5
Ăl ciave le Devlesche biruin prin o pacheamos
1 Sea cai pachean că o Isus si o Cristos si ciave le Devlesche. Sea cai iubin ăc dades, iubin i lesche ciaves. 2 Cadea gianas că iubis le ciaven le Devlesche: că iubis le Devles hai cheras lesche porunci. 3 Că te iubin le Devles si te cheras so phenel ov. Hai lesche porunci nai phare, 4 că sea cai si ăl ciave le Devlesche biruin e lumea. Hai cadea biruis e lumea: prin amaro pacheamos. 5 Con biruil e lumea, cana na cova cai pacheal că o Isus si o Ciavo le Devlesco?
6 Ov, o Isus Cristos, si cova cai avilos paiesa hai ratesa. Na numa paiesa, dar paiesa hai ratesa. O Duho si cova cai phenel o ciacimos andai buchi cadaia, codolasche că o Duho si o ciacimos. 7 Trin si cai phenen o ciacimos: 8 o Duho, o pai hai o rat, hai cadal trin phenen sa cadav ciacimos. 9 Ame deja las e mărturia le manușănghi, atunci trăbul te pringianas că e mărturia le Devleschi si mai bari. Hai cadaia si e mărturia le Devleschi, savi phendea lan ov anda peo Ciavo. 10 Cova cai pacheal ando Ciavo le Devlesco si les e mărturia cadaia andă lesco ilo. Cova cai ni pacheal so phendeas o Del, cherel les ohamno, anda codoia că ni pacheal e mărturia savi phendea lan o Del anda peo Ciavo. 11 Hai e mărturia si cadaia: o Del dinea amen e viața veșnico, hai cadai viața si andă lesco Ciavo. 12 Coles cai si les le Ciaves si les e viața, coles saves nai les le Ciaves le Devlesco nai les e viața.
Gianas că si amen viața acanac hai totdeauna
13 Ramosardem tumenghe cadal buchea caște gianen că si tumen e viața veșnico, tume cai pachean ando anav le Ciavesco le Devlesco 14 Hai si amen o pacheamos că cana rughis amen, hai cana mangasa daicii pala leschi voia, ov așunel amen. 15 Hai, cana gianas că așunel amen orso mangasas, gianas că si amen deja ăl buchea save mangleam len lestar.
16 Cana daconiva dichel pe phrales cherindos ăc bezeh cai ni înghearel co mulimos, te rughil pes, hai o Del va dela les viața. Cadaia si anda cola save ni cherdes ăc bezeh cai înghearel co mulimos. Si i bezeh cai înghearel co mulimos. Ni phenav te rughil pes anda o bezeh cadava. 17 Saoră biciacimata si bezeh, dar si bezeh cai ni înghearel co mulimos.
18 Gianas că orsavo cai si ciavo le Devlesco ni trail ando bezeh, hai o Ciavo le Devlesco păzil les, hai o nasul ni machel pes lestar. 19 Gianas că seam le Devlesche, hai că saorî lumea pașlol ando nasulimos. 20 Gianas că o Ciavo le Devlesco avilos hai cherdeas te daștis te pringianas le Devles e ciaces. Hai ame seam andă cova cai si ciacio, prin lesco Ciavo, o Isus Cristos. Ov si o Del o ciacio hai e viața veșnico. 21 Ciavorale, păzin tumen catar ăl idolea! Amin.
CC BY-NC-ND 3.0 Puteți copia și redistribui această lucrare în orice format sau prin orice mediu - fără de a o modifica conținutul - cu atribuția corespunzătoare și sub aceeași licență. Sub următorii termeni: Trebuie să acorzi creditul potrivit. Nu puteți folosi această operă în scopuri comerciale. Dacă reajustați, transformați sau construiți pe baza lucrării, nu veți putea distribui lucrarea modificată, în nici un mod sau context.