38
O Iuda hai e Tamar
And-e vremea kodoia, o Iuda teleardeas katar pe phral hai oprisailos anda peo drom hai acilos kă ăk manuș anda o Adulam, kai buciolas Hira. Othe o Iuda dikhleas le ceia le Șuaski, ăk kanaanitoski; lilea lan dă romni hai suto lasa. Oi acilis khamni hai kerdeas ăk ciavo, saveske ov ciuteas o anav Er. Pale acilis khamni hai kerdeas ăk ciavo saveske oi ciuteas o anav Onan. Pale kerdeas ăk ciavo, saveske oi ciuteas o anav Șela. Kerdea les ando Kezib. O Iuda lilea pe ciaveske le angluneske le Eroske ăk romni po anav Tamar. O Er, o ciavo o angluno le Iudasko, sas nasul angla o Rai, hai o Rai mudardea les. Atuncia o Iuda phendeas le Onanoske:
— Gia ke romni ke phraleski te avel les ciave ke phrales!* Ando timpo kadal paramiciako ciacii, kadea sas ăl obiceia: kana merelas keo phral hai nas les ciave, lesas leske romnea (ke kumnata) te keres ciave ke phraleske andă lesko than. Deuteronomo 25:5
O Onan, gianindos kă o ciavo kadava nai te avel lesko, c⁠iorelas pi sămînța pe phuv kabor drom sovelas le romneasa pe phraleski, ta na del ciave pe phrales. 10 So kerelas ov sas nasul angla o Rai, hai i les mudardea les. 11 Atuncia o Iuda phendea pe boreake le Tamarake:
— Acio phivli ando kher ke dadesko gi kana va bareola muro ciavo o Șela!
Kă gîndisailo kă i o Șela si te merel sar leske phral. E Tamar ghelis hai beșlis ando kher pe dadesko.
12 Nakhlos but timpo hai e cei le Șuaski, e romni le Iudaski, mulis. Pala so nakhles ăl ghesa le jaleake, o Iuda uștilos ke Timna, kolende kai tunzinas leske brakhean hai leske buznean, ov hai lesko amal, o Hira anda o Adulam. 13 Phendineailos le Tamarake:
— Dikh, keo sokro uștel ke Timna, kaște tunzil le brakhean hai le buznean.
14 Atuncia oi ciudeas pe țoale le phivlimaske, uciardilis ăk bazmavasa hai hureadilis, hai beșlis ke poarta le Enaiimoski kai si po drom karing e Timna; kă dikhelas kă o Șela kerdilosas baro, hai oi ni sas leske dini dă romni. 15 O Iuda dikhlea lan hai gîndisailos kă si ăk kurva, kă uciardeasas peo mui. 16 Oprisailos late anda peo drom hai phendeas:
— Muk man te sovav tusa!
Kă ni pringiandea lan kă sas leski bori. Oi phendeas:
— So des man te soves manța?
17 Ov dinea lan anglal:
— Si te dav tuke drom ăk iedo anda muro kîrdo.
Oi phendeas:
— Numa kana mukesa manghe gajo gi kana des les drom.
18 Ov dinea lan anglal:
— So gajo te dav tut?
Oi phendeas:
— Keo sigilo pe doreasa hai e rovli kai si tut ando vast.
Ov dinea len lake. Pala kodoia sutos lasa, hai oi acilis khamni lestar. 19 Oi uștilis hai teleardeas. Ciudeas e bazmava hai hureadilis pale andăl țoale le phivlimaske. 20 O Iuda dineas drom le iedos pă peo amal anda o Adulam, kaște înkalavel o gajo andal vast le romneake. Dar ov ni arakhlea lan. 21 Pușleas le manușăn le thaneske:
— Kai si e kurva kai beșelas kathe ko Enaim, po drom?
On dine les anglal:
— Nas nici ăk kurva kathe.
22 Ov boldineailos ko Iuda hai phendea leske:
— Ni arakhlem lan, hai i ăl manuș le thaneske phendes: «Nas nici ăk kurva kathe.»
23 O Iuda phendeas:
— Te înkearel so lileas, numa ta na kerdeos lagiaveske. Dikh, dinem drom o iedo kadava, hai ni arakhlean lan.
24 Kam pala trin cion phendineailos le Iudaske:
— E Tamar, ki bori kurvisardeas hai dikh, acilis khamni păce kurvisardeas.
Hai o Iuda phendeas:
— Înkalaven lan avri te avel phabardi!
25 Kana înghearenas lan, oi dinea drom te phenen lake sokroske:
— Katar o manuș kaske si ăl bukea kadala, acilem me khamni. Dikh, rughiv tut, kasko si o sigilo kadava, e dori kadaia hai kadaia rovli?
26 O Iuda pringiandea len hai phendeas:
— Si mai ciacii dă sar mande, kă ni dinem lan dă romni mîră ciaveske le Șelaske.
Dă atunci ni mai sutos lasa. 27 Kana avilis laki vremea te kerel, dikh, andă lako păr sas dui ciave. 28 Ando timpo le kerimasko, iekh înkaladeas o vast anglal. E moașa lileas lesko vast hai phangleas les ăk thavesa lolo, phenindos:
— Kadava înklistos anglal.
29 Dar kana ov țîrdelas o vast palpale, înklistos lesko phral. Atunci e moașa phendeas:
— So pharaiimos kerdean!
Kodolaske lesko anav sas ciutino Pereț. O anav Pereț hakeardeol pharaiimos. 30 Palal înklistos lesko phral, saves sas les o thav lolo ko vast, hai lesko anav sas ciutino Zerah.

*38:8 Ando timpo kadal paramiciako ciacii, kadea sas ăl obiceia: kana merelas keo phral hai nas les ciave, lesas leske romnea (ke kumnata) te keres ciave ke phraleske andă lesko than. Deuteronomo 25:5

38:29 O anav Pereț hakeardeol pharaiimos.