71
O Del si mîrî nădejdea
Andă tute, Raia, rodav azăvada,
te na kerdeov lagiavesko nici ăk data!
Tu san ciacio,
înkal man anda o nekazo hai hastra man!
Banghear ke kan te așunes man, hai ajutisar man!
Av ăk stînka azăvădimaski anda mande,
kai daștiv te nașav întotdeauna!
Tu san mîrî stînka hai mîrî cetate!
Poruncisar te hastrav!
Hastra man, muro Del, anda o vast kolengo kai keren nasul,
anda o vast kolengo kai keren bezeh hai si bi milako!
Kă tu san mîrî nădejdea, Raia Devla!
Andă tute pakeav dă kana semas tărno.
Pă tute sprijiniv man dă kana kerdilem.
Tu înkaladean man grijasa anda o păr mîră dako,
tut lăudiv tut întotdeauna.
But mirin pes mandar,
dar tu san mîrî azăvada e zurali.
Muro mui si pherdo ke laudasa,
hai saoro ghes dav duma anda keo șukarimos.
Na gonisar man ke vremea le phurimaski,
kana ma nai man zuralimos, na muk man!
10 Anda kodoia kă mîră dușmaia
den pes duma anda mande,
hai kola kai pîndin mîrî viața
keren planuri mașkar peste
11 phenindos: „Muklea les o Del.
Gian pala leste hai astaren les,
kă nai koniva te hastravel les!”
12 Devla, na dureo mandar!
Muro Del, hai sigo te ajutis man!
13 Te hasaon ando lagiavo kola kai păkălin man!
Te aven hureade le lagiavesa hai batjokurasa
kola kai roden te keren manghe nasul!
14 Dar me va speriva întotdeauna,
va lăudiva tut but mai but.
15 Muro mui va phenela keo ciacimos
hai ki mîntuirea saoro ghes,
kă si mai bari kaște hakearav lan.
16 Va avava hai va phenava ăl fapte ăl zurale le Raieske o Del.
Keo ciacimos va amintiva, numa kiro.
17 Devla, dă kana semas tărno, tu sikadean man,
hai gi akanak vestiv ke minuni.
18 Kear atunci kana sem phuro balența parne,
na muk man, Devla,
gi kana dava duma anda keo zuralimos kolenghe kai va kerdeona dakanara,
hai gi kana phenava saorănghe save va avena anda so daștis te keres!
19 Keo ciacimos, Devla, aresel gi ko ceri,
tu kai kerdean bukea bare.
Devla, kon si sar tute?
20 Tu, savo kerdean man te nakhav
anda but pharimata hai nasulimata,
pale de man palpale mîrî viața,
înkal man pale anda o adînko le phuiako!
21 Ker man te avav mai cinstime,
hai pale mîngîiisar man!
22 Hai me si te lăudiv tut le lăutasa,
hai lăudiv i keo pakeamos, Devla.
Si te ghilabav tuke le harpasa,
Sfîntona le Israelosko!
23 Kana va ghilabava tuke,
mîră ușt va dena mui zurales dă bukurie,
hai i muro ilo saves pokindean les va dela mui.
24 Hai mîrî cib va vestila
keo ciacimos andă saoro ghes,
kă kola kai roden te keren manghe nasul
kerdiles lagiaveske hai asamaske.