4
Me phenav că cabor timpo ăc moștenitori si ciavoro, cu sea că si lesche saoră buchea, nai diferime catar ăc robo. Si and-e grija le manușănghi cai dichen lestar hai i catar lesche buchea, gi ch-e vremea cai phendeas lan lesco dad. Sa cadea i ame cana seamas ciavoră, seamas robi le sicaiimatenghe ăl purane le lumeache. Dar cana pherdilis e vremea, o Del dineas drom pe Ciaves, cherdo anda giuvleate hai biando talai Cris, te pochinel anda pire cola cai beșen talai Cris, cadea te cherel amen ciave le Devlesche. Hai că sen ciave le Devlesche, o Del dineas drom o Duho pe Ciavesco andă amare ile, cai del mui:
— Abba!
— Dade!
Cadea că ni mai san robo, san ciavo le Devlesco, hai cana san lesco ciavo, san i lesco moștenitori.
Te închearen tumari libertatea!
E dragostea le Paveloschi caring ăl galateni
Cana ni pringianden le Devles, senas robi colenghe cai on nai devla ciace. Dar acanac păce pringianden le Devles, sau mai mișto phendo, pala soste senas pringiande catar o Del, sar mai bolden tumen palpale căl sicaiimata ăl purane, cai si chancivale hai cioră? Camen pale te slujin lenghe sar robi? 10 Tume închearen ghesa, ciona, ghesa bare, hai bărșa. 11 Me darav anda tumende că cherdem tumenghe buchi anda chanceste! 12 Cadea phralale hai pheiale, rughiv tumen șucar te aven sar mande, că i me sem sar tumende.
Ni cherden manghe nici ăc nasulimos. 13 Tume gianen că anglal andai cauza mîră nasfalimaschi me phendem tumenghe e vestea e lacii. 14 Sas pharo te dichen muro trupo, dar ni dichlen man nasul hai ni ciungarden man, hai dichlen man sar ăc îngero le Devlesco, sar le Cristosos Isus. 15 Deci, cai si tumari bucuria? Că phenav tumenghe so dichlem, că te daștisailenas, încaladenas i tumare iacha te den len manghe. 16 Cherdineailem tumaro dușmano, că phendem tumenghe o ciacimos?
17 Na gîndosa lacio roden tumen on caște aven lența, dar camen te durearen tumen amendar, ca tume len te roden len. 18 Si mișto te roden o miștimos întotdeauna, na numa cana me sem tumența. 19 Mîră ciave, anda save pale liles man ăl ducha le cherimasche, gi cana o Cristos dicheola andă tumende, 20 te daștivas acanac te avav tumența, hai te paruav muro glaso! Ni gianav so te mai pacheav anda tumende!
Dui giuvlea sicaven amenghe e Cris hai e făgăduința
21 Phenen manghe tume cai camen te aven talai Cris, ni așunden so phenel e Cris? 22 Că si ramome ⸤and-e Cris⸥ că le Avraamos sas les dui ciave, iech andai roaba hai iech andai giuvli slobodo. 23 Cova cai cherdilos andai roaba sas cherdo sar orso ciavo, dar cova andai giuvli slobodo sas cherdo andai făgăduința ⸤cherdi catar o Del⸥. 24 Cadal buchea daștin te aven lile andă aver felo. Cadala si dui phanglimata: iech pa o Plai Sinai, cai cherel ciave te aven robi, cadaia si e Agar. 25 E Agar si sar o Plai Sinai andai Arabia, hai sar o Ierusalimo cai si acanac, că si and-e robia andăc than pe ciavența. 26 Dar o Ierusalimo anda o ceri si slobodo hai si amari dei. 27 Că si ramome:
— Bucurisao tu stearpo,
cu sea că ni daștis te avel tut ciave!
De mui hai zbărisar dă bucurie,
cu sea că ni gianes ăl ducha le cherimasche!
Că tut, cai san mucli, si te avel tut mai but ciave
dă sar cola cai si lan rom.a Isaia 54:1
28 Cadea phralale hai pheiale, tume, sar sas o Isac, sen ăl ciave făgăduiime catar o Del. 29 Dar sar atunci, cova cai sas cherdo sar orso ciavo, cherelas nasul colesche cai cherdilos anda o Duho. Sa cadea si i acanac. 30 Dar so phenel e Scriptura?
— Gonisar lan cadala roaba hai i lache ciaves, că o ciavo le roabaco nai te avel les rig ando bravalimos le ciavesa le giuvleaco slobodo.b Geneza 21:10
31 Codolasche phralale hai pheiale, ame ni seam ăl ciave le roabache, hai seam ăl ciave le giuvleache cai si slobodo.

a4:27 Isaia 54:1

b4:30 Geneza 21:10