O merimos le Isusosko
22
(22:1—23:56)
Ko baro ghes le Nakhimasko o Isus hal ke sinia pe ucenicența
O Iuda kamel te bikinel le Isusos
Pașolas o timpo anda o ghes o baro le Azimengo, kai buciolas o ghes o baro le Nakhimasko. Ăl bare rașaia hai ăl sikaiitorea le Krisake rodenas sar te mudaren le Isusos, kă daranas katar ăl manuș. O Satana întrisailos ando Iuda, kai buciolas Iskarioteano, iekh andal deșudui. O Iuda ghelos hai dineas duma le bare rașaiența hai le kăpitaența le gărzenghe le Temploske sar te del le Isusos andă lenghe vast. On bukurisailes hai sas dă akord te den les love. Ov sas dă akord, hai rodelas ăk timpo lacio te del le Isusos andă lenghe vast, kana ăl but manuș nai lesa.
Kai daștil te hal o Isus e sinia le bare gheseski?
Avilos o ghes o baro le Azimengo kana trăbulas jertfime o mielo anda o ghes o baro le Nakhimasko. O Isus dineas drom le Petres hai le Ioanos hai phendea lenghe:
— Gian hai pregătin e sinia le bare gheseski le Nakhimasko anda amende, kaște has!
On phendes leske:
— Kai kames te pregătis lan?
10 Ov phendeas:
— Dikhen, kana va întrina ando foro, va malavena ăk manuș kai înghearel ăk ulciori paiesa. Gian pala leste ando kher kai întril 11 hai phenen le stăpînoske le kheresko:
— O sikaiitori pucel tut: «Kai si e hodaia e lacii andă savi te hav e sinia le bare gheseski le Nakhimasko mîră ucenicența?» 12 Hai si te sikavel tumenghe ăk hodaia bari laciardi opre. Othe te pregătin e sinia!
13 On teleardes hai arakhles kadea sar phendeas ov. Hai pregătisarde e sinia le bare gheseski le Nakhimasko.
Sar începosailis e cina le Raieski
14 Kana avilos o timpo, o Isus hai ăl apostolea beșles ke sinia. 15 Ov phendea lenghe:
— Kadiki dă but kamnem te hav kadai sinia le bare gheseski le Nakhimasko tumența anglal gi kai te suferiv! 16 Kă phenav tumenghe kă dakanara angle nai te mai hav lan, gi kana ni va avela o ciacio ghes o baro le Nakhimasko ando thagarimos le Devlesko.
17 Lileas ăk paharo, naiisardeas le Devleske hai phendeas:
— Len o paharo kadava hai hulaven les mașkar tumende, 18 kăci phenav tumenghe kă dakanara angle nai te mai peav mol, gi kana ni va avela o thagarimos le Devlesko.
19 Pala kodoia lileas marno, naiisardeas le Devleske, phaglea les hai dinea les lenghe phenindos:
— Kadava si muro trupo savo del pes anda tumende. Keren kadai buki te anen tumenghe goghi mandar!
20 Păce hales, lileas i o paharo hai phendeas:
— Kadai mol si o phanglimos o nevo, kerdo mîră ratesa savo c⁠iordeol anda tumende. 21 Dar ita kă o vast kodol manușăsko kai va bikinela man si manța ke sinia. 22 O Ciavo le Manușăsko va giala te merel pala sar plănuiisardeas o Del. Dar vai katar o manuș kodova savo va bikinela les!
23 On începosailes te pucen pes mașkar peste, savo anda lende va kerela kadai buki.
Kon si o mai baro
24 Hai ăl apostolea începosailes te han pes, savo anda lende si o mai baro. 25 O Isus phendea lenghe:
— Ăl thagara andai lumea stăpînin păl manuș. Kola kai si len autoritatea pă lende placiol len te bucion „kola kai keren mișto”. 26 Tume ta na aven kadea! Hai o mai baro mașkar tumende te avel sar o mai țîino, hai kova savo si kondukători, te avel sar kova kai slujil. 27 Kăci kon si o mai baro: kon beșel ke sinia sau kon slujil? Nai kova kai beșel ke sinia? Hai me, andă tumaro mașkar, sem sar kova kai slujil. 28 Tume sen kola kai beșlen pașa mande andă saoră nekazuri mîră. 29 Hai sar muro Dad phendea manghe: «Av thagar manța», i me phenav tumenghe: «Aven thagara manța», 30 kaște han hai te pen kă mîrî sinia andă muro thagarimos, hai te beșen păl skauia le thagarenghe, kaște krison le deșudon neamuren le Israeloske.
O Petre va phenela kă ni pringianel le Isusos
31 Simone, Simone, dikh, o Satana mangleas te ucianel tumen sar le ghives. 32 Dar me rughisailem anda tute, ta na hasares keo pakeamos. Hai, păce boldesa tut mande, te zureares ke phralen!
33 O Petre phendea leske:
— Raia, sem gata te avav phandado tusa, hai kear te merav andăk than tusa!
34 Hai o Isus phendea leske:
— Petre, phenav tuke kă ni va ghilabela aghes o bașno, gi kana ni va phenesa trin drom kă ni pringianes man.
Te aven gata andal timpuri phare
35 Pala kodoia phendea lenghe:
— Kana dinem tumen drom bi lovengo, bi traisteako hai bi poghimasko, înghearden lipsa daiiceski?a Luka 10:4
On phendes:
— Khancestar.
36 Hai ov phendea lenghe:
— Dar akanak kana si tumen love sau ăk traista, len len tumența, hai kas nai les sabia te bikinel pi haina hai te kinel peske! 37 Kă phenav tumenghe kă trăbul te kerdeol manța so si ramome: «Sas dikhlo sar ăk manuș nasul bi krisako».b Isaia 53:12 Ciaces, so si ramome anda mande si gata te kerdeol pes.
38 On phendes:
— Raia, dikh, kathe si dui săbii.
Hai ov phendea lenghe:
— Aresel!
O Isus rughil pes korkoro po Plai le Măslinengo
39 Hai o Isus înklistos anda o foro hai ghelos po Plai le Măslinengo sar gialas dă obicei. Leske ucenicea gheles pala leste. 40 Kana areslos othe, phendea lenghe:
— Rughin tumen, ta na peren ande ispita!
41 Hai ov durilos lendar sar kăk ciudimos barăsko, dineas kocia hai începosailos te rughil pes:
42 Dade, kana kames, le o paharo kadava mandar! Dar te kerdeol ki voia, na mîrî!
43 Atunci sikadilos leske ăk îngero anda o ceri, kaște zurearel les. 44 O Isus suferilas but andă peo ilo, hai începosailos te rughil pes i mai but. Leski transpirația perelas pe phuv sar pikături rateske. 45 Păce rughisailos, uștilos hai avilos kăl ucenicea, arakhlea len sute kabor dă triști sas 46 hai phendea lenghe:
— Soste soven? Ușten hai rughin tumen, kaște na peren ande ispita!
O Isus si astardo
47 Ando timpo so ov înkă delas duma, ita kă but manuș aviles. Kova kai buciolas Iuda, iekh andal deșudui, gialas angla lende. Pașilos pașa o Isus kaște ciumidel les. 48 Hai o Isus phendea leske:
— Iuda, ăk ciumidimasa bikines le Ciaves le Manușăsko?
49 Kola kai sas le Isusosa, dikhles so avelas te kerdeol hai phendes:
— Raia, te das dab le sabiasa?
50 Hai iekh anda lende dineas dab le robos le bare rașaiesko hai cindeas lesko kan o ciacio. 51 Dar o Isus phendeas:
— Oprin tumen!
Hai maklea pes katar o kan kodol manușăsko hai sasteardea les. 52 Pala kodoia o Isus phendeas le bare rașaienghe, le kăpitaenghe le gărzenghe katar o Templo hai le phurenghe, save avilesas kontra leski:
— Înklisten pala mande sar pala ăk tîlhari, săbiența hai rovleanța? 53 Semas tumența andă saoră ghesa ando Templo, hai ni ciuten o vast pă mande. Dar kadava si tumaro ciaso hai e vremea kana stăpînil o întuneariko.
O Isus si krisime
O Petre phenel kă ni pringianel le Isusos
54 Păce ciute o vast po Isus, lile les hai înghearde les ando kher le bare rașaiesko. O Petre gialas mai dural pala leste. 55 Kerdes ăk iag ando mașkar le bareako hai beșles tele pașa late. O Petre beșlos mașkar lende. 56 Ăk slujnika dikhlea les sar beșelas ke lumina le iagaki, dikhleas mișto pă leste hai phendeas:
— I kadava sas lesa.
57 Dar o Petre phendeas ni:
— Giuvlie, ni pringianav les.
58 Ăk țîra mai tîrzio aver dakoniva dikhlea les hai phendeas:
— I tu san iekh anda lende.
Hai o Petre phendeas:
— Manușana, ni sem.
59 Kam pala ăk ciaso, aver phenelas sa kodoi buki:
— Ciaces, i kadav manuș sas lesa, kă i ov si galileeano.
60 O Petre dineas anglal:
— Manușana, ni gianav so phenes.
Kear ando timpo kodova, kana ov înkă delas duma, ghilabadeas o bașno. 61 O Rai boldineailos hai dikhleas po Petre. Hai o Petre andinea peske goghi ke vorba kai phendeasas lan leske o Rai: „Aghes ni va ghilabela o bașno, gi kana va phenesa trin drom kă ni pringianes man.” 62 Atunci înklistos avri hai dukhasa ruias.
O Isus si batjokorime
63 Ăl manuș kai păzinas le Isusos începosailes te maren peske joko lestar hai te den les dab. 64 Phangle les kăl iakha hai pucenas les:
— Proorocisar, kon dinea tut dab?
65 Hai phenenas kontra leski but aver hule.
O Isus anglai kris le evreenghi
66 Kana parnilos, ăl phure le poporoske (ăl bare rașaia hai ăl sikaiitorea le Krisake) kidineailes andăk than hai îngheardes le Isusos andă lenghi kris. 67 Phende leske:
— Phen amenghe kana tu san o Kristos!
O Isus phendea lenghe:
— Kana phenava tumenghe, sa nai te pakean, 68 hai kana va puciava tumen, ni va dena man anglal. 69 Dar dakanara angle, o Ciavo le Manușăsko va beșela ke ciacii le Devleski o mai zuralo.c Salmi 110:1
70 Sea phendes:
— Kadea kă tu san o Ciavo le Devlesko?
Hai ov phendea lenghe:
— Kadea sar tume phenen, me sem.
71 On phendes:
— So nevoia mai si amen mărturiatar? Kear ame așundeam anda lesko mui!

a22:35 Luka 10:4

b22:37 Isaia 53:12

c22:69 Salmi 110:1