15
O Isus si e vița hai ame seam ăl mlădițe
Me sem e vița e ciacii hai muro Dad si cai cherel e buchi e rez. Saoră mlădițe cai ni den rodo, ov cinel len, hai saoră mlădițe cai den rodo, ujol len, caște anen i mai but rodo. Tume sen deja uje andai cauza le vorbenghe cai phendem len tumenghe. Acion andă mande hai me va aciova andă tumende. Nici ăc mlădița ni daștil te anel rodo pestar cana ni aciol and-e vița. Sa cadea nici tume ni daștin te anen rodo cana ni acion andă mande. Me sem e vița hai tume sen ăl mlădițe. Con aciol andă mande hai me andă leste del but roade, că tume ni daștin te cheren chanci bi muro. Cana daconiva ni aciol andă mande, si ciudino avri sar ăc mlădița, hai va șucheola. Cadal mlădițe chiden len, ciuden len and-e iag hai si phabarde. Cana acion andă mande hai mîră sicaiimata acion andă tumende, daștin te manghen orso camen, hai va cherdeola tumenghe. Hai cadea sicaven cabor dă baro si muro Dad, cana anen but rodo, hai cadea sicaven că sen mîră ucenicea. Sar iubil man o Dad, cadea iubiv tumen i me. Acion andă mîrî dragostea! 10 Cana închearen mîră porunci, va aciona andă mîrî dragostea, cadea sar me încheardem ăl porunci mîră Dadesche hai aciov andă leschi dragostea.
11 Phendem tumenghe cadal buchea ca mîrî bucuria te avel andă tumende, hai tume te aven pherde bucuria. 12 Cadaia si mîrî porunca, te iubin tumen iech pă aver, cadea sar me iubiv tumen. 13 Canicas nai les dragostea mai bari numa te del pi viața anda pe amal. 14 Tume sen mîră amal cana cherena so porunciv tumenghe. 15 Dacanara angle ni mai phenav tumenghe robi, că o robo ni gianel so cherel lesco stăpîno. Hai phenav tumenghe amal, că sea so așundem catar muro Dad cherdem tumenghe pringiando. 16 Na tume alosarden man man, hai me alosardem tumen, hai ciutem tumen te gian hai te anen roada, hai tumari roada te aciol, cadea că o Dad te del tumen orso va manghena andă muro anav. 17 Cadaia porunciv tumenghe: te iubin tume iech pă aver!
E ura le lumeachi
18 Cana e lumea urol tumen, anen tumenghe goghi că man urosardea man mai anglal tumendar. 19 Cana afi senas le lumeache, e lumea iubilas tumen sar piren. Dar ni sen le lumeache, hai me alosardem tumen andai lumea, codolasche e lumea urol tumen. 20 Ta na bistren ăl vorbe cai phendem tumenghe: o robo nai mai baro dă sar peo stăpîno:a Ioan 13:16 cana man cherde man te suferiv, va cherena tumen i tumen. Cana cherdes mîră vorbe, va cherena i tumare. 21 Va cherena tumenghe saoră buchea cadala anda mîrî cauza, că on ni pringianen les coles cai dinea man drom. 22 Cana ni afi avilemas hai ni afi dinemas lenghe duma, nas doșale bezehăstar. Dar acanac ni daștin te phenen că ni giangles că cheren bezeh. 23 Con urol man man, urol i mîră Dades. 24 Cana ni afi cherdemas mașcar lende buchea save conic aver daconiva ni cherdea len, nas doșale catar o bezeh cadava. Dar acanac chear că dichles i man hai i mîră Dades, sa uron amen. 25 Dar cadaia cherdeol caște cherdon ăl vorbe ramome andă lengo Lil le sicaiimasco: urosarde man bi ciacimasco.b Salmi 35:19; 69:4 26 Dar cana avela o Ajutori, savo me va dava les tumenghe drom catar o Dad, o Duho le ciacimasco, savo avel catar o Dad, ov va phenela o ciacimos anda mande. 27 Hai i tume va phenena o ciacimos anda mande, că senas dă anglal manța.

a15:20 Ioan 13:16

b15:25 Salmi 35:19; 69:4