilis suti că lesche pîrne gi detehara, hai uștilis mai anglal ta na daștin te pringiandeon ăl manuș iech pă aver. O Boaz phendeas:
— Ta na gianel coniva că întrisailis ăc giuvli and-e aria!
15 Hai mai phendeas:
— An e mantaua cai si pă tute hai închear lan!
Hai oi încheardea lan, ov măsurisardeas șov măsuri orzosche* 6 măsuri orzosche sas cam 30 ocale. hai ciutea len pă la. Pala codoia întrisailos ando foro.
16 E Rut risailis că pi soacra, hai e Naomi phendeas:
— Sar sas, mîrî cei?
E Rut phendea lache sea so cherdeasas lache o manuș codova:
17 Dinea man cadal șov măsuri orzosche hai phendea manghe: «Ta na ris tut le vastesa nango că chi soacra!»
18 Hai lachi soacra phendeas:
— Beș gogheaver, mîrî cei, gi cana așunesa sar termenila pes e buchi cadaia: că o manuș cadava ni va arachela pi pacea gi cana ni va termenila aghes e buchi cadaia.

*3:15 6 măsuri orzosche sas cam 30 ocale.