9
O Del binecuvintisardeas le Noias hai lesche ciaven:
— Cheren ciave, buteon hai pheren e phuv! Bari dar tumendar te avel pă saoră animalea sălbaticea, pă saoră ciriclea le cerosche, pă sea so mișchil p-e phuv hai pă saoră mace le bare paiesche. Dinem len tumenghe andă tumare vast. Sea so mișchil hai si len viața te avel tumenghe hamasche. Sar dinem tumen ăl plante zeli, acanac dav tumen sea. Numa mas pe viațasa, lesche ratesa, ta na han! Si te mangav palpale o rat tumare viațaco; si te mangav les palpale catar orso animalo, hai catar orso manuș si te mangav palpale e viața avre manușăschi. Cana daconiva ciorela o rat ăc manușăsco, i lesco rat te avel ciordo manușăstar, că o Del cherdeas le manușăs te avel sar leste. Hai tume, cheren ciave hai buteon! Beșen pă saoră phuv, hai buteon pă late!
O Del mai phendeas le Noiasche hai lesche ciavenghe cai sas lesa:
Dich, me cherav ăc phanglimos tumența hai tumare ciavența pala tumende, 10 saoră giuvindimatența cai sas tumența: ăl ciriclea, ăl animalea pașa o cher hai ăl animalea sălbaticea cai sas tumența, saorănța cai încliste andai corabiia hai saoră animalența save va traiila p-e phuv. 11 Cherav ăc phanglimos tumența că sea so trail nai te mai avel tasade, e phuv nai te mai avel rimome paiestar.
12 Hai o Del phendeas:
— Dita o semno le phanglimasco savo cherav les mașcar mande hai tumende hai mașcar saoră giuvindimata cai si tumența, andăc neamo andă aver neamo întotdeauna: 13 Muro curcubeeo saves laciardem les ando noro, ov si te avel o semno le phanglimasco mașcar mande hai e phuv. 14 Cana va chidava nori opral e phuv, hai o curcubeeo si te sicadeol ando noro, 15 si te anav manghe goghi catar o phanglimos mașcar mande hai tumende hai mașcar sea giuvindimata cai train, hai ăl paia nai te mai cherdeon bare caște tasaen sea so trail. 16 Cana o curcubeeo si te avel ando noro, me si te dichav leste hai si te anav manghe goghi co phanglimos o veșnico mașcar o Del hai sea giuvindimata cai si p-e phuv.
17 Cadea phendeas o Del le Noiasche:
— Cadava si o semno le phanglimasco savo cherdem les mașcar mande hai sea so trail p-e phuv.
Ăl ciave le Noiasche
18 Ăl ciave le Noiasche sas o Sem, o Ham hai o Iafet, hai on încliste andai corabiia. O Ham sas o dad le Canaanosco. 19 Cadala sas ăl trin ciave le Noiasche, hai saoră manuș pa-i phuv înclistes anda lende.
20 O Noia începosardeas te cherel buchi e phuv hai ciuteas and-e phuv ăc rez. 21 Pileas mol, matilos hai nanghilos ando mașcar pe cortosco. 22 O Ham, o dad le Canaanosco, dichleas că lesco dad si nango, hai phendeas avri pe duie phralenghe. 23 Atuncia o Sem hai o Iafet liles e mantaua, ciute lan păl dume, gheles palpale zeianța hai uciardes o nanghimos lenghe dadesco. On sas palpale zeianța, hai ni dichles o nanghimos lenghe dadesco. 24 Cana o Noia trezosailos anda o matimos hai așundeas so cherdeasas lesche lesco ciavo o mai tărno, 25 phendeas:
— Dino armaia te avel o Canaan! Te avel o robo mai telal pe phralengo!
26 Mai phendeas:
— Binecuvintime te avel o Rai, o Del le Semosco, hai le Semosco robo te avel o Canaan! 27 O Del te del but phuv le Iafetos, ov te beșel bucuriasa pașa o Sem, hai lengo robo te avel o Canaan!
28 O Noia traiisailos pala so sas tasadi e phuv trin șăla hai peinda bărș. 29 Saoră ghes le Noiasche sas înea șăla hai peinda bărș, pala codoia mulos.