15
E bukuria kai si ando ceri kana ăk manuș ril pes ko Del
Saoră vameșea hai ăl bezehale avenas ko Isus te așunen les. Hai ăl fariseia hai ăl manuș kai sikaven e Kris rovenas pes:
— O manuș kadava primil le bezehalen hai hal lența.
E brakhi hasardi
Atunci o Isus phendea lenghe e pilda kadaia:
Te phenas kă iekhes anda tumende si les ăk șăl brakhea, hai hasarel iekh anda lende. Ni mukel kolavren îneadeșa hai înea po islazo hai ni rodel kola le hasardea gi kana arakhel lan? Kana arakhlea lan, bukuriasa ciul lan păl dume, hai kana aresel khere, del mui pe amalen hai pe vecinen hai phenel lenghe: «Bukurin tumen manța, kă arakhlem mîră brakhea kai sas hasardi!» Phenav tumenghe kă sa kadea, ando ceri va avela mai bari bukuria anda ăk manuș bezehalo, savo mukel o bezeh hai boldel pes ko Del, dă sar anda îneadeșa hai înea manuș ciace saven nai len nevoia te muken o bezeh.
O franko hasardo
Sau te phenas kă ăk giuvlea si lan deș franci ruposke hai hasarel iekh anda lende. Ni astarel ăk lampa, ni șîlavel o kher hai ni rodel grijasa gi kana arakhel les? Hai kana arakhlea les, del mui pe amalean hai pe vecinean hai phenel lenghe: «Bukurin tumen manța, kă arakhlem o franko kai hasardemas les!» 10 Phenav tumenghe, kă sa kadea si bukuria anglal îngerea le Devleske anda ăk manuș bezehalo savo mukel pes katar o bezeh hai boldel pes ko Del.
Dui ciave hai ăk dad miloso
11 O Isus mai phendeas:
— Ăk manușăs sas les dui ciave. 12 O mai tărno phendeas pe dadeske: «Dade, de man mîrî rig le bravalimaski!» Hai o dad huladeas lenghe o bravalimos.
13 Pala dui trin ghes, o ciavo mai tărno kideas sea so sas les hai teleardeas andăk them dureardo. Hai othe risipisardeas peo bravalimos traindos dilivanes. 14 Păce haleas saoră love, ando them kodova avilis ăk bokh bari, hai les ma nas les love hai înghearelas lan phares. 15 Hai ghelos hai arakhlea peske buki kă iekh andal manuș le themoske kodoleske, savo dinea les drom pă pe kîmpuri te păzil le balen. 16 Sas leske kadiki dă bokh, kă kamelas te ciailol le roșkovența save hanas len ăl bale, dar ni delas len leske koniva.
17 Atunci zurailos andă peste hai phendeas: «Kabor manuș keren buki anda muro dad si len mai but marno dă kabor trăbul len, hai me merav kathe bokhatar! 18 Si te ușteav, si te giav kă muro dad hai va phenava leske: ‘Dade, kerdem bezeh kontra le Devleski anda o ceri hai kontra kiri. 19 Ni mai meritiv te buciov keo ciavo. Ker man sar iekhes anda ke manuș!’ » 20 Hai uștilos hai teleardeas kă peo dad.
Kana înkă sas dur, lesko dad dikhlea les hai kerdineailos leske mila lestar. Nașlos, lea les and-e angali hai ciumidea les. 21 O ciavo phendea leske: «Dade, kerdem bezeh kontra le Devleski anda o ceri hai ki kontra. Ni mai meritiv te buciov keo ciavo.» 22 Dar o dad phendeas pe robenghe: «Anen sigo e haina e mai lacii hai hureaen les lasa! Ciun leske ando nai ăk angrusti hai poghimos andăl pîrne! 23 Anen le vițelos le pravardes hai cinen les! Te has hai te bukuris amen, 24 kă muro ciavo kadava sas mulo hai înviosardeas, sas hasardo hai sas arakhado!» Hai începosailes te bukurin pes.
25 O ciavo baro sas ko kîmpo. Kana avilos hai pașilos pașa o kher, așundeas muzika hai khelimata. 26 Dineas mui iekh andal robi hai pușlea les, so si kadaia? 27 Ov phendea leske: «Keo phral avilos hai keo dad cindeas le vițelos le pravardes dă bukurie kă lesko ciavo risailos khere sastevesto.»
28 O ciavo mai baro holeailos hai ni kamelas te întril andră. Lesko dad înklistos avri hai rughisardea les te întril. 29 Dar ov dineas anglal pe dades: «Dikh, me dă kadikita bărș slujiv tuke, hai nici ăk data ni ușteadem ki porunka. Hai man ni dean man nici ăk data makar ăk iedo te hav hai te peav mîră amalența. 30 Dar kana avilos kadav ciavo kiro, savo haleas keo bravalimos le kurvența, cindean leske o vițelo pravardo!» 31 O dad phendea leske: «Muro ciavo, tu san manța întotdeauna hai sea so si man si kiro. 32 Dar trăbul te bukuris amen hai te sărbătoris, kăci kadav phral kiro sas mulo hai înviosardeas, sas hasardo hai sas arakhado.»