2
O kerimos le Isusosko
Andăl ghesa kodola, o baro thagar o August poruncisardeas kaște kerdeol iekh recensămînto andă saoro thagarimos lesko. Kadava sas o angluno ghinimos hai kerdineailos kana sas guvernatori o Quirinius and-e Siria. Sea gianas andăl foruri katar sas lenghi familia te ramon pes. O Iosif ghelos i ov anda o foro Nazaret anda o ținuto le Galileeako, and-e Iudeea ando foro le Davidosko, kai buciolas Betleem, anda kodoia kă sas andai famelia le Davidoski, sas davidiștea. Ghelos te ramol pes le Mariasa, saveasa sas logodime hai savi sas khamni. Kana sas ando Betleemo, avilos o timpo te kerel e Maria. Hai kerdeas pe ciaves, lako angluno kerdo, pakeardeas les hai ciutea les andăk iesla, kă nas than anda lende and-e hodaia lacii ⸤kă leske neamuri⸥.
Ăl ciobaia aviles ko ținoro Isus
Pașa o Betleemo sas niște ciobaia kai beșenas avri po kîmpo hai păzinas pi turma e reat. Hai ăk îngero le Raiesko sikadilos lenghe, hai e slava le Raieski uciardea len luminasa. On darailes but zurales. 10 Dar o îngero phendea lenghe:
— Na daran! Kă dikh, anav tumenghe ăk vestea lacii, andak bari bukuria anda saoro poporo: 11 Aghes kerdilos tumenghe ăk Mîntuiitori ando foro le Davidosko, savo si o Kristos* Kristos insemnol 'o thagar dino drom katar o Del', sau 'o makhlo le Devlestar', si o Rai. 12 Ita sar va pringianena les: va arakhena ăk țîinoro pakeardo hai ciutino andăk iesla.
13 Hai andak data le îngerosa sas ăk armata bari îngerenghi anda o ceri, hai lăudinas le Devles:
14 Slava le Devleske andăl mai opre thana, hai pacea pe phuv mașkar ăl manuș savenghe kamel lengo miștimos!
15 Păce teleardes ăl îngerea lendar ando ceri, ăl ciobaia phendes iekh avreske:
— Atunci haida te gias ando Betleemo hai te dikhas e buki kadaia kai kerdineailis, anda savi dinea amenghe duma o Rai!
16 Sigo teleardes hai arakhles le Maria, le Iosifos hai le țîinorăs ciuto and-e iesla. 17 Pala so dikhle les, phendes so phendineailosas lenghe anda kadav ciavo. 18 Hai sea kai așunde kadal bukea mirisailes katar so phenenas lenghe ăl ciobaia. 19 E Maria saoră vorbe kadala kidelas len hai gîndilas pes lende andă peo ilo. 20 Ăl ciobaia risailes hai phenenas kabor dă baro si o Del hai slăvisarde les anda sea so așundesas hai dikhlesas sar phendineailosas lenghe.
O ținoro Isus ko Templo
O Iosif hai e Maria keren sar phenel e Kris le Moiseaski
21 Kana avilos le ohtongo ghes, andă savo trăbulas cindo tele o ciavoro, ciute lesko anav Isus, sar phendeasas o îngero anglal gi kai e Maria te aciol khamni.
22 Kana pherdiles ăl ghesa anda lengo ujimos, palai Kris le Moiseaski, o Iosif hai e Maria andines le Ciaves ko Ierusalimo, kaște den les le Raieske. 23 (Sar si ramome and-e Kris le Moiseaski: „Fiosavo ciavo kerdo anglal si le Raiesko”.) 24 Gheles ko Templo i te anen jertfa sar phenel e Kris le Raieski: dui turturelea sau dui puia porumbeienghe.a Levitiko 12:1-8
O Simeon dikhel le Isusos
25 Ando Ierusalimo traiilas ăk manuș kai buciolas Simeon. O manuș kadava sas ciacio hai iubisardeas le Devles. Ov ajukearelas o timpo kana o Del va anela ajutori le Israeloske, hai o Duho Sfînto sas lesa. 26 O Duho Sfînto phendeasas leske kă ni va merela anglal te dikhel le Kristosos. 27 Avilos andino katar o Duho ko Templo. Kana lesko dad hai leski dei andines le ciaves le Isusos kaște keren so trăbul kerdo lesa pala o obicei le Krisako, 28 o Simeon lilea les and-e angali hai lăudisardeas le Devles:
29 Muro Thagar, akanak daștis te mukes ke robos
te gial paceasa, sar phendean.
30 Anda kodoia kă mîră iakha dikhles koles saves dinean les drom te hastravel amen,
31 saves dinean les drom te avel pringiando katar saoră poporea,
32 te avel e lumina savi te sikavel bukea le neamurenghe
hai savi te avel e slava ke poporoski, o Israel.
33 Lesko dad hai leski dei mirinas pes andal bukea kai phendonas anda leste. 34 O Simeono binekuvintisardea len hai phendeas leske dake le Mariake:
— Ita, o Del ciuteas kadal ciaves ka but anda o Israelo te peren anda leski kauza, hai but orta te phiren. Hai kerdea les ăk semno savesa ăl manuș va hana pes, 35 kaște dikheol pes ăl gînduri garade bute manușănghe. Kear keo ilo va avela pusado sar ăk sabiasa.
E Ana dikhel le Isusos
36 Mai sas othe i ăk proorocița, e Ana le Fanueloski, anda e famelia le Așeroski. Sas but phuri. Traiisailisas pe romesa iefta bărș pala peo mărătimos. 37 Sas phivli dă ohtodeșa hai ștar bărș. O originalo daștil pes te mai hakeardeol kă sas phivli, hai akanak sas lan ohtodeșa hai ștar bărș. Nici ăk data ni durilis katar o Templo, hai slujilas le Devleske andă fiosavo ghes hai reat postosa hai rugăciunența. 38 Kear atunci avilis i oi karing o Isus hai karing leski dei hai lesko dad, hai începosailis te nail le Devleske hai te del duma anda o Isus saorănghe kai ajukearenas ka o Ierusalimo te avel hastrame.
39 Păce kerdes sea so poruncilas e Kris le Raieski, o Iosif hai e Maria risailes and-e Galileea, andă lengo foro, o Nazaret. 40 Hai o ciavo bareolas hai zuraolas. Sas pherdo goghi hai o Del iubilas les hai sas po plako le Devlesko.
O Isus kăl deșudui bărș ko Templo
41 Andă fiosavo bărș o dad hai e dei le Isusoske gianas ko Ierusalimo kaște sărbătorin o ghes o baro le Nakhimasko le evreengo. 42 Kana ov sas deșuduie bărșengo, gheles othe pala o obicei le bare ghesengo. 43 Păce nakhles ăl ghesa ăl bare, teleardes te gian khere. Dar o ciavo o Isus acilos ando Ierusalimo, hai leski dei hai lesko dad ni gianenas. 44 Pakeaies kă si lența ando grupo, hai gheles ăk drom ghesesko. Rode les mașkar ăl neamuri hai mașkar lenghe pringiande. 45 Dar kă ni arakhle les, risailes ko Ierusalimo te roden les. 46 Pala trin ghes arakhle les ko Templo, beșîndos ando mașkar le sikaiitorengo, așunindos len hai pucindos len. 47 Sea kai așunenas les acionas uimime katar leski goghi hai katar lesko dimos anglal. 48 Kana dikhle les leski dei hai lesko dad, sas but uimime, hai leski dei phendea leske:
— Soste, muro ciavo, phiradilean kadea amența? Așun, keo dad hai me rodeam tut bare grijasa.
49 Ov phendea lenghe:
— Soste rodenas man? Ni gianenas kă trăbul te avav ando kher mîră Dadesko?
50 Dar on ni hakeardes so phendeas ov.
51 Hai ghelos lența, avilos ko Nazareto hai așunelas lendar. Leski dei kidelas ando ilo saoră bukea kadala.
52 Hai o Isus bareolas hai pherdeolas goghi, hai sas sa mai plăkuto angla o Del hai angla ăl manuș.

*2:11 Kristos insemnol 'o thagar dino drom katar o Del', sau 'o makhlo le Devlestar'

a2:24 Levitiko 12:1-8

2:37 O originalo daștil pes te mai hakeardeol kă sas phivli, hai akanak sas lan ohtodeșa hai ștar bărș.