1 E Dina, e cei cai cherdeasas lan e Leea le Iacovosche, înclistis te maladol le ceianța le themosche. 2 O Sihem, o ciavo le thagaresco Hamor o hetito, dichlea lan. Lilea lan hai asaia pesche latar. 3 Dar pașilos saoră ilesa catar e Dina, e cei le Iacovoschi. Iubisardea le ceia hai dineas duma șucar le ciasa. 4 Hai o Sihem phendeas pe dadesche, la Hamorosche:

— Te les manghe dă romni cal ceia!

5 Cana o Iacov așundeas că mahrisardeas lesche ceia, le Dina, lesche ciave sas po islazo le animalența. O Iacov ni cherdeas chanci gi cana on boldineailes. 6 O Hamor, o dad le Sihemosco, ghelos co Iacov te del duma lesa. 7 Ăl ciave le Iacovosche boldineailesas catar o islazo, cana așundes ⸤andai Dina⸥. Nasul holeailes hai liles iag că o Sihem cherdeasas ăc baro nasulimos le Israelosche, că sutos le ciasa le Iacovoschi. Cadea daicii ni trăbulas te cherdeol nici ăc data. 8 Dar o Hamor dinea lenghe duma cadea:

— Muro ciavo, o Sihem, pașilos saoră ilesa catar tumari cei. Rughiv tumen, den lan lesche dă romni! 9 Cherdeon hanamica amența! Den amen tumare ceian hai tume len amarean! 10 Beșen amența: o them si angla tumende, daștin te beșen andă leste, te phiraven tumare turme hai te chinen phuv cai camen.

11 O Sihem phendeas le dadesche hai le phralenghe le Dinache:

— Te arachav miștimos tumende hai si te dav tumen so manghen manghe. 12 Manghen manghe ăc pochin bari andai mireasa, hai cabor dă but daruri, hai si te dav sea so phenen manghe, numa den man le ceia dă romni!

13 Pentrucă o Sihem cherdeas mahrime lenghe phea le Dina, ăl ciave le Iacovosche hohades le Sihemos hai lesche dades le Hamoros:

— 14 Si ăc buchi cai ni daștis te cheras, te das amare phea ăc manușăsche cai nai cindo tele, că si ăc lagiavo anda amende. 15 Împăchis amen tumența numa cana cherdeona i tume sar amende: saoră murș anda tumende te cinen pes tele. 16 Atuncia va dasa tumen amare ceian, hai lasa anda amende tumarean, si te beșas tumența hai va cherasa andăc than ăc poporo. 17 Dar cana ni așunena te cinen tumen tele, las amare pheia hai si te telearas.

18 Lenghe vorbe placiuias le Hamoros hai lesche ciaves le Sihemos. 19 Le tărnesche nici ni nachlo lesche anda o șăro ta na cherel e buchi cadaia, că iubilas le ceia le Iacovoschi, că ov sas mai dichlo ando cher pe dadesco. 20 O Hamor hai peo ciavo Sihem gheles ch-e poarta le foroschi, hai dine duma cadea le manușănghe anda o foro:

— 21 Ăl manuș aven paceasa amende. Te mucas len te beșen ando them hai te phiraven pe turme. O them si baro anda lende. Ame si te las dă romnea lenghe ceian, hai ame das len dă romnea amarean. 22 Dar ăl manuș cadala camen te beșen andăc than amența, te avas ăc poporo, numa cana saoră rom anda amende si te cinen pes tele, sar si i on cinde tele. 23 Nai cadea că lenghe turme, lengo bravalimos, hai saoră animalea si te aven atuncia amare? Te cheras numa so manghen on, caște beșen amende!

24 Saoră manuș le forosche așunde catar o Hamor hai catar lesco ciavo Sihem, hai saoră rom sas cinde tele. 25 Le trinengo ghes cana sas lenghe pharo, dui ciave anda le Iacovosche, o Simeon hai o Levi, ăl phral le Dinache, liles pe săbii, dines peste o foro, savo pachealas că si les pacea, hai mudardes saoră romen. 26 Mudardes le sabiasa le Hamoros hai i lesche ciaves le Sihemos, liles le Dina anda o cher le Sihemosco hai teleardes. 27 Ăl ciave le Iacovosche liles ăl buchea le mulenghe hai nangheardes o foro, că mahrisardes lenghe phea. 28 Lile lenghe brachean, buznean, guruven hai hăren, sea so sas ando foro hai i po cîmpo, 29 lile saoră bravalimata, lile sar robi lenghe ciaven hai lenghe romnean, hai lile sea so arachadolas andăl chera. 30 Atuncia o Iacov phendeas le Simeonosche hai le Levesche:

— Tume halen man, te avav dichlo nasul catar ăl manuș le themosche, ăl canaanițea hai ăl ferezițea! Si man țîra manuș, hai on si te chiden pes anda ma, si te maren man hai si te merav me hai muro cher.

31 On dine les anglal:

— Pacheaias că amari phei si leschi curva?